Read Waray Samarenyo Meaning Based Awit han Tulo nga Kalalaken-an 1 Bible Online

Awit han Tulo nga Kalalaken-an 1 - Waray Samarenyo Meaning Based bible

Awit han Tulo nga Kalalaken-an 1

¹Nagtikang hin paglakat palibot ha butnga han kalayo an tulo nga kalalaken-an, hira Ananias, Misael, ug Azarias,[1] samtang nagkakanta hira hin mga imno ngadto sa Dyos ngan nagdadayaw ha iya nga Ginoo.

²Niyan hinmadong ngan tinmindog hi Azarias ngan didto ha butnga han kalayo nag-ampo hiya ha dako nga tingog:

³“O Ginoo nga Dyos han amon kaapoy-apoyan, nagdadayaw ngan nagdadayeg kami ha imo; pagpasidunggan unta ha kadayonan an imo ngaran.

⁴Gindumara mo kami sugad han angay ha amon. Ha ngatanan nga butang nga imo ginbuhat ha amon, dayuday nga tangkod ka ha amon, ngan han paghukmi mo ha amon, dayuday ka nga waray pinalabi.

⁵Ginbuhat mo an matadong ngan gindad-an mo hin karat-an an Jerusalem nga baraan nga syudad han amon kaapoy-apoyan. Angay ha amon ito nga paghukom tungod han amon mga sala.

⁶Amon ka ginsupak, amon ka gintalikdan, ngan nabuhat namon an ngatanan nga mga sala.

⁷Waray namon pagbuhata an mga butang nga imo ginsugo ha amon. Kon ginsugot namon an imo mga balaod, mainuswagon unta kami,

⁸kundi yana angay ha amon an paghukom ngan kastigo nga imo gindara ha amon.

⁹Imo kami igintubyan ngadto hin matinalapason, madumot, ngan masupilon nga mga kaaway—ngadto hin labi kamahuka nga hadi ha kalibutan.

¹⁰Ngan yana naalohan kami ngatanan nga nagsisingba ha imo; makaarawod ha amon an pagbungat han amon mga baba.

¹¹“Kundi tungod han kalugaringon mo nga dungog, ayaw gad pagbungkaga an imo ginsaaran ha amon ngan ayaw pagbayai kami ha kadayonan.

¹²Ayaw gad ighalot an imo pagkalooy ha amon. Tumana gad an imo mga saad kanda Abraham nga imo hinigugma, Isaac nga imo surugoon, ug Jacob nga amay han imo baraan nga mga tawo nga Israel.

¹³Imo iginsaad hin paghatag ha ira hin damo nga mga tulin sugad han kadamo han kabiton-an ha langit o han mga baras ha baybayon.

¹⁴Kundi yana, O Ginoo, gutiay na la kami kon itanding han iba nga mga nasod; bisan hain kami, makaarawod inin amon kamutangan tungod han amon mga sala.

¹⁵Ginbayaan kami nga waray hadi, waray mga manaragna o mga pangulo. Waray na kami usa nga Templo nga kakadtoan hin pagdara ngada ha imo hin mga halad nga tinubod, mga regalo, o insyenso, waray na dapit diin makakaghalad kami ha imo ngan malolooy ka ha amon.

¹⁶Kundi nadangop kami ha imo upod an mabinasolon ngan mapinaubsanon nga kasingkasing. Samtang nakikimalooy kami nga karawaton mo kami nga sugad hin kinmanhi kami dara in mga halad nga tinubod nga lalaki nga mga karnero ngan mga baka ngan yinukotyukot nga magtambok nga nati nga mga karnero.

¹⁷Karawata gad an amon pagbasol sugad nga amon halad nga tinubod yana nga adlaw, basi magsugot kami ha imo ha bug-os namon nga kasingkasing. Diri gud kaaalohan an bisan hin-o nga nasarig ha imo.

¹⁸Yana nagsasaad kami ha bug-os namon nga kasingkasing hin pagsugot ha imo, pagsingba ha imo, ngan pagdangop ha imo hin pag-ampo. Pagdumaraa kami nga maloloy-on ngan ayaw na kami ikadto hin kaarawdan.

¹⁹

²⁰O Ginoo, talwasa kami pinaagi hin usa han imo mga milagro; pagpasidunggi an imo ngaran.

