Read Waray Samarenyo Meaning Based Ezequiel 1 Bible Online

Ezequiel 1 - Waray Samarenyo Meaning Based bible

Ezequiel 1

¹Dida han ikalima nga adlaw han ikaupat nga bulan han ika-30 ka tuig,[1] nag-uokoy ako, hi Ezequiel nga padi, nga anak ni Busi, tampo han mga bihag nga mga Judiyo ha ligid han Salog Quebar didto ha Babilonia. Nabuksan an langit ngan hinkit-an ko in usa nga panan-awon han Dyos. (

²Ikalima adto ka tuig tikang mabihag hi Hadi Joaquin.)

³Didto ha Babilonia, ha ligid han Salog Quebar, hinbatian ko an GINOO nga nakighimangraw ha akon ngan inmabