Read Waray Samarenyo Meaning Based Jeremias 45 Bible Online

Jeremias 45 - Waray Samarenyo Meaning Based bible

Jeremias 45

¹Dida han ikaupat ka tuig nga pagkahadi han Juda ni Joakim nga anak ni Josias, iginsurat ni Baruc an iginpasurat ko ha iya. Niyan ginsumatan ko hiya

²nga nagsiring an GINOO, an Dyos han Israel, “Baruc,

³nasiring ka, ‘Nagtuturaw na ako! Gindugangan han GINOO hin kabidoan an akon mga kakurian. Ginugul-an na ako hin pagnginuyngoy ngan diri na ako nakakapahuway!’

⁴“Kundi ako nga GINOO an magruruba han akon gintindog ngan maggagabot han akon gintanom. Pagbubuhaton ko ini dida ha bug-os nga tuna.

⁵Nagbibiling ka ba hin talagsaon nga pagdumara ha imo? Ayaw pagbuhata ini. Ipadadara ko an karat-an ngadto han ngatanan nga mga tawo, kundi makakalikay ka han imo kinabuhi bisan ngain ka kadto. Ako nga GINOO an nagyakan.”