Read Waray Samarenyo Meaning Based Jeremias 4 Bible Online

Jeremias 4 - Waray Samarenyo Meaning Based bible

Jeremias 4

¹Nasiring an GINOO, “Mga tawo han Israel, kon karuyag niyo hin pagbalik, balik kamo ngadi ha akon. Kon isalikway niyo an mga diyosdiyos nga akon nangangalsan ngan magmatinumanon na kamo ha akon,

²tutugotan ko na kamo hin pagsumpa ha akon ngaran. Niyan[3] hahangyoon ako han ngatanan nga mga nasod hin pagpakaupay ha ira, ngan pagdadayawon ako nira.”

³Nasiring an GINOO ngadto han mga tawo han Juda ug Jerusalem, “Pag-aradoha na niyo an iyo ginpabay-an nga kaumhan; ayaw isabod an iyo mga binhe dida han katungkan.

⁴Pagtumana niyo an iyo ginsaaran ha akon nga iyo GINOO, ngan ighalad ha akon an iyo mga kalugaringon, kamo nga mga tawo han Juda ug Jerusalem. Kon dumiri kamo, maglalaga an akon kasina sugad hin kalayo, tungod han magraot nga mga butang nga iyo ginbuhat. Maglalaga ini ngan waray gud makakaparong hini.”

⁵Patungga an trompeta ha bug-os nga tuna! Goliat hin dako ngan malanoy nga tingog! Sidnga an mga tawo han Juda ug Jerusalem nga manadlagan hira ngadto han pinarig-on nga mga syudad.

⁶Igtutdo an dalan ngadto ha Sion! Palagiw basi matalwas kamo! Ayaw paglangan! Nagdadara an GINOO hin karat-an ngan dako nga kataragman tikang ha amihanan.

⁷Sugad hin usa nga liyon nga nagawas tikang han iya taragoan, ginmawas in usa nga magburungkag hin mga nasod. Tikanhi hiya hin pagbungkag han Juda. Pagbabayaan nga mga ruba an mga syudad han Juda, ngan pangingiwasan han mga mangurokoy hini.

⁸Sanglit pagbado kamo hin sako, pagtangis ngan pagnguyngoy, kay waray bumaya han Juda an mapintas nga kasina han GINOO.

⁹Nagsiring an GINOO, “Hito nga adlaw magmamatalaw an kahadian ngan mga opisyal; mahahadlok an kapadian ngan mahipapausa an mga manaragna.”

¹⁰Niyan nagsiring ako, “O Ginoo nga DYOS, ginlimbongan gud nimo an mga tawo han Jerusalem! Nagsiring ka nga magkakamay-ada kalinaw, kundi aada hira ha kataragman nga papatayon hira han espada.”

¹¹Maabot an panahon nga pagsusumatan an mga tawo han Jerusalem nga mahuyop ngadto ha ira in usa nga maalindanga nga hangin tikang ha kamingawan. Diri ini harupoy la nga nagpapalid hin uhot—

¹²makurukusog ini nga hangin nga maabot ha pagsugo han GINOO! An GINOO ngahaw amo an maghuhukom han iya mga tawo.

¹³Tan-awa, tiabot na an kaaway sugad hin mga dampog. Sugad hin buhawi an iya mga karuwahe hin pakig-away, ngan malarolaksi kay hin mga agila an iya kakabayohan. Pirde na kita! Magkakamatay na kita!

¹⁴Jerusalem, linisi an karat-an tikang han imo kasingkasing basi matalwas ka. Tubtob san-o an pagpadayon nimo han imo magraot nga panhunahuna?

¹⁵Nagpapahibaro han maraot nga sumat in mga magsarangyaw nga tikang han syudad han Dan ngan tikang han kapungtoran han Efraim.

¹⁶Kinmanhi hira hin pagpahimatngon han mga nasod ngan pagsumat han Jerusalem nga tiabot na in mga kaaway tikang hin usa nga hirayo nga nasod. Maggogogliat ini nga mga kaaway kontra han mga syudad han Juda,

¹⁷ngan paglilibotan nira an Jerusalem sugad hin mga tawo nga nagbabantay hin usa nga uma, kay sinmupil han GINOO an iya mga tawo. An GINOO an nagyakan.

¹⁸Juda, imo ini kasaypanan, tungod han imo maraot nga kinabuhi ngan mga buhat. An imo sala amo an hinungdan hini nga pag-antos; nakasamad ini han imo kasingkasing.

¹⁹Hin kamaul-ol! Diri ako nailob han kamaul-ol! An akon kasingkasing! Makusog an pagputok han akon kasingkasing! Diri ako nakakahilom; hinbabatian ko an tunog han mga trompeta, ngan an gogliat hin araway.

²⁰Nagsusunodsunod in mga karat-an; naruba na an bug-os nga nasod. Tigda la nga naruba an amon mga tulda, ngan nagisi an mga biray hini.

²¹Tubtob san-o pa an akon pagpakita han mapintas nga araway ngan pakabati han tunog han mga trompeta?

²²Nasiring an GINOO, “Lurong na an akon mga tawo; diri hira nakilala ha akon. Sugad hira hin lurong nga kabataan; waray nira sarabotan. Nahibaro hira hin pagbuhat han maraot, kundi mga bulok hira hin pagbuhat han matadong.”

²³Tinmamod ako ha tuna—sugad ini hin hiluag nga kamingawan; hinmangad ako ha langit—waray ini kapawa.

²⁴Tinman-aw ako ngadto han kabukiran—nangungurog ini, ngan nagbabarubay-og an kapungtoran.

²⁵Hinkit-an ko nga waray na mga tawo; nagkalupad na an katamsihan.

²⁶Nahimo nga usa nga kamingawan an malangbo nga tuna; mga ruba na an mga syudad hini, tungod han mapintas nga kasina han GINOO. (

²⁷Nagsiring an GINOO nga hihimoon niya nga usa nga kamingawan an bug-os nga tuna, kundi diri niya ini pagbubungkagon ngatanan.)

²⁸Magmamasulob-on an tuna, magsisirom an langit. An GINOO an nagyakan ngan diri hiya magbabalhin han iya hunahuna. Naglarang na hiya ngan diri na niya ini babawion.

²⁹Ha pakabati han aringasa han mga dikabayo ngan mga parapana, mangangalagiw an ngatanan. May-ada madalagan ngadto han kagurangan, magsasaka dida han kababtoan an iba. Mawawaray gud tawo an tagsa nga bungto, ngan waray na didto mag-uokoy.

³⁰Jerusalem, maghihikaraot ka! Kay ano nga nagbabado ka pa hin pula? Kay ano nga nagsusul-ot ka hin mga alahas ngan nagpipintar han imo mga mata? Waray na gamit an imo pagpahusay! Iginsikway ka na han imo mga hinigugma, ngan karuyag nira nga pagpatayon ka.

³¹Hinbatian ko in usa nga pagtangis nga sugad hin usa nga babaye nga nagbabati, usa nga kurinit nga sugad hin usa nga babaye nga nag-aanak han iya suhag. Amo ini an pagtangis han Jerusalem nga nagkukuri hin pagginhawa, nga nagdudupa han iya kamot ngan nasiring, “Mapatay na ako! Tiabot na hira hin pagpatay ha akon!”