Read Waray Samarenyo Meaning Based Jeremias 39 Bible Online

Jeremias 39 - Waray Samarenyo Meaning Based bible

Jeremias 39

¹Dida han ikanapulo nga bulan han ikasiyam ka tuig nga pagkahadi ni Sedequias han Juda, inmabot hi Hadi Nabucodonosor han Babilonia upod an bug-os niya nga kasondalohan, ngan ginsulong an Jerusalem.

²Dida han ikasiyam ka adlaw han ikaupat ka bulan han ika-11 ka tuig nga pagkahadi ni Sedequias, nagkabubuho an mga pader han syudad. (

³Han kapukan na han Jerusalem,[44] nagkaabot an ngatanan nga labaw nga mga opisyal han hadi han Babilonia ngan nagkalingkod hira didto han Butnga nga Ganghaan, lakip hira Nergal Sareser, Samgar Nebo, Sarsequim, ug hin lain pa nga Nergal Sareser.[45])

⁴Han pakakita ni Hadi Sedequias ngan han ngatanan niya nga mga sondalo han nahinanabo, nagtalinguha hira hin pagpalagiw tikang han syudad dida han gab-i. Nag-agi hira dida han hadianon nga tanaman ngadto han aragian nga nagsusumpay han duha nga mga pader, ngan pinmalagiw hira tipakadto ha Kahamub-an han Jordan.

⁵Kundi ginlanat hira han Babilonianhon nga kasondalohan ngan nadakop hi Sedequias didto han kapatagan nga hirani han Jerico. Niyan ira gindara hiya ngadto kan Hadi Nabucodonosor nga nakadto han syudad han Ribla didto han katunaan han Hamat, ngan didto ginhukman hiya ni Nabucodonosor.

⁶Didto ha Ribla pinanmatay han hadi an mga anak ni Sedequias samtang nagkikita hi Sedequias, ngan iginpapatay liwat niya an mga opisyal han Juda.

⁷Katapos hini, iginpalukat niya an mga mata ni Sedequias ngan ginkadenahan hiya ngan gindara ngadto ha Babilonia.

⁸Hito ngahaw nga higayon ginsunog han mga Babilonianhon an hadianon nga palasyo ngan an kabablayan han mga tawo, ngan ginbungkag an mga pader han Jerusalem.

⁹Ha kataposan gindara nga mga priso ni Nebusaradan, an gilalabawi nga kapitan, ngadto ha Babilonia an mga tawo nga nahibilin didto ha syudad upod an mga binmaya hin pagtampo ha iya.

¹⁰Iginbilin niya didto ha tuna han Juda in pira la han labi ka kablas nga mga tawo nga waray mga hiagi, ngan iya gintagan hira hin mga urubasan ngan kaumhan.

¹¹Kundi ginsugo ni Hadi Nabucodonosor hi Nebusaradan nga gilalabawi nga kapitan hin paghatag hinin masunod nga sugo:

¹²“Kadtoa ngan pamilnga hi Jeremias ngan mangnoi hiya hin maupay. Ayaw hiya paglabti, kundi tumana an bisan ano nga iya karuyag.”

¹³Sanglit iginpakuha ako ni Nebusaradan kaupod hira Nebusasban ug Nergal Sereser nga labaw nga mga opisyal, ngan an ngatanan nga iba nga mga opisyal han hadi han Babilonia, tikang ha bungsaran han palasyo. Ira ginpamangnoan ako kan Gedalias nga anak ni Ahikam ngan apo ni Safan, nga amo an manginginano nga magmurayaw an akon pag-uli. Sanglit nag-ukoy ako didto tampo han mga tawo.

¹⁵Samtang priso pa ako didto han bungsaran han palasyo, gintugon ako han GINOO

¹⁶hin pagsumat kan Ebedmelec nga Sudanhon nga nagsiring an GINOO nga Labi Kamakagarahum, an Dyos han Israel, “Sugad han akon iginsiring, ipadadara ko hini nga syudad an iya kapirdehan ngan diri an iya kauswagan. Ngan kon mahinabo na ini, aadto ka ngan saksi ka hini ngatanan.

¹⁷Kundi ako nga GINOO an mananalipod ha imo ngan diri ka igtutubyan ngadto han mga tawo nga imo nahahadlokan.

¹⁸Tatalwason ko ikaw ha kataragman ngan diri ka pagpapatayon. Makakalikay ka nga buhi kay sinmarig ka ha akon. Ako nga GINOO an nagyakan.”