Read Waray Samarenyo Meaning Based Susana 1 Bible Online

Susana 1 - Waray Samarenyo Meaning Based bible

Susana 1

¹May-ada hadto usa ka tawo nga ginngaranan nga Joakim nga nag-ukoy didto ha Babilonia,

²nga nakaasawa kan Susana nga anak ni Hilkias. Mahusay nga babaye hi Susana ngan mainampoon gud hiya.

³Masingbahon nga mga Judiyo an iya mga kag-anak nga nagpatubo han ira anak hin pag-ukoy hin kinabuhi sumala han Balaod ni Moises.

⁴Riko kaupay hi Joakim nga iya bana. Libot an iya balay hin mga tanaman, ngan agsob magkaurosa didto an iba nga mga Judiyo para hin mga katirok, kay hinangad hiya nira ngatanan.

⁵Napakadto liwat han balay ni Joakim an tagsa ka tawo nga may iginpapasaka nga sumbong kay may-ada didto hukmanan hin duha nga mga maghurukom. Bag-o pala nga gintudlok ini nga mga pangulo han bungto han mga Judiyo. Amo ini hira an hinnanabihan han pagsiring han Ginoo, “May-ada pagkamaraot didto ha Babilonia; diri na nagtututdo hin maupay han mga tawo an mga maghurukom.”

⁶

⁷Kada udto kon nagawas an mga tawo para hin paningudto, dayuday hi Susana nagsusudoy didto han mga tanaman.

⁸Hinusayan ha iya hin duro an duha nga mga maghurukom; naghulat hira ngan nag-inaw ha iya didto han tanaman.

⁹Uraura gud an ira kaipa ha iya nga waray na hira gana hin pag-ampo ngan hin pagtuman han ira katungdanan hin kamaghurukom.

¹⁰Hira nga duha may-ada gud pagkaruyag kan Susana, kundi waray ha ira may nagahom hin pagsumat han iya binabati,

¹¹kay naawod an kada usa hin pagpasabot han iya binabati.

¹²Sanglit kada adlaw nagbabantay hira hin pag-ikinikitaan ha iya.

¹³Usa ka adlaw han udto na may hinsiring ha ira, “Oras na hin paningudto; panguli kita.”

¹⁴Sanglit nagkalakat hira nga duha ngan nagbulag hira hin dalan, kundi binmalik dayon hira nga duha hin pag-ikinikitaan kan Susana, ngan ha diri tinuyo, nagkita hira nga duha. Ha syahan nira nag pagkita, an kada usa nagtalinguha hin paglirong han iya karuyag buhaton didto, kundi ha kataposan nagtug-anay hira han ira pareho nga ungara kan Susana. Nagkasabot hira hin pagbantay hin usa ka higayon nga mag-uusaan la hi Susana.

¹⁵Sanglit naghinulat hira han igo nga higayon. Usa ka adlaw kinmadto han tanaman hi Susana sugad han iya hin-araan upod in duha niya nga mga surugoon nga kababayen-an. Waray gud iba nga mga tawo didto labot han duha nga mga maghurukom nga tinmago ngan nag-inaw kan Susana. Mapaso hin duro adto nga adlaw ngan nakahunahuna hi Susana hin pagkarigo. Sanglit ginsiring niya an iya mga surugoon, “Dad-i ako hin gutiay nga lana ngan hin pahamot, ngan trangkahi an mga sada han aragian, basi waray magsamok ha akon.”

¹⁶

¹⁷

¹⁸Gintrangkahan han mga surugoon an mga sada han dagko nga mga aragian ngan ginmawas hira pinaagi han porta ha ligid hin pagkuha han mga gin-aro ni Susana. Waray nira hikit-i an duha ka tawo.

¹⁹Han paghilakat la han mga surugoon, nagkagawas dayon an duha nga mga maghurukom tikang ha ira gintagoan, nagdadlagan ngadto kan Susana

²⁰ngan nagsiring ha iya, “Trinangkahan an mga sada han aragian ngan waray makakakita ha aton. Natutukso kami yana hin pakighilawas ha imo, sanglit tugoti kami han amon karuyag.

²¹Kon dumiri ka, igsusumbong ka namon ngan magsusumpa kami nga kinmita gud kami han pagpalakta nimo han imo mga surugoon, basi mag-usaan ka dinhe upod in usa nga batan-on nga lalake.”

