Read Waray Samarenyo Meaning Based Surat ni Jeremias 1 Bible Online

Surat ni Jeremias 1 - Waray Samarenyo Meaning Based bible

Surat ni Jeremias 1

¹Usa ini ka kopya han surat nga iginpadara ni Jeremias ngadto han mga tawo han Jerusalem san-o hira dad-a nga mga bihag han Babilonianhon nga hadi ngadto ha Babilonia. Aanhi hini dinhe an mensahe nga sugo han Dyos kan Jeremias nga ighatag ha ira.

²Nakasala kamo kontra han Dyos. Amo ini an hinungdan kay ano nga dadad-on na kamo nga mga priso ni Hadi Nabucodonosor ngadto ha Babilonia.

³Magpapabilin kamo didto nga mga bihag sulod hin damo nga katuigan, magmamaiha kamo sugad hin kaiha hin pito nga katulinan; katapos, pagmamandoan kamo nga malinawon han Dyos hin pag-uli tikang ha Babilonia.

⁴Didto ha Babilonia makita kamo hin kadiyosan nga hinimo hin kahoy, salapi, ug bulawan—kadiyosan nga ginpapas-an hin mga tawo ngan nakakapahadlok han mga pagano.

⁵Kinahanglan maghirot kamo hin diri pagsubad hito nga mga Hentil. Ayaw kamo kahadlok han ira kadiyosan kon iyo hikit-an ini nga ginproprosisyon ngan ginsisingba nira.

⁶Lugod, siring ha iyo kalugaringon, “Ikaw la, O Ginoo, an kinahanglan pagsingbahon namon.”

⁷Aadto an anghel han Dyos upod ha iyo; pagmamangnoan kamo niya.

⁸Pinurog hin salapi ug bulawan an ira mga diyosdiyos nga may-ada mga dila nga hinimo hin mga panday. Kundi diri ini tinuod nga kadiyosan ngan diri ini hira nakakayakan.

⁹Naghihimo an mga tawo hin bulawan nga mga korona ngan iginsusul-ot ini ha ulo han ira kadiyosan, ngan ini nga mga diyosdiyos sugad hin kababayen-an nga maruruyagon hin mga alahas.

¹⁰Usahay kinakawat han kapadian an salapi ug bulawan tikang han ira kadiyosan ngan ginagasto ini para ha ira ngahaw;

¹¹ihinahatag pa ngani nira an iba hini ngadto han mga magraot nga kababayen-an han templo. Ginbabadoan ini nga kadiyosan nga kahoy, salapi, ug bulawan sugad hin mga tawo hira.

¹²Kundi bisan kon ginbabadoan ini nga kadiyosan hin pula nga higlawig nga mga panapton sugad hin kahadian, diri hira nakakapugong nga diri hira kahugawan o diri hira pag-anayon.

¹³Kon putos na an ira mga nawong hin tapotapo han templo, iba in naglilinis ha ira.

¹⁴Sugad hin tawo nga mga maghurukom, nakapot hira hin mga baston, kundi waray hira gahom hin pagkastigo bisan kan kanay nga nakakasayop ha ira.

¹⁵Usahay may-ada hira mga daga ngan mga parakol ha ira mga kamot, kundi diri hira nakakapanalipod ha ira ngahaw nga diri hira maruba ha pag-awayan o nga diri dad-on hin mga kawatan.

¹⁶Nagpapamatuod ini ngatanan nga diri hira kadiyosan—ayaw pagsingba ha ira.

¹⁷Ito nga kadiyosan nga ibinutang ha ira mga templo sugad la hin buong nga makaong hin kawaray pulos. Puno an ira mga mata hin tapotapo nga dara han mga tawo kon nasulod hira han Templo.

¹⁸Ginpaparig-on han kapadian an templo pinaagi hin mga sada han mga porta, trangka ug mga balabag, basi diri makasulod an mga kawatan. Trinangkahan hin maupay an kadiyosan sugad hin usa nga priso nga paratayon na tungod hin usa nga pagtalapas kontra han hadi.