²¹“Dad-i hin kaarawdan ngan kaalo an ngatanan nga nagpakaraot ha amon. Kuhaa an ira kusog ug gahom ngan dugmoka an ira kabakod.

²²Pahibaroa hira nga ikaw la an Ginoo ug Dyos nga naghahadi ka nga mahimayaon ha bug-os nga kalibutan.”

²³Ginpalaga han mga surugoon han hadi nga naglabog han tulo nga kalalaken-an ngadto ha hudno an kalayo pinaagi hin pagsung-i hin lana, alkitran, uhot, ug kahoy.

²⁴Naglarab an kalayo ngadto hin kahitaas nga 25 ka metros

²⁵ngan naglarab pa ngani ha gawas ngan gin-ugtang an mga Babilonianhon nga nagkakatukdaw hirani han hudno.

²⁶Kundi kinmunsad ngadto han kalayo in usa nga anghel han Ginoo, diin nakadto an tulo nga kalalaken-an. Iya iginpinid ha ligid an mga laga,

²⁷sanglit inabat in matugnaw nga harupyoy nga nahuyop han kalayo ngan waray gud dapati hira han kalayo o makadaot ha ira ha bisan ano nga paagi.

²⁸Didto ha sakob han hudno nagsarabat na liwat an tulo nga kalalaken-an hin pagkanta ha pagdayaw han Dyos:

²⁹“Gindadayaw ka namon, O Ginoo nga Dyos han amon kaapoy-apoyan.

³⁰Pagpasidunggan ngan pagtahoron unta ha kadayonan an imo harangdon ngan baraan nga ngaran.

³¹Pagkantahon unta in mga imno ha paghimaya ha imo ha kadayonan ngan pagdayawon unta ikaw nga baraan nga aadto hito nga Templo,

³²diin nalingkod ka ha imo langitnon nga trono ha igbaw han mga kerubin ngan natan-aw ka ngadto ha tuna han mga minatay. Pagdayawon nga pagsidunggan ka unta ha kadayonan.

³³Pagdayawon ka unta samtang nalingkod ka ha hadianon mo nga trono. Pagkantahon unta in mga imno ha pagdayaw ha imo ha kadayonan.

³⁴Pagdayawon ka unta didto ha kahitas-an. Pagkantahon unta in mga imno ha pagdayaw ha imo ha kadayonan.

³⁵“Pagdayawa an Ginoo, ngatanan nga binuhatan; kantaha an pagdayaw ha iya ngan pagpasidunggi hiya ha kadayonan.

³⁶Pagdayawa an Ginoo, mga langit ha kahitas-an; kantaha an pagdayaw ha iya ngan pagpasidunggi hiya ha kadayonan.

³⁷Pagdayawa an Ginoo, ngatanan nga mga anghel han Ginoo; kantaha an pagdayaw ha iya ngan pagpasidunggi hiya ha kadayonan.

³⁸Pagdayawa an Ginoo, ngatanan nga katubigan ha bawbaw han kalangitan; kantaha an pagdayaw ha iya ngan pagpasidunggi hiya ha kadayonan.

³⁹Pagdayawa an Ginoo, ngatanan nga langitnon nga mga kagamhanan; kantaha an pagdayaw ha iya ngan pagpasidunggi hiya ha kadayonan.

⁴⁰Pagdayawa an Ginoo, adlaw ug bulan; kantaha an pagdayaw ha iya ngan pagpasidunggi hiya ha kadayonan.

⁴¹Pagdayawa an Ginoo, kabiton-an han langit; kantaha an pagdayaw ha iya ngan pagpasidunggi hiya ha kadayonan.

⁴²Pagdayawa an Ginoo, uran ug tun-og; kantaha an pagdayaw ha iya ngan pagpasidunggi hiya ha kadayonan.

⁴³Pagdayawa an Ginoo, ngatanan nga kahanginan; kantaha an pagdayaw ha iya ngan pagpasidunggi hiya ha kadayonan.

⁴⁴Pagdayawa an Ginoo, kalayo ug kapaso; kantaha an pagdayaw ha iya ngan pagpasidunggi hiya ha kadayonan.

⁴⁵Pagdayawa an Ginoo, nakakapakadal nga kahagkot ngan nakakasunog nga kapaso; kantaha an pagdayaw ha iya ngan pagpasidunggi hiya ha kadayonan.

⁴⁶Pagdayawa an Ginoo, mga tun-og ngan mga yamog; kantaha an pagdayaw ha iya ngan pagpasidunggi hiya ha kadayonan.

