Read Waray Samarenyo Meaning Based Pagnguyngoy 3 Bible Online

Pagnguyngoy 3 - Waray Samarenyo Meaning Based bible

Pagnguyngoy 3

¹Usa ako nga maaram kon ano an kahimtang han ginkakastigo han Dyos.

²Gintabog ako niya ngadto han masirom nga kahiladman.

³Ngan gintubal ako niya hin waray pagkalooy nga mga hampak.

⁴Ginpabay-an ako niya nga lukop hin bag-o nga mga kasamdan, ngan pinamiangan ako.

⁵Ginsadhan ako niya didto hin usa nga prisohan hin kakurian ug kagul-anan.

⁶Ginpugos ako niya hin pag-ukoy didto han kasisidman han kamatayon.

⁷Ginkadenahan ako niya; usa ako nga priso nga waray paglaom hin pakapalagiw.

⁸Nagoliat ako hin pakibulig, kundi napakabungol la an Dyos.

⁹Nag-iikaturumba ako ha paglakat; gin-uulang ako hin pader nga mga bato bisan ngain ako aatubang.

¹⁰Ginhulat ako niya sugad hin uso; gindasmagan ako niya sugad hin liyon.

¹¹Ginlanat ako niya hin paggawas han dalan, ginpanamad ako niya ngan ginbayaan.

¹²Gin-unat niya an iya pana ngan ginhimo ako nga irigoon han iya mga udyong.

¹³Ginpana ako niya ngadto gud ha sakob han akon lawas.

¹⁴Gintitinawaan ako han mga tawo ha bug-os nga adlaw; irintrimisan la ako nira ngatanan.

¹⁵An mapait la nga pag-antos an iya iginhatag ha akon nga pagkaon ug pag-inom.

¹⁶Ginbagnos niya an akon bayhon dida han tuna ngan nangihoan ako ha paghidasmag dida han mga bato.

¹⁷Hinngalimtan ko an maupay nga panlawas, an kamurayaw, ngan an kalipayan.

¹⁸Diri na mag-iiha mapatay ako; waray na an akon paglaom han GINOO.

¹⁹Mapait nga hilo an pagdumdom han akon kasakitan ngan han akon kawaray urokyan.

²⁰Dayuday ginhuhunahuna ko ini, ngan naguguol an akon espiritu.

²¹Kundi nabalik an paglaom ko kon ini nga usa nga butang akon hinunumdoman:

²²Nagpapadayon pa gihapon an waray pagkatapos nga gugma ngan kalooy han GINOO,

²³bag-o sugad han kaagahon, ngan waray pagsayop sugad han pagsirang han adlaw.

²⁴An GINOO gud la an akon malon, sanglit aada ha iya an akon paglaom.

²⁵Maupay an GINOO ngadto han ngatanan nga nasarig ha iya.

²⁶Sanglit maupay gud para ha aton an paghulat hin mapailobon han matalwason nga pagbulig han GINOO.

²⁷Ngan maupay gud nga mahibaro kita hin pagpailob tikang han aton pagkabatan-on.

²⁸Kon nag-aantos kita, kinahanglan lumingkod kita nga hilomon ta an pagpailob.

²⁹Kinahanglan yumukbo kita ha pagpaubos, kay bangin may-ada pa naton paglaom.

³⁰Bisan kon paghampakon ngan pagtamayon kita, kinahanglan karawton ta ini ngatanan.

³¹Maloloy-on an Ginoo ngan diri kita niya igsisikway ha kadayonan.

³²Bisan kon kastigohon kita niya, kundi marig-on an iya paghigugma ha aton.

³³Diri niya ikinalilipay an pagbido o pagsakit ha aton.

³⁴Maaram an Ginoo kon pinapag-anto kita sugad hin mga priso.

³⁵Maaram hiya kon gintatamakan la an aton mga katungod nga hatag niya ha aton.

³⁶Maaram hiya kon ginlulubag an katadongan didto han mga hukmanan.

³⁷An kaburot-on la han Ginoo an dayuday natutuman.[6]

³⁸Ha iya pagsugo nahinanabo an maupay ug maraot.

³⁹Kay ano nga mangurutob kita kon ginkakastigo kita tungod han aton sala?[7]

⁴⁰Usisaha ta an aton mga paagi ngan balik kita ngadto han GINOO.

⁴¹Buksi ta an aton kasingkasing ngadto han Dyos ha langit ngan pag-ampo kita,

⁴²“Nakasala ngan sinmupil kami ha imo ngan waray ka, O GINOO, magpasaylo ha amon.

⁴³“Ginlanat ngan ginpatay mo kami; waray mo ipakita an imo kalooy tungod han imo kasina.

⁴⁴Pinaagi hin madakmol nga dampog hin kapungot nga makuri matahos han amon mga pag-ampo.

⁴⁵Ginhimo mo kami nga harapilan hin mga sighot han kalibutan.

⁴⁶“Gintatamay ngan ginyuyubit kami han ngatanan namon nga mga kaaway.

⁴⁷Nag-agi kami ha karat-an ngan kabungkagan; nag-uokoy kami ha kataragman ngan kahadlok.

⁴⁸Makusog an pag-awas ha akon mga mata han mga luha tungod han pagkapukan han akon mga tawo.

⁴⁹“Waray hunong an pagturo han akon mga luha.

⁵⁰Tubtob nga tumangbo an GINOO tikang ha langit ngan hikit-an kita.

⁵¹Mabidoon an akon kasingkasing kon nakita ako han nahinabo han kababayen-an han syudad.

⁵²“Sugad hin usa nga tamsi ginbitik ako hin mga kaaway nga napupungot ha akon hin waray la hinungdan.

⁵³Iginlabog ako nga buhi ngadto hin luong, ngan gintakpan hin bato an ganggang.

⁵⁴Nalampo ako han tubig ngan naghunahuna ako nga hirani na ha akon an kamatayon.

⁵⁵“Tikang ha kahiladman nagtawag ako ha imo, O GINOO.

⁵⁶Ngan pinamatian mo an pakimalooy ko ha imo nga pamatian mo an akon pagtawag.

⁵⁷Ginbaton ngan ginsiring mo ako nga diri ako mahadlok.

⁵⁸“Gintabangan mo ako, O Ginoo, ngan gintalwas mo an akon kinabuhi.

⁵⁹Paghukom dapig ha akon; maaram ka han mga sayop nga ginbuhat ha akon.

⁶⁰Maaram ka nga napupungot ha akon an akon mga kaaway ngan naglalarang hira hin paglingo ha akon.

⁶¹“Hinbatian mo an ira pagtamay ha akon, O GINOO, maaram ka han ngatanan nga ira mga larang kontra ha akon.

⁶²Magkulop an ira pagpinakaraot ha akon ngan paghimo han ira mga larang.

⁶³Gin-iinintrimisan ako nira tikang ha aga ngadto ha gab-i.

⁶⁴“Kastigoha hira tungod han ira ginbuhat, O GINOO.

⁶⁵Panhimaraota hira ngan pun-a hira hin pagkahulop!

⁶⁶Bukora hira han imo kasina ngan puoha hira dinhe ha tuna!”