Read Waray Samarenyo Meaning Based Jeremias 52 Bible Online

Jeremias 52 - Waray Samarenyo Meaning Based bible

Jeremias 52

¹Baynte uno an panuigon ni Sedequias han kahimo niya nga hadi han Juda, ngan naghadi hiya didto ha Jerusalem sulod hin 11 ka tuig. An ngaran han iroy niya amo hi Hamutal nga anak han Jeremias nga nag-ukoy didto han syudad han Libna.

²Nakasala han GINOO hi Hadi Sedequias sugad han ginbuhat ni Hadi Joakim.

³Napungot hin duro an GINOO han mga tawo han Jerusalem ug Juda nga iya ginpaiwas hira ha iya atubangan. Sinmupil hi Sedequias kan Hadi Nabucodonosor han Babilonia,

⁴sanglit inmabot hi Nabucodonosor upod an ngatanan niya nga kasondalohan ngan ginsulong an Jerusalem dida han ikanapulo ka adlaw han ikanapulo ka bulan han ikasiyam ka tuig nga pagkahadi ni Sedequias. Nagkampo hira ha gawas han syudad, ngan ginpalibotan ini nira hin higtaas nga mga tagaytay para panalipod,

⁵ngan ginsulong ini ngada han ika 11 ka tuig ni Sedequias.

⁶Dida han ikasiyam ka adlaw han ikaupat ka bulan hito ngahaw nga tuig, han makalilisang na an gutom nga waray na gud nahibilin nga pagkaon an mga tawo,

⁷nabuho an mga pader han syudad. Bisan kon ginpalibotan han mga Babilonianhon an syudad, nanngalagiw ha gab-i an ngatanan nga mga sondalo. Didto hira pag-agi han hadianon nga tanaman, inmagi hira dida han aragian nga nagsusumpay han duha nga mga pader, ngan nanmalagiw tipakadto ha Kahamub-an han Jordan.

⁸Kundi ginlanat hi Hadi Sedequias han Babilonianhon nga kasondalohan, nadakop hiya didto han kapatagan nga hirani han Jerico, ngan ginbayaanan hiya han ngatanan niya nga mga sondalo.

⁹Gindara hi Sedequias ngadto kan Nabucodonosor nga nakadto ha syudad han Ribla didto han katunaan han Hamat, ngan didto ginhukman hiya ni Nabucodonosor.

¹⁰Didto ha Ribla iginpapatay niya an mga anak nga kalalaken-an ni Sedequias samtang nagkikita hi Sedequias, ngan iginpapatay liwat niya an mga opisyal han Juda.

¹¹Katapos hito, ginpalukat niya an mga mata ni Sedequias ngan ginpakadenahan hiya basi pagdad-on ngadto ha Babilonia. Didto ha Babilonia ginpriso hi Sedequias tubtob han iya kamatay.

¹²Dida han ikanapulo ka adlaw han ikalima ka bulan han ika-19 ka tuig nga pagkahadi han Babilonia ni Hadi Nabucodonosor, sinmulod ha Jerusalem hi Nebusaradan nga magsaragdon han hadi ngan gilalabawi nga kapitan han iya kasondalohan.

¹³Ginsunog niya an Templo, an palasyo, ngan an kabablayan han ngatanan nga dumagko nga mga tawo didto ha Jerusalem,

¹⁴ngan ginruba han iya mga sondalo an mga pader han syudad.

¹⁵Unina gindara ngadto ha Babilonia[64] ni Nebusaradan an mga tawo nga nanhibilin didto han syudad, an nabibilin nga hag-id nga mga trabahador ngan adton mga binmaya hin pagdapig han mga Babilonianhon.

¹⁶Kundi ginbilin niya didto ha Juda in pira han labi ka kablas nga mga tawo nga waray mga hiagi, ngan ginpatrabaho hira didto han mga urubasan ngan kaumhan.

¹⁷Ginrumok han mga Babilonianhon an mga harigi nga bronse ngan an mga karomata nga nakadto han Templo, upod an dako nga tangke nga bronse, ngan gindara nira an ngatanan nga bronse ngadto ha Babilonia.

