Read Waray Samarenyo Meaning Based Jeremias 47 Bible Online

Jeremias 47 - Waray Samarenyo Meaning Based bible

Jeremias 47

¹Han waray pa susulonga an Gasa han hadi han Ehipto, naghimangraw ha akon an GINOO mahitungod han Filistia.

²Nagsiring hiya: “Tan-awa! Natubo in katubigan didto ha amihanan, ngan mabuklos ini sugad hin salog nga nabaha. Lalapwason hini an tuna ngan an ngatanan nga aada ha tuna, an iya mga syudad ngan an iya mga tawo. Magoliat hin pakibulig an mga tawo; magngunguyngoy an ngatanan nga mga tawo ha tuna.

³Hibabatian nira an rinapakdapak han mga kabayo, an kinaradol han mga karuwahe, an linagatak han mga ruyda. Diri na mabalik an mga amay hin pagkuha han ira kabataan; babanhoron an ira mga kamot nga nanluluyloy.

⁴Inmabot na an panahon hin pagbungkag han Filistia, hin pag-utod tikang ha Tiro ug Sidon han ngatanan nga bulig nga nahibibilin. Ako nga GINOO an magbubungkag han mga Filisteohanon, han ngatanan nga nagkaabot tikang ha kabaybayonan han Creta.

⁵Inmabot in dako nga kabidoan ngadto ha mga tawo han Gasa, ngan mamingaw la an mga tawo han Ascalon. Tubtob san-o an pagmabidoon han nahisalin han Filistia?

⁶Nagoliat kamo, ‘Espada han GINOO! Tubtob san-o an imo pagtinigbas? Balik ngadto han imo takob, pabilin didto ngan pahuway!’

⁷Kundi uunanhon hin pakapahuway hini, nga gintagan ko ini hin buruhaton? Ginsugo ko ini hin pagsulong han Ascalon ngan han mga tawo nga nag-uokoy dida han baybayon.”