⁴⁷Pagdayawa an Ginoo, mga gab-i ngan mga adlaw; kantaha an pagdayaw ha iya ngan pagpasidunggi hiya ha kadayonan.

⁴⁸Pagdayawa an Ginoo, mapawa nga adlaw ngan kasisidman; kantaha an pagdayaw ha iya ngan pagpasidunggi hiya ha kadayonan.

⁴⁹Pagdayawa an Ginoo, yelo ngan kahagkot; kantaha an pagdayaw ha iya ngan pagpasidunggi hiya ha kadayonan.

⁵⁰Pagdayawa an Ginoo, bagtik nga uran ngan yelo; kantaha an pagdayaw ha iya ngan pagpasidunggi hiya ha kadayonan.

⁵¹Pagdayawa an Ginoo, kikidlat ngan ibaragyo nga mga dampog, kantaha an pagdayaw ha iya ngan pagpasidunggi hiya ha kadayonan.

⁵²“Magdayaw han Ginoo an tuna; kantaha an pagdayaw ha iya ngan pagpasidunggi hiya ha kadayonan.

⁵³Pagdayawa an Ginoo, kabukiran ngan mga kapungtoran kantaha an pagdayaw ha iya ngan pagpasidunggi hiya ha kadayonan.

⁵⁴Pagdayawa an Ginoo, tagsa nga butang nga natubo; kantaha an pagdayaw ha iya ngan pagpasidunggi hiya ha kadayonan.

⁵⁵Pagdayawa an Ginoo, mga lanaw ngan mga salog; kantaha an pagdayaw ha iya ngan pagpasidunggi hiya ha kadayonan.

⁵⁶Pagdayawa an Ginoo, mga burabod hin tubig; kantaha an pagdayaw ha iya ngan pagpasidunggi hiya ha kadayonan.

⁵⁷Pagdayawa an Ginoo, mga balyena ngan mga binuhat ha dagat; kantaha an pagdayaw ha iya ngan pagpasidunggi hiya ha kadayonan.

⁵⁸Pagdayawa an Ginoo, ngatanan nga katamsihan; kantaha an pagdayaw ha iya ngan pagpasidunggi hiya ha kadayonan.

⁵⁹Pagdayawa an Ginoo, ngatanan nga kabakahan ngan ihalas nga kamanampan; kantaha an pagdayaw ha iya ngan pagpasidunggi hiya ha kadayonan.

⁶⁰“Pagdayawa an Ginoo, ngatanan nga mga tawo ha tuna; kantaha an pagdayaw ha iya ngan pagpasidunggi hiya ha kadayonan.

⁶¹Pagdayawa an Ginoo, mga tawo han Israel; kantaha an pagdayaw ha iya ngan pagpasidunggi hiya ha kadayonan.

⁶²Pagdayawa an Ginoo, kapadian han Ginoo; kantaha an pagdayaw ha iya ngan pagpasidunggi hiya ha kadayonan.

⁶³Pagdayawa an Ginoo, mga surugoon han Ginoo; kantaha an pagdayaw ha iya ngan pagpasidunggi hiya ha kadayonan.

⁶⁴Pagdayawa an Ginoo, ngatanan nga matinumanon nga mga tawo; kantaha an pagdayaw ha iya ngan pagpasidunggi hiya ha kadayonan.

⁶⁵Pagdayawa an Ginoo, ngatanan nga mapinaubsanon ngan baraan nga mga tawo; kantaha an pagdayaw ha iya ngan pagpasidunggi hiya ha kadayonan.

⁶⁶Pagdayawa an Ginoo, Ananias, Azarias, ug Misael; kantaha an pagdayaw ha iya ngan pagpasidunggi hiya ha kadayonan. Ginbawi kita niya ha tuna han mga minatay ngan gintalwas kita ha gahom han kamatayon. Iginggawas kita niya ha naglalahinggab nga hudno ngan gintalwas kita ha kalayo.

⁶⁷Paghatag hin mga pagpasalamat ngadto han Ginoo, kay maupay hiya ngan nagpapadayon an iya pagkalooy.

⁶⁸Pagdayawa an Ginoo, ngatanan nga nagsisingba ha iya; pagkanta hin pagdayaw han Dyos han mga kadiyosan ngan paghatag ha iya hin mga pagpasalamat, kay nagpapadayon an iya pagkalooy.”