Read Waray Samarenyo Meaning Based Baruc 5 Bible Online

Baruc 5 - Waray Samarenyo Meaning Based bible

Baruc 5

¹Jerusalem, lubasa an mga panapton nga imo ginbado ha imo kamasulob-on ngan kagul-anan, ngan isul-ot an waray kataposan nga kaanyag han himaya han Dyos.

²Itapis an kirugpos han pagkamatadong han Dyos. Ibutang ha imo ulo an korona han himaya han Waray Kataposan nga Dyos.

³Ipapakita han Dyos an imo kaanyag ngadto han tagsa nga nasod ha tuna.

⁴Masiring hiya ha kadayonan ha iyo, “Himyang na an iyo kamutangan tungod han iyo pagkamatadong, ngan an iyo pagkamaanyag tungod han iyo paghigugma ha ako.”[3]

⁵Tukdaw, Jerusalem, tindog ha bawbaw han bukid; tan-awa kon ngain dadad-a han Dyos, an Usa nga Baraan, an iyo mga anak nga tikang ha sinirangan ngan tikang ha katundan. Malipayon hira tungod kay an Dyos nahinumdom ha ira.

⁶Jerusalem, ginbihag an imo mga anak han imo mga kaaway; ginbayaan ka nira nga baktas, kundi iginbalik hira han Dyos ngada ha imo lukop han hadianon nga kamaanyag.

⁷Nagsugo an Dyos nga pagpanason an tagsa nga hitaas nga bukid ngan an kapungtoran nga waray katubtoban; nagsugo hiya nga pagtak-opan an mga kahamub-an ngan pagpatagon an tuna, basi magkaabot hin waray kahadlok an mga tawo han Israel dida han himaya han Dyos.

⁸Ha pagsugo han Dyos, matubo in mga kagurangan hin maghamot nga kakahoyan basi makahatag hin lindong para han mga tawo han Israel.

⁹Dadad-on han Dyos hin pag-uli an Israel. Mabalik hira upod in dako nga kalipay, nga gin-unhan han iya pagkalooy ngan pagkamatadong, nga ginlilibotan han iya mahimayaon nga kapawa.