Read Waray Samarenyo Meaning Based Jeremias 41 Bible Online

Jeremias 41 - Waray Samarenyo Meaning Based bible

Jeremias 41

¹Dida han ikapito ka bulan hito nga tuig, kinmadto hin pakigkita kan Gobernador Gedalias hi Ismael nga anak ni Natanias ngan apo ni Elisama, nga sakop han hadianon nga panimalay ngan usa han puno nga mga opisyal[47] han hadi, upod in napulo ka tawo. Samtang nagsasasaro hira hin pagkaon,

²nanhulbot han ira mga espada hira Ismael ngan an napulo ka tawo nga upod niya, ngan ginpatay hi Gedalias.

³Ginpatay liwat ni Ismael an ngatanan nga mga Israelita nga kaupod ni Gedalias didto ha Mispa ngan an Babilonianhon nga mga sondalo nga iginkatuman nga nakadto.

⁴Han pagkabuwas, ha waray pa hibabaroi nga ginpatay hi Gedalias,

⁵nagkaabot in 80 ka tawo tikang ha Siquem, Silo, ug Samaria. Gintusaran nira an ira mga bungot, ginggisi an ira mga panapton, ngan ginsamad nira an ira kalugaringon nga lawas. Nagdadara hira hin mga pagkaon ug insyenso nga ighahalad nira didto han Templo.

⁶Sanglit ginmawas han Mispa hi Ismael nga nagtitinangis hin pagtapo ha ira. Han pag-abot niya ngada ha ira, nagsiring hiya, “Sakob kamo hin pagkita kan Gedalias.”

⁷Han paghisulod gudla nira han syudad, pinanmatay hira ni Ismael ngan han iya mga tawo ngan iginhulog an ira mga lawas ngadto hin usa nga atabay.

⁸Kundi may-ada napulo katawo dida han hugpo nga nagsiring kan Ismael, “Ayaw gad kami pagpataya. May-ada namon trigo, dawa, lana hin olibo, ug dugos nga gintago didto han kaumhan.” Sanglit iya gintalwas hira.

⁹An atabay nga ginhulogan ni Ismael han mga lawas han mga tawo nga iya pinanmatay amo an dako[48] nga atabay nga gin-ukab ni Hadi Asa hadto han pagsulonga ha iya ni Hadi Baasa han Israel. Ginpuno ni Ismael han mga lawas an atabay.

¹⁰Niyan ginpriso ni Ismael an mga anak nga kababayen-an han hadi ngan an ngatanan nga mga tawo didto ha Mispa, nga ginpamangnoan kan Gedalias ni Nebusaradan nga gilalabawi nga kapitan. Gindara hira nga mga priso ni Ismael, ngan nagkalakat hira tipakadto han katunaan han Amon.

¹¹Nakabati hi Johanan ngan an ngatanan nga kaupod niya nga mga pangulo han kasondalohan, han sala nga ginbuhat ni Ismael.

¹²Sanglit ginlanat nira hi Ismael upod an ira mga tawo ngan hin-abtan hiya hirani han dako nga linaw didto ha Gabaon.

¹³Han pakakita han mga priso ni Ismael kan Johanan ngan han mga pangulo han kasondalohan nga kaupod niya, nalipay hira,

¹⁴ngan tinmalikod ngan nagdadlagan ngadto ha ira.

¹⁵Kundi nakalikay kan Johanan hi Ismael ngan hin walo han iya mga tawo, ngan pinmalagiw hira ngadto ha tuna han Amon.

¹⁶Niyan gindumara ni Johanan ngan han mga pangulo han kasondalohan nga kaupod niya an mga tawo nga ginbihag ni Ismael tikang ha Mispa han katapos pagpataya kan Gedalias—mga sondalo, kababayen-an, kabataan, ngan mga yunuko.

¹⁷Nahadlok hira han mga Babilonianhon kay ginpatay ni Ismael hi Gedalias nga gintudlok han hadi han Babilonia nga gobernador han tuna. Sanglit nagtipakadto hira ha Ehipto, basi mahirayo hira tikang han mga Babilonianhon. Dida han dalan pinmahuway hira didto ha Simhan nga hirani ha Betlehem.