¹⁹Nagdadagkot an kapadian hin mga suga basi kapawaan an kadiyosan, kundi diri nakakakita ini nga mga diyosdiyos hin bisan usa na manla nga suga.

²⁰Gin-aanay an mga sakob nira sugad han mga tablon han templo ngan nadudumog an ira mga bado, kundi diri ini hira maaram.

²¹Nag-iitom an ira mga nawong pinaagi han aso didto ha templo.

²²Hinahaponan hira hin mga kulalaknit, mga balinsasayaw, ngan iba nga katamsihan, ngan linulunayan hira bisan han kamisayan.

²³Nagpapamatuod ini ngatanan nga diri hira mga diyos—ayaw niyo hira pagsingbaha.

²⁴Ginputos hin bulawan ini nga mga diyosdiyos hin pagpahusay ha ira, kundi diri hira naglulugaring hin pagsinaw gawas kon may magpainggat ha ira. Waray hira umabat hin bisan ano han pag-ipisa ha ira ngadto hin mga hurmaan.

²⁵Waray kalainan bisan ano ka mahal an igbayad ha ira; diri gihapon hira nakakaginhawa.

²⁶Kitaa an pagkawaray gamit nira! Diri hira nakakaglugaring hin paglakat, kundi kinahanglan pagpasgon hira.

²⁷Bisan adton mga naninimangno ha ira nakakaawod kon nahuhulog ha tuna an usa han ira mga diyosdiyos ngan kinahanglan puroton liwat ini. Kon ginpapatindog in usa ha ira didto hin usa nga dapit, diri ini nakakakiwa, ngan kon nahihilig ini, diri gud ini nakakaglugaring hin pagtadong. An paghalad hin mga regalo ngadto ha ira sugad la hin paghatag hin mga regalo ngadto hin usa nga minatay.

²⁸Iginbabaligya han kapadian an mga iginhalad ngadto han ira mga diyos ngan ginggagamit an kwarta hini ngahaw nga kapadian para ha ira ngahaw. Ngan gin-aasinan han mga asawa han kapadian an mga ginhalad para hin orhe nga paggamit, ngan diri lugod ini ipinapaangbit ngadto han mga kablas ngan mga magpakalolooy.

²⁹Tinutugotan hin pagkapot han mga halad bisan an kababayen-an nga inabotan han binulan nira nga regla o bag-o pa la nga nag-anak. Nagpapamatuod ini ngatanan nga diri hira mga diyos—ayaw niyo hira pagsingbaha.

³⁰Uunanhon hin katawag nira nga mga diyos nga tinutugotan man an kababayen-an hin paghalad ngadto hini nga mga butang nga hinimo hin kahoy, salapi ug bulawan?

³¹An kapadian nalingkod pa ngani didto ha mga templo kon masulob-on hira, nga gisi an ira panapton ngan waray tahob an kiniskisan nira nga mga ulo.

³²Nakurahab ngan nagoliat an kapadian ha ira pagnguyngoy ha atubangan han ira mga diyos nga daw sugad hin tampo hira hin usa nga tapos.

³³Ginhuhugkas nira an mga panapton han ira mga diyos ngan iginhahatag ini ngadto han ira mga asawa ngan mga anak.

³⁴Waray sapayan kon bumulig o magdaot in usa ka tawo hini nga mga diyos, kay diri man ini hira nakakabalos ha ira. Diri ini hira nakakahimo nga hadi in usa ka tawo o nakakahukas ini hira hin pagkahadi hin usa ka tawo,

³⁵ngan diri hira makakapariko hin usa ka tawo o makakahatag ha iya hin bisan ano nga kwarta. Kon may-ada tawo nga nagsusumpa ngadto ha ira kundi diri nagtutuman hini, diri gud hira nakakahimo hin pagpabayad ha ira.

³⁶Diri gud hira nakakatalwas hin usa ka tawo tikang han kamatayon, ngan diri gud hira nakakabulig hin usa nga maluya nga tawo kontra han tawo nga makusog.

