Read Waray Samarenyo Meaning Based Jeremias 9 Bible Online

Jeremias 9 - Waray Samarenyo Meaning Based bible

Jeremias 9

¹Maupay pa unta kon atabay hin tubig an akon ulo, ngan burabod hin mga luha an akon mga mata, basi makagtangis ako adlaw gab-i tungod han pinanmatay nga akon mga tawo.

²Maupay pa unta kon may dapit nga akon pag-uokyan didto han kamingawan, basi mahirayo ako han akon mga tawo. Kay diri magtinumanon hira ngatanan, ngan hugpo hira hin mga maglingo.

³Dayuday andam hira hin pagbinuwa; naghahadi ha tuna an kamalimbong, ngan diri lugod an kamatuoran. Nasiring an GINOO, “Sunodsunod an pagbuhat hin karat-an han akon mga tawo, ngan diri hira nagtutug-an nga ako amo an ira Dyos.”

⁴Kinahanglan an tagsatagsa magtagam kontra han iya sangkay, ngan diri tumapod han iya bugto nga lalake; kay sugad kan Jacob malingo an kada bugto, ngan nagpapakaraot han iya kasangkayan an tagsatagsa.

⁵Ginlilimbongan nira ngatanan an ira kasangkayan, ngan waray nagsusumat han kamatuoran; gintutdoan nira hin pagbuwa an ira mga dila; ngan nagpapadayon hira hin pagpinakasala. Sunodsunod an ira panlupig, ngan sunodsunod an ira panlimbong. Nasiring an GINOO nga iginsisikway na hiya han iya mga tawo.

⁷Tungod hini nasiring an GINOO nga Labi Kamakagarahum, “Pagpupurogon ko sugad hin metal an akon mga tawo, ngan pagsasarihan ko hira. Nagbuhat hin maraot an akon mga tawo— ano pa an akon sadang pagbuhaton ha ira?

⁸Sugad hin makamaratay nga mga pana an ira mga dila; waray hunong an ira pagbinuwa. An tagsatagsa ha ira naghihimangraw hin pakigsangkay han iya amyaw, kundi ha tinuod an ira tuyo amo an pagbitik ha iya.

⁹Diri ko ba hira pagkakastigohon tungod hini nga mga butang? Diri ko ba pagbubulson in usa nga nasod nga sugad hini? Ako nga GINOO an nagyakan.”

¹⁰Nagsiring ako, “Magmamasulob-on ako tungod han kabukiran, ngan magngunguyngoy tungod han mga panabsaban; kay nagmara na ini, ngan waray na may naagi. Diri na hibabatian an pag-inga han kabakahan; nagkalupad na an katamsihan ngan nagkalakat na an mga ihalas nga kamanampan.”

¹¹Nasiring an GINOO, “Hihimoon ko nga tambak hin mga rinuba an Jerusalem, nga usa nga dapit nga urokyan hin mga lubo; mahihimo nga kamingawan an mga syudad han Juda, nga usa nga dapit nga waray na mga tawo.”

¹²Pinmakiana ako, “GINOO, kay ano nga nabungkag man an tuna ngan mamara sugad hin kamingawan, sanglit waray na may naagi dida hini? Hin-o in may kinaadman basi makasabot hini? Hin-o an ginsaysayan mo hini basi makagsumat hiya han iba?”

¹³Binmaton an GINOO, “Nahinabo ini kay ginsalikway han akon mga tawo an pagturon-an nga iginhatag ko ha ira. Waray nira pagsugta o pagbuhata an akon iginsiring ha ira.

¹⁴Nagmatig-a lugod an ira mga ulo ngan nagsingba hira han mga diyosdiyos ni Baal sumala han igintutdo ha ira han ira mga ginikanan.

¹⁵Sanglit pamatii an pagbubuhaton ko nga GINOO nga Labi Kamakagarahum, nga Dyos han Israel: Tatagan ko an akon mga tawo hin magpait nga mga tanom nga ira kakaonon ngan hilo nga ira iimnon.

¹⁶Igpapasarang ko hira didto han mga nasod nga waray pa hibatii nira o han ira kaapoy-apoyan; ngan susulongon hira hin kaaway nga mga kasondalohan tubtob nga mapuo ko hira.”

¹⁷Nagsiring an GINOO nga Labi Kamakagarahum, “Palandonga an nahinanabo! Pakanhia an mga nagtataguminatay, an kababayen-an nga nagkakanta hin mga kanta hin paglubong.”

¹⁸Nagsiring an mga tawo, “Padagmita hira ngan pakantaha para ha amon hin usa nga kanta hin paglubong, tubtob nga mapuno an amon mga mata hin mga luha, ngan mahumog an amon mga pirok tungod hin pagtinangis.”

¹⁹Pamatii an panangis didto ha Sion: “Nabungkag na kita! Naalohan na gud kita! Kinahanglan bayaan ta an aton tuna; nagkarurumpag na an aton kabablayan.”

²⁰Nagsiring ako, “Kamo nga kababayen-an, pamatii an GINOO, ngan pamatii an iya mga pulong. Tutdoi hin pagnguyngoy an iyo mga anak nga kababayen-an, ngan hin pagkanta hin karantahon hin paglubong an iyo kasangkayan.

²¹Sinmakob an kamatayon pinaagi han aton mga bintana ngan sinmulod han aton mga palasyo; ginpatay hini an kabataan didto han kakalsadahan, ngan an batan-on nga kalalaken-an didto han mga taboan.

²²Nagsasarang an patay nga mga lawas ha ngatanan nga dapit sugad hin mga tinambak hin tai didto han kaumhan, sugad hin gin-ani nga pugas nga ginbayaan han mga mag-arani, mga inani nga waray tawo nga naninirok. Amo ini an iginpasiring ha akon han GINOO.”

²³Nasiring an GINOO, “Diri angay pumarayaw han ira kinaadman an makinaadmananon nga mga tawo, o han ira kamagkusog, an magkusog nga mga tawo, o han ira mga manggad an mga riko.

²⁴Kon may-ada tawo nga karuyag pumarayaw, kinahanglan pumarayaw hiya nga nakilala ngan nakakasabot hiya ha akon, kay dayuday an akon paghigugma, ngan binubuhat ko an maupay ngan matadong. Amo ini nga mga butang an nakakalipay ha akon. Ako nga GINOO an nagyakan.”

²⁵Nasiring an GINOO, “Maabot an panahon nga pagkakastigohon ko an mga tawo han Ehipto, Juda, Edumea, Amon, Moab, ngan an mga tawo nga nag-uokoy ha kamingawan, nga halipot an kaarot han ira buhok.[9] Mga tinori ini ngatanan nga mga tawo, kundi waray magtuman han ginsaaran nga ginpapahinungdan hini. Waray magtuman han akon ginsaaran ini nga mga tawo ngan an mga tawo han Israel.”