Read Waray Samarenyo Meaning Based Jeremias 40 Bible Online

Jeremias 40 - Waray Samarenyo Meaning Based bible

Jeremias 40

¹Naghimangraw ha akon an GINOO katapos pagbuhii ha akon didto ha Rama ni Nebusaradan nga gilalabawi nga kapitan. Gindara ako ngadto nga kinadenahan kaupod han iba nga mga tawo nga tikang ha Jerusalem ug Juda nga gindadara nga mga bihag ngadto ha Babilonia.

²Iginbulag ako han iba ngan ginsiring ako han gilalabawi nga kapitan, “An GINOO nga imo Dyos nagtarhog hin pagbungkag hini nga tuna,

³ngan yana gintuman na niya an iya iginsiring. Nahinabo ini ngatanan kay nakasala ngan sinmupak han GINOO an iyo mga tawo.

⁴Yana huhubaran ko ikaw han mga kadena ha imo mga kamot ngan bubuhian ko ikaw. Kon karuyag mo hin pag-upod ha akon ngadto ha Babilonia, makakahimo ka ngan pagmamangnoan ko ikaw. Kundi kon diri ka maruyag hin pag-upod, diri ka kinahanglan kumadto. Imo an bug-os nga nasod ngan ikaw an pagpili kon hain ka karuyag hin pag-ukoy ngan waray maglalabot ha imo.”

⁵Kundi waray ako magbaton ha iya,[46] sanglit nagsiring ha akon hi Nebusaradan, “Balik ngadto kan Gedalias nga anak ni Ahikam ngan apo ni Safan, nga gintudlok han hadi han Babilonia nga gobernador han mga bungto han Juda. Mahihimo nga lumungon ka ha iya ngan mag-ukoy tampo han mga tawo, o mahihimo liwat nga kumadto ka ha bisan diin nga imo naruruyagan.” Niyan gintagan ako niya hin usa nga regalo ngan hin pagkaon nga akon pagdadad-on, ngan ginpalakat ako niya.

⁶Kinmadto ako ha Mispa hin paglungon kan Gedalias ngan nag-ukoy ako tampo han mga tawo nga nahibilin didto han tuna.

⁷Waray magtubyan in may pira nga Judiyo nga mga opisyal ngan mga sondalo nga waray umampo han hadi. Nakabati hira nga ginhimo han hadi han Babilonia hi Gedalias nga gobernador han tuna, ngan iginbutang hiya nga tinaporan hadton ngatanan nga waray mabihag ngadto ha Babilonia—an labi ka kablas nga mga tawo han tuna.

⁸Sanglit kinmadto kan Gedalias didto ha Mispa hira Ismael nga anak ni Natanias, Johanan nga anak ni Carias, Seraias nga anak ni Tanehumet, an mga anak ni Efai nga taga-Netofa, ug Jesonias nga taga-Maaca, kaupod han ira mga tawo.

⁹Nagsiring ha ira hi Gedalias, “Nagpapasarig ako ha iyo nga kinahanglan umampo na kamo ngadto han mga Babilonianhon ngan waray niyo sadang kahadlokan. Pag-ukoy kamo dinhe hini nga tuna, pag-alagad kamo han hadi han Babilonia, ngan maghihingaupay kamo.

¹⁰Mag-uokoy ako dinhe ha Mispa ngan matindog ako para ha iyo kon kumanhi an mga Babilonianhon. Kundi makakagtirok ngan makakaghimos kamo hin bino, mga bunga hin kahoy, ug lana hin olibo, ngan makakag-ukoy kamo didto han mga baryo nga iyo ginsasakop.”

¹¹Hito ngahaw nga panahon nakabati an ngatanan nga mga Israelita didto ha Moab, Amon, Edumea, ug iba pa nga mga nasod, nga gintugotan han hadi han Babilonia in mga Israelita hin pagpabilin didto ha Juda, ngan nga ginhimo niya nga ira gobernador hi Gedalias.

¹²Sanglit binayaan nira an mga dapit diin hira nagsasarang ngan binmalik hira ngadto ha Juda. Kinmadto hira kan Gedalias didto ha Mispa, ngan didto nagtirok hira hin damo nga bino ngan mga bunga hin kahoy.

¹³Katapos hini, kinmadto kan Gedalias didto ha Mispa hi Johanan ngan an mga pangulo han mga sondalo nga waray umampo han hadi,

¹⁴ngan nagsiring ha iya, “Diri ka ba maaram nga ginsugo ni Hadi Baalis han Amon hi Ismael hin pagpatay ha imo?” Kundi waray tumuod hini hi Gedalias.

¹⁵Niyan nagsiring ha iya hin sekreto hi Johanan, “Tugoti ako hin pagkadto ngan pagpatay kan Ismael, ngan waray mahibabaro kon hin-o an nagbuhat hini. Kay ano nga tutugotan hiya hin pagpatay ha imo? Makakagpasarang ito han ngatanan nga mga Judiyo nga nag-uokoy upod ha imo, ngan makakadara ini hin karat-an ha ngatanan nga mga tawo nga nahibilin dinhe ha Juda.”

¹⁶Kundi binmaton hi Gedalias, “Ayaw pagbuhata ini! Diri matuod an imo iginsiring mahitungod kan Ismael!”