Read Waray Samarenyo Meaning Based Jeremias 42 Bible Online

Jeremias 42 - Waray Samarenyo Meaning Based bible

Jeremias 42

¹Niyan nagkaabot an ngatanan nga mga pangulo han kasondalohan lakip hira Johanan nga anak ni Carias ug Azarias[49] nga anak ni Osaias, upod an magkalainlain nga mga tawo,

²ngan nagsiring ha akon, “Buhata gad an amon hahangyoon ha imo! Ig-ampo gad kami ngadto han GINOO nga aton Dyos. Ig-ampo kami ngatanan nga nanhisalin nga buhi. Hadto anay damo kami; kundi yana gutiay nala kami nga nanhisalin, sugad han imo hinkikit-an.

³Pag-ampo nga igtutdo kami han GINOO nga aton Dyos han dalan nga amon paglalaktan, ngan han amon pagbubuhaton.”

⁴Binmaton ako, “Maupay man. Mag-aampo ako ngadto han GINOO nga aton Dyos sumala han iyo hangyo, ngan igsusumat ko ha iyo an bisan ano nga iya igsiring. Diri ako maglilirong ha iyo hin bisan ano.”

⁵Niyan nagsiring hira ha akon, “Matinuod ngan matinumanon unta nga saksi kontra ha amon an GINOO, kon diri namon pagtumanon an ngatanan nga mga sugo nga ihahatag ha imo para ha amon han GINOO nga aton Dyos.

⁶Makalipay ini ha amon o diri, susugton namon an GINOO nga aton Dyos, ngan mag-ampo ka ha iya para ha amon. Waray maraot nga amon dadangatan kon magsugot kami ha iya.”

⁷Paglabay hin napulo ka adlaw naghimangraw ha akon an GINOO;

⁸sanglit gintirok ko hira Johanan, an ngatanan nga mga pangulo han kasondalohan nga kaupod niya, ngan an ngatanan nga iba nga mga tawo.

⁹Ginsiring ko hira, “An GINOO nga Dyos han Israel, nga akon gin-ampoan hin pangaro han iyo hangyo nagsiring,

¹⁰‘Kon karuyag niyo magpadayon hin pag-ukoy dinhe hini nga tuna, pagtitindogon ko kamo ngan diri ko kamo pagpupukanon; igtatanom ko kamo ngan diri ko kamo gagaboton. Nakapabido hin duro ha akon an karat-an nga gindara ko ha iyo.

¹¹Hunong na kamo hin pagkinahadlok han hadi han Babilonia. Kaupod ako niyo ngan pagtatalwason ko kamo ha iya gahom.

¹²Tungod nga maloloy-on ako, tatalinguhaon ko nga malooy hiya ha iyo basi paulion kamo. Ako nga GINOO an nagyakan.’

¹³“Kundi kinahanglan nga diri kamo sumupak han GINOO nga iyo Dyos, kamo nga mga tawo nga nanhibilin ha Juda, ngan diri kamo lumaris hin pag-ukoy dinhe hini nga tuna. Kinahanglan diri kamo sumiring, ‘Diri, makadto ngan mag-uokoy kami didto ha Ehipto, diin diri na kami maatubang hin araway o diri na mabati hin tingog hin pakig-away o diri na gugutomon.’ Kon sumiring kamo hini, niyan masiring an GINOO nga Labi Kamakagarahum, nga Dyos han Israel, ‘Kon tinguha gud niyo hin pagkadto ngan hin pag-ukoy didto ha Ehipto,

¹⁶hiaabotan kamo han araway nga iyo nahahadlokan ngan magsusunod ha iyo an gutom nga iyo nababarak-an, ngan magkakamatay kamo didto ha Ehipto.

¹⁷Magkakamatay pinaagi hin araway o hin gutom o hin sakit an ngatanan nga mga tawo nga nagtitinguha hin pagkadto ngan hin pag-ukoy didto ha Ehipto. Waray usa ha ira nga mahisasalin nga buhi, waray usa nga makakalikay han karat-an nga pagdadad-on ko ha ira.’

¹⁸“Nasiring an GINOO nga Dyos han Israel, ‘Sugad han paghuwara ko han akon kasina ngan kapungot ngadto han mga tawo han Jerusalem, ighuhuwad ko man ha iyo an akon kapungot kon kumadto kamo ha Ehipto. Mahihimo kamo nga usa nga makangingirhat nga taran-awon; pag-iintrimisan kamo han mga tawo ngan gagamiton nga panhimaraot an iyo ngaran. Diri na gud kamo makakakita liwat hini nga dapit.’”

¹⁹Niyan nagpadayon ako, “Nagsiring an GINOO ngada ha iyo nga mga tawo nga nanhisalin ha Juda nga diri kamo kumadto ha Ehipto. Sanglit ginpapahimatngon ko kamo yana

²⁰nga nahihimo niyo in dako nga sayop. Ginhangyo ako niyo nga ig-ampo ko kamo ngadto han GINOO nga aton Dyos, ngan nagsaad kamo nga iyo pagtutumanon an ngatanan nga iya igsusugo.

²¹Ngan yana ginsumatan ko kamo, kundi nasupak kamo han ngatanan nga iginsugo ha akon han GINOO nga aton Dyos hin pagsumat ha iyo.

²²Sanglit tigamni ini niyo: magkakamatay kamo pinaagi hin araway o hin gutom o hin sakit didto han tuna nga karuyag niyo kadtoan hin pag-ukoy.”