Read Waray Samarenyo Meaning Based Pagnguyngoy 1 Bible Online

Pagnguyngoy 1 - Waray Samarenyo Meaning Based bible

Pagnguyngoy 1

¹Hin pagkamamingaw nga nag-uusaan an Jerusalem nga hadto anay puno hin mga tawo! Pinasidunggan hiya hadto anay han kalibutan, yana sugad na la hiya hin balo nga babaye. An labi kahamili han mga syudad nahulog ngadto ha pagkaoripon.

²Waray hunong an iya pagtangis ha bug-os nga gab-i; nadaligdig ha iya mga bayhon in mga luha. Waray usa han iya kasangkayan hadto, in nahibilin hin pagliaw ha iya. Ginlingo hiya han iya kasangkayan, ngan yana nakig-away hira ngatanan ha iya.

³Makalolooy nga mga oripon an mga tawo han Juda, nga ginpugos hin pagpaiwas tikang han ira urokyan.[1] Nag-uokoy hira didto han iba nga mga tuna, nga waray dapit nga maaangkon nira nga ira kalugaringon— Ginlilibotan hira hin mga kaaway, nga waray nira lulotsan hin pakapalagiw.

⁴Waray na yana napakadto han Templo hin pagsingba ha mga adlaw nga iglilihi. Nag-aantos an mga daraga nga nagkanta didto, ngan nag-aaraba nala an kapadian. Mamingaw na an mga ganghaan han syudad, ngan makalilisang an gin-aantos han Sion.

⁵Nakadaog an iya mga kaaway; nasasakop hiya han ira gahom. Ginpaantos hiya han GINOO tungod han damo niya nga mga sala. Ginbihag ngan ginhalin an iya kabataan.

⁶Napara na an kaanyag han Jerusalem. An iya mga pangulo sugad hin mga bugsok nga magluya na tungod hin gutom, nga haros waray na kusog ha ira pagpalagiw tikang han mga mangaranop.

⁷Usa na yana nga mamingaw an ruba nga Jerusalem, nahinunumdom an Jerusalem han iya kamaanyag han naglabay nga panahon. Han pagpukana ha iya han iya kaaway, waray gud may binmulig ha iya. Nagtinawa la an simulong ha iya ngan nagbiaybiay han iya pagkapukan.

⁸Waray na an iya dungog; hubo ngan tinamay na hiya. Naghaharoy hira ngan tinatabunan an iya bayhon tungod hin kaawod. Nagmahugaw an Jerusalem tungod han iya makalilisang nga sala.

⁹Masayon la hikit-an an iya pagkamahugaw, kundi waray hiya manginlabot han iya kapalaran. Makalilisang an iya pagkapukan; waray gud makakaliaw ha iya. Nagdaog an iya mga kaaway, ngan nagtatawag hiya hin pakimalooy ngadto han GINOO.

¹⁰Gintikasan hiya han iya mga kaaway han ngatanan niya nga mga manggad. Iya hinkit-an an pagsulod nira han Templo, diin gindid-an han GINOO hin pagkadto an mga Hentil.

¹¹Naghaharoy an iya mga tawo ha ira pamiling hin sadang makaon. Ginbabalyo nira hin pagkaon an ira mga manggad basi la hira mabuhi. “O GINOO, siplati ako,” nagtatawag an syudad, “kitaa an akon kasakitan.”

¹²“Siplat kamo ha akon!” nasangpit hiya ngadto han ngatanan nga nalabay.[2] “May-ada ba ha iyo nag-antos sugad han akon gin-antos, tungod han sirot nga ginhatag ha akon han GINOO ha panahon han iya kasina?

¹³“Nagpadara hiya hin kalayo tikang ha kahitas-an, usa nga kalayo nga nagsusunog han akon kaluluthan. Nagbutang hiya hin usa nga bitik para ha akon ngan natumba ako ha tuna. Katapos ginpasibay-an ako niya, ngan ginbayaan ako dida hin waray hunong nga kasakitan.

¹⁴“Gintigamnan niya an ngatanan ko nga mga sala, ngan ginbutok ini ngatanan. Ibinitay ini ha akon liog, ngan nakapaluya ha akon tungod han makabug-at hini. Igintubyan ako han Ginoo ngadto han akon mga kaaway, ngan waray ko gud nahimo hin pagkontra ha ira.

¹⁵“Gintaw-an la han Ginoo an akon mag-isog nga mga sondalo. Ginpasulong niya in kasondalohan hin pagpukan han akon batan-on nga kalalaken-an. Gindugmok niya an akon mga tawo sugad hin mga ubas didto hin piriihan.

¹⁶“Sanglit rutay na hin pagtangis an akon mga mata. Waray makakaliaw ha akon; waray makakapadasig ha akon. Gindaog ako han kaaway; waray na gud nahibilin nga butang han akon mga tawo.

¹⁷“Idinuduhol ko an akon mga kamot, kundi waray gud nabulig ha akon. Nagtawag an GINOO hin mga kaaway kontra ha akon ngan ginpalibotan ako; Gin-iisip ako nira sugad hin mahugaw nga butang.

¹⁸“Kundi matadong an GINOO, kay waray ako magsugot ha iya. Pamati kamo ha akon, mga tawo ha ngatanan nga dapit; tan-awa ako ha akon kasakitan. Ginbihag an akon kaolitawhan ngan kadaragan-an.

¹⁹“Nagtawag ako hin maugop ha akon, kundi dinmiri hira hin pagbulig ha akon. An kapadian ngan an mga pangulo nagkamatay didto han kakalsadahan han syudad, hin pamiling hin pagkaon basi mabuhi hira.

²⁰“Tan-awa, O GINOO, an akon pagharoy, an kagul-anan han akon kalag! Mabidoon gud an akon kasingkasing tungod han akon mga sala. Damo an ginpatay didto han kakalsadahan, ngan ha sakob han mga balay.

²¹“Pamatii[3] an akon mga pagnguyngoy; waray gud may nagliliaw ha akon. Nalilipay an akon mga kaaway nga gindad-an mo ako hin karat-an. Paabota[4] na an adlaw nga imo iginsaad; paantosa an akon mga kaaway sugad han akon pag-antos.

²²“Pagsiroti hira tungod han ngatanan nira nga pagkamaraot. Kastigoha hira sugad han pagkastigo mo ha akon tungod han akon mga sala. Naghaharoy ako ha kagul-anan, ngan masakit an akon kasingkasing.”