²²“Waray ako mahihimo,” nangaraba hi Susana. “Kon itubyan ko inin akon lawas ha iyo, mahihimo patayon ako tungod hin panlibog. Kon dumiri ako, diri la gihapon ako bubuhian niyo.

²³Kundi gabay pa ako maunong nga waray sala kay hin makasala ako kontra han Ginoo.”

²⁴Sanglit nagtikang hiya hin pagginoliat hin dako nga tingog tubtob han mahimo niya, ngan nagtikang liwat an duha nga maghurukom hin paggoliat hin mga pagsumbong kontra ha iya,

²⁵samtang nagdalagan an usa ha ira hin pag-abre han sada han mga ganghaan.

²⁶Han pakabati la han mga surugoon didto han balay han ngatanan nga aringasa, nagdadlagan hira ngadto han tanaman pinaagi han porta ha hin panginano kon ano an nahinabo kan Susana.

²⁷Nagsumat an mga maghurukom bahin han ira hinkit-an, ngan nahipausa ngan nahikaawod an mga surugoon. Waray pa gud mahisumat in sugad nga butang mahitungod kan Susana.

²⁸Han pagkabuwas, han pagkatirok han mga tawo didto han balay ni Joakim, nagkaabot an duha nga mga maghurukom nga tuyo gud nira hin pagtuman han ira yawan-on nga tinguha hin pagpapatay kan Susana.

²⁹Ha atubangan han ngatanan nga mga tawo nagsiring hira, “Dad-a ngadi an kan Joakim asawa nga hi Susana nga anak ni Hilkias.” Han pagtawaga na ha iya,

³⁰sinmulod hiya upod an iya mga kag-anak, an iya mga anak, ngan an ngatanan nga iya kauropdan.

³¹Matahom ngan mahusay hin duro hi Susana

³²nga nagsugo an duha nga magraot nga mga tawo nga hukasan an iya bilo, basi makapahimulos hira hin pagkinita ha iya.

³³Nagpipinanuok an iya panimalay ngan an iba nga mga tawo.

³⁴Niyan tinmindog an duha nga mga maghurukom ha atubangan han mga tawo, iginpandong an ira mga kamot dida han ulo ni Susana, ngan nagtikang hin paghimo han ira mga sumbong kontra ha iya.

³⁵Nagtinuok hi Susana, kundi hinmangad hiya ha langit kay nasarig hiya han Ginoo.

³⁶Naghatag an duha nga tawo hinin masunod nga ira sumbong: “Naglalakat kami didto han mga tanaman han pag-abot hini nga babaye upod in duha niya nga mga surugoon nga kababayen-an. Iya gintrangkahan an duha nga dagko nga mga sada han mga ganghaan ngan iya ginpagawas an mga surugoon.

³⁷Niyan dinmaop ha iya in usa nga batan-on nga lalake nga natago didto han mga tanaman, ngan nagdirig hira nga duha.

³⁸Nakadto kami hin usa nga kanto han mga tanaman, ngan han paghikit-i namon ha ira, nagdalagan kami ngadto ha ira

³⁹ngan amon hira hin-abtan nga nagbubuhat pa hira. Amon gintalinguha hin pagtalo an lalake, kundi makusog hiya para ha amon. Dinmalagan hiya ngan ginbuksan an mga sada han mga ganghaan ngan nakapalagiw hiya,

⁴⁰kundi hinkaptan namon an babaye. Amon hiya ginpakianhan kon hin-o adto nga lalake, kundi waray hiya magsumat ha amon. Nagsusumpa kami nga matuod an amon sumbong.”

⁴¹Tungod kay an duha ka tawo diri la mga pangulo han bungto kundi mga maghurukom liwat, tinmuod an mga tawo han ira sumat, ngan ginhukman hi Susana nga patayon.

⁴²Niyan naggoliat hi Susana ha dako nga tingog, “O Waray Katapusan nga Dyos, waray gud natatago ha imo; imo hinbabaroan an tagsa nga mga butang nga diri pa ini nahinanabo.

⁴³Iini ako nga papatayon na, kundi maaram ka nga waray ako sala, ngan nagbinuwa la ini nga mga tawo. Kay ano nga kinahanglan ako mamatay.”

⁴⁴Hinbatian han Ginoo an iya pag-ampo

⁴⁵ngan ginmandoan niya in usa nga batan-on nga ginngaranan nga Daniel hin paghimangraw, hito nga takna nga gindadara na hi Susana hin pagpatay.