¹⁸Gindara liwat nira an mga pala ngan an mga surudlan hin agbon nga ginagamit hin paglimpyo han altar, an mga garamiton nga ginagamit hin pag-andam han mga lampara, an mga makaong nga ginagamit hin pagsalod han dugo han mga halad, an mga makaong nga ginagamit hin pagtubod hin insyenso, ngan an ngatanan nga mga higamit nga bronse nga ginagamit hin pag-alagad didto han Templo.

¹⁹Gindara nira an ngatanan nga hinimo hin bulawan o salapi: an gudti nga mga makaong, an mga karukaraha nga sinasaloran han mga baga, an mga makaong nga surudlan han dugo han mga halad, an mga surudlan hin agbon, an mga kandilero, an mga makaong nga surudlan hin insyenso, ngan an mga makaong nga ginagamit hin pag-ipis han mga halad nga bino.

²⁰Mabug-at hin duro pagtimbangon an mga butang nga bronse nga ginpahimo ni Hadi Solomon para han Templo—an duha nga mga harigi, an mga karomata, an dako nga tangke, ngan an dose nga mga todo nga baka nga tinutungtongan han tangke.

²¹Magpareho gud an duha nga mga harigi: walo ka metros an kahitaas, ngan 5.3 ka metros an likos han kada usa. Mga lungag ini ngan 75 ka milimetro an kadakmol han metal. Ha bawbaw han kada harigi may-ada uloulo nga bronse nga 2.2 ka metros an kahitaas, ngan gin-alikosan ini hin hinukot nga alamri nga inadornohan hin mga granada nga hinimo liwat hin bronse an ngatanan.

²³Dida han hinukot nga alamri han kada harigi, may-ada 100 ngatanan nga mga granada, ngan 96 hini an hinkikit-an tikang ha tuna.

²⁴Labot hini, tikang han Templo gindara nga mga bihag ni Nebusaradan nga gilalabawi nga kapitan, hira Seraias nga Labaw nga Padi, Sefanias nga iya kabulig nga padi, ngan an tulo pa nga dumagko nga mga opisyal han Templo.

²⁵Tikang han syudad, gindara niya an opisyal nga nagmamangulo han mga sondalo, pito han kanan hadi mga magsaragdon nga nakadto pa han syudad, an sekretaryo han gilalabawi nga kapitan nga tinaporan han mga sinurat bahin han kasondalohan, ngan 60 pa nga dumagko nga mga tawo.

²⁶Gindara hira ni Nebusaradan ngadto han hadi han Babilonia nga nakadto ha syudad han Ribla,

²⁷didto han katunaan han Hamat. Didto iginpalatob ngan iginpapatay hira han hadi. Sanglit gindara tikang han ira tuna an mga tawo han Juda ngadto ha pagkabihag.

²⁸Amo ini an lista nga nahisurat mahitungod han mga tawo nga gindara nga mga bihag ni Nabucodonosor: dida han ikapito ka tuig han iya pagkahadi, ginbihag niya in 3,023;

²⁹dida han ika-18 niya ka tuig, 832 an nabihag tikang ha Jerusalem,

³⁰ngan dida han iya ika-23 ka tuig, 745—nga gindara nga mga bihag ni Nebusaradan. An gindara nga mga bihag 4,600 ka tawo ngatanan.

³¹Dida han tuig nga kahimo ni Ebilmerodac nga hadi han Babilonia, nalooy hiya kan Hadi Joakim han Juda. Ginbuhian niya hi Hadi Joakim. Nahinabo ini dida han ika-25 ka adlaw han ika-12 ka bulan han ika-37 ka tuig tikang han kabihag ni Joakim ngadto ha Babilonia.

³²Nalooy ha iya hi Ebilmerodac, ngan gintagan hiya hin katungdanan nga larulabaw in dungog kay han iginhatag ni Ebilmerodac han iba nga kahadian nga nabihag upod ha iya didto ha Babilonia.

³³Waray na hi Joakim papagbadoa han panapton hin usa nga bihag. Dayuday na hiya kasaro han hadi hin pagkaon didto ha palasyo ngada han iya kamatay.

³⁴Kada adlaw, samtang buhi pa hiya, gintagan hiya hin igo nga garastohon para han iya mga kinahanglanon.