³⁷Diri hira makakapahiuli hin pagkita ngadto han mga buta o makakatalwas hin bisan hin-o nga aada ha kakurian.

³⁸Diri ini hira makakapakita hin kalooy ug makakabulig han mga balo ug ilo.

³⁹Ini nga mga butang nga hinimo hin kahoy ngan pinutos hin salapi ug bulawan waray ini hira gahom sugad hin bato nga kinuha tikang han kabukiran; ngan kaaalohan la an mga tawo nga magsisingba ha ira.

⁴⁰Uunanhon hin pakahunahuna han mga tawo nga mga diyos ini hira o nga pagtawgon hira nga mga diyos? Nagdadara hin kaarawdan an mga Babilonianhon ngadto han kalugaringon nira nga mga diyos.

⁴¹Kon diri nakakayakan in usa ka tawo ira gindadara ini hiya ngadto han templo ngan ginhahangyo hi Bel nga ihatag hini nga tawo an gahom hin pakayakan, nga sugad nga hi Bel nakakasabot hini ngatanan.

⁴²Bisan kon an mga tawo maaram nga diri nakakabulig an ira mga diyos matig-a gud an ira mga ulo ngan nagpapadayon hira hin pagsingba hini nga mga diyos.

⁴³Diri amo la ini, kundi may-ada kababayen-an nga nagbabagkos han ira ngahaw mga hawak ngan nagkakalingkod ha ligid han dalan, nga nagtutubod hin insyenso ngan nagtutubyan han ira kalugaringon kay mga babaye hira nga magraot an bantog. Kon kinukuha in usa ha ira para hin pakighilawas, nabalik hiya hin pagtamay han babaye nga sapit niya nga waray igo nga kahusay nga asay pilion hiya.

⁴⁴Buwa an ngatanan hiunong hini nga mga diyosdiyos. Uunanhon hin pakahunahuna han mga tawo nga mga diyos hira o pagtawgon hira nga mga diyos?

⁴⁵Ginhihimo ini nga mga diyos hin mga panday ngan mga platero, sanglit diri gud hira mahihimo nga bisan ano nga butang kon diri himoon hira sugad han karuyag hini nga mga tawo.

⁴⁶Diri ngani maiha an kinabuhi han parahimo ha ira, sanglit uunanhon nira hin pakatuha hin mga dyos?

⁴⁷Waray mabibilin hini nga mga tawo kundi an kalimbongi ngan kaalohi la sugad nga panurondon para han tiarabot nga mga katulinan.

⁴⁸Kon naabot an araway ngan mga kasamok, naghuhunahuna an kapadian kon ngain hira kakadto hin pagtago dara an ira mga diyos.

⁴⁹Diri nakakabulig ini nga mga diyosdiyos kon aada na an mga araway ngan mga kasamok. Kay ano nga diri nakakasabot an mga tawo nga diri mga diyos ini nga mga diyosdiyos?

⁵⁰Kahoy la nga pinutos hin salapi ug bulawan ini nga mga diyosdiyos; may adlaw nga hisasabotan ini hira nga diri ini hira tinuod nga mga diyos.

⁵¹Makakasabotan ngatanan nga kanasoran ngan kahadian nga mga binuhat la hin mga kamot hin tawo an mga diyosdiyos. Waray hira gahom hin usa nga diyos,

⁵²ngan kinahanglan hibaroan han tagsatagsa nga diri gud hira tinuod nga mga diyos.

⁵³Diri ini nga mga diyos makakahimo nga hadi hin usa ka tawo; diri ini hira makakapauran.

⁵⁴Diri hira makakaghukom hiunong han kalugaringon nira nga mga butang o makakahatag hin katadongan ngadto hin tawo nga ginbuhatan hin kasaypanan; waray gud nira mahihimo nga bisan ano. Sugad ini hira hin kawaray gamit hin mga uwak nga naglulupadlupad ha kahanginan.

⁵⁵Kon nasusunog in usa nga templo nagdadadlagan an kapadian hin pagtalwas han ira kalugaringon, samtang an mga diyosdiyos nga kahoy nga binawbawan hin salapi ug bulawan binabayaan nira nga masunog sugad hin kahoy nga mga tablon.