⁴⁶Ginmoliat hi Daniel, “Diri ako buot nga mamaylabot ako han iya kamatayon!”

⁴⁷Nanlingi an ngatanan kan Daniel ngan nagpakiana, “Hiunong hin ano an imo iginhihimangraw?”

⁴⁸Tinmindog hi Daniel ha atubangan nira ngan nagsiring, “Mga tawo han Israel, nalulurong ba kamo? Iyo ba pagsisirotan hin kamatayon in usa nga Israelita nga babaye pinaagi hin sugad la hini nga pagpamatuod? Waray ngani kamo magtalinguha hin pagpangita han kamatuoran.

⁴⁹Liwata an pagsusi, kay buwa an sumbong nga iginhatag hini nga mga tawo.”

⁵⁰Sanglit nagdagmit an ngatanan nga mga tawo hin pagbalik ngadto han hukmanan, ngan nagsiring an mga opisyal kan Daniel, “Gintagan ka han Dyos hin kinaadman nga labaw han imo panuigon, sanglit kadi ngan tampo ha amon ngan igsaysay ha amon an karuyag mo sidngon.”

⁵¹Nagsiring ha ira hi Daniel, “Pagbulaga an duha nga mga maghurukom ngan tugoti ako hin pagpakiana ha ira hin tinag-usa.”

⁵²Niyan gintawag ni Daniel an syahan nga maghurukom ngan ginsiring hiya, “Ikaw nga yawan-on nga tigurang, pagbabaydan mo yana an ngatanan nga mga sala nga imo ginbuhat.

⁵³Naghatag ka hin diri magtadong nga mga paghukom. Imo ginsirotan an waray sala ngan ginbuhian an salaan, bisan kon nagsiring an Ginoo, ‘Ayaw igpapatay an waray sala nga tawo.’

⁵⁴Yana kon tinuod nga hinkit-an mo hira nga naghihilawas, pagsumati ako, ha sirong hin ano nga kahoy an ira ginbuhatan hini?” Binmaton hiya, “Ha sirong hin usa nga gutiay nga kahoy nga guma.”

⁵⁵Nagsiring hi Daniel, “Maupay! Pagbabaydan mo han imo kinabuhi ito nga buwa. Ginsugo na an anghel han Dyos hin pagtiak[1] ha imo.”

⁵⁶Niyan ginpagawas an syahan nga maghurukom ngan ginpaatubang kan Daniel an ikaduha. Nagsiring ha iya hi Daniel, “Mas alid-agid ka hin usa nga Canaanhon kay hin usa nga Judiyo. Ginlubag an imo paghukom tungod han kahusay hini nga babaye ngan an mahilas nga kaipahon amo an nakadaot han imo panhunahuna.

⁵⁷Nahiara ka hin pagpahimulos han Israelita nga kababayen-an kay nahadlok hira ha imo, ngan yana iini in usa nga Judiyo nga babaye nga waray tumubyan ha imo.

⁵⁸Yana, pagsumati ako, ha sirong hin ano nga kahoy nga imo hinkit-an hira?” Binmaton hiya, “Ha sirong hin usa nga dako nga kahoy nga tuog.”

⁵⁹Nagsiring hi Daniel, “Maupay! Pagbabaydan mo han imo kinabuhi ito nga buwa; naghuhulat na an anghel han Dyos, nga nakakakapot han iya espada nga andam hin pagpikas[2] ha imo. Niyan pupuohon kamo nga duha.”

⁶⁰Niyan naggogliat an ngatanan nga mga tawo ngan nagdayaw hira han Dyos nga nagtatalwas hadton mga nasarig ha iya.

⁶¹Ira ginkontra an duha nga mga maghurukom kay ginpamatud-an ni Daniel nga nagsumpa hira hin buwa.

⁶²Nagsiring an Balaod ni Moises nga makarawat an mga tawo nga nahatag hin buwa nga sumbong han amo ngahaw nga kastigo nga kakarawaton unta han iginsumbong nga tawo. Sanglit ginpatay an duha nga mga maghurukom, ngan natalwas an kinabuhi hin usa nga waray sala nga babaye.

⁶³Nagdayaw han Dyos an mga kag-anak ni Susana, an iya bana, ngan an ngatanan niya nga kauropdan kay ginpamatud-an nga waray hiya sala han mga sumbong ha ira.

⁶⁴Tikang hadto nga takna, ira na gud gintahod hi Daniel.