Read Waray Samarenyo Meaning Based Jeremias 43 Bible Online

Jeremias 43 - Waray Samarenyo Meaning Based bible

Jeremias 43

¹Nahuman ko an pagsumat han mga tawo an ngatanan nga iginpasumat ha akon han GINOO nga ira Dyos.

²Niyan nagsiring ha akon hira Azarias nga anak ni Osaias ug Johanan nga anak ni Carias, ngan an ngatanan nga magpinahitas-on nga mga tawo, “Nagbibinuwa ka. Waray ka pagsugoa han GINOO nga aton Dyos hin pagsumat ha amon nga diri kami makadto ngan mag-ukoy didto ha Ehipto.

³Kundi gin-ugsong ka la kontra ha amon ni Baruc nga anak ni Nerias, basi mailarom kami han gahom han mga Babilonianhon, ngan patayon o dad-on kami nira ngadto ha Babilonia.”

⁴Sanglit waray gud magtuman han sugo han GINOO hin pagpabilin dinhe ha tuna han Juda hi Johanan o bisan hin-o han mga opisyal han kasondalohan o bisan hin-o han mga tawo.

⁵Niyan gindara ngadto ha Ehipto ni Johanan ngan han ngatanan nga mga opisyal han kasondalohan an ngatanan nga nanhibilin didto ha Juda, upod an ngatanan nga mga tawo nga binmalik tikang han mga nasod diin iginpasarang hira:

⁶an kalalaken-an, an kababayen-an, an kabataan, ngan an mga anak nga kababayen-an han hadi. Gindara nira an ngatanan nga mga tawo nga iginbilin ni Nebusaradan nga gilalabawi nga kapitan ha ilarom han pagmangno ni Gedalias, lakip hi Baruc ngan hi ako.

⁷Ginsupak nira an sugo han GINOO ngan kinmadto hira ha Ehipto tubtob han syudad han Tafanes.

⁸Didto nagsiring ha akon an GINOO,

⁹“Kuha hin pira nga dagko nga mga bato ngan iglubong ini didto han sinimento nga agianan[50] ha atubangan han aragian ngadto han balay han mga punoan dinhe hini nga syudad, ngan pakitaa han pagbuhat mo hini in pira han mga Israelita.

¹⁰Niyan sumati hira nga ako nga GINOO nga Labi Kamakagarahum, Dyos han Israel, amo an magdadara han akon surugoon nga hi Nabucodonosor han Babilonia nganhi hini nga dapit, ngan igbubutang niya[51] an iya trono ha bawbaw hini nga mga bato nga imo[52] iginlubong, ngan magbibilad hiya han hadianon nga tulda ha bawbaw hini.

¹¹Makanhi hi Nabucodonosor ngan pagpipirdehon niya an Ehipto. Mapatay pinaagi hin sakit an mga tawo nga ginhukman nga papatayon pinaagi hin sakit, pagdadad-on nga mga priso adton mga ginhukman nga pagdadad-on nga mga priso, ngan mapatay pinaagi hin araway adton mga ginhukman nga papatayon pinaagi hin araway.

¹²Susuritan ko an mga templo han kadiyosan han Ehipto, ngan pagsusunogon o pananad-on han hadi han Babilonia an ira kadiyosan. Sugad nga gintitimoran han magmarangno hin mga karnero hin mga kuto an iya panapton, pagtitimoran man han hadi han Babilonia an tuna han Ehipto ngan mabaya hiya nga madinaogon.

¹³Pagbubungkagon niya an baraan nga mga monumento nga bato didto ha Heliopolis ha Ehipto, ngan pag-uugtangon an mga templo han kadiyosan ha Ehipto.”