⁵⁶Diri hira makakaato hin kahadian o makakakadto ha pag-awayan kontra hin mga kaaway. Uunanhon hin pakatuod han mga tawo nga mga diyos hira?

⁵⁷Ini nga mga diyosdiyos nga hinimo hin kahoy nga binawbawan hin salapi ug bulawan diri makakapanalipod ha ira ngahaw tikang hin mga kawatan o tikasan,

⁵⁸nga nagtitikas han salapi ug bulawan ngan han mga panapton han mga diyos ngan ira gindadara ini ngatanan. Waray nahihimo han mga diyos hin pagpugong ha ira.

⁵⁹Mauruupay pa in bisan ano nga butang tikang hin usa nga hadi nga maisog ngadto hin usa nga mapulsanon nga daba kay hin usa nga diyos nga diri tinuod. Mauruupay bisan in usa nga sada hin porta kay hin usa nga diri tinuod nga diyos; kay nakakapanalipod in usa nga sada hin porta han mga butang ha sulod han balay. Mauruupay bisan an kahoy nga harigi dida hin usa nga palasyo kay hin usa nga diri tinuod nga diyos.

⁶⁰Iginhatag han Dyos an adlaw, an bulan, ngan an kabito-an hin paghatag hin kapawa, ngan nagsusugot hira ha iya.

⁶¹Amo man an kikidlat ug hangin. Hinkikit-an an kikidlat ha kahigrayoan, ngan nahuyop an hangin ha ngatanan nga dapit.

⁶²Kon ginsusugo ha Dyos an mga dampog hin pagsarang han bug-os nga kalibutan, nasugot hira.

⁶³Kon nagsusugo an Diyos nganhi ha ubos hin kalayo tikang ha langit hin pagsunog han kabukiran ngan mga kagurangan, nagtutuman ini hira han iginsusugo ha ira. Diri makakahimo hini nga mga butang an mga diyosdiyos—diri ngani hira makakasubad hin maupay.

⁶⁴Kay ano nga pagtatawgon hira nga mga diyos, nga diri man hira nakakabulig ha aton o nakakadaot ha aton ha bisan ano nga paagi?

⁶⁵Mag-aram kamo nga diri hira mga diyos, sanglit ayaw kamo pagsingba ha ira.

⁶⁶Waray gahom ini nga mga diyos han kahadian; diri hira makakagpanhimaraot ha ira o makakagpakaupay ha ira.

⁶⁷Diri hira makakahimo para han kanasoran hin bisan ano nga mga tigaman didto ha langit; diri hira makakasirang sugad han adlaw o han bulan.

⁶⁸Mauruupay pa an ihalas nga kamanampan kay hito nga mga diyosdiyos; nakakalikay an kamanampan hin kataragman hin pagpanalipod ha ira ngahaw.

⁶⁹Sanglit uraura na hin kadayag nga diri hira mga diyos, sanglit ayaw kamo pagsingba ha ira.

⁷⁰Ini nga ira mga diyos nga kahoy nga pinutos hin salapi ug bulawan makakabulig hira sugad la hin pahoy didto ha butnga hin kahumayan; diri gud ini makakapanalipod.

⁷¹Sugad la hira hin mga sapinit dida hin usa nga tanaman; diri ini nakakatabog han katamsihan, lugod mahapon an katamsihan dida ha ira. Ini nga mga diyos sugad la hin patay nga lawas nga iginlabog ngadto ha kasisidman.

⁷²Nadudumog an pula nga higlawig nga mga panapton nga lino[1] nga ira isinusul-ot, sanglit maaram kita nga diri hira mga diyos. Ha kataposan pagkukutkoton hira hin mga anay, ngan onina waray bisan diin ug bisan hin-o nga makakagamit ha ira.

⁷³An matadong nga tawo mauruupay pa kay han iba; diri hiya nagtatag-iya hin bisan ano nga mga diyosdiyos, ngan diri gud hira makakauwat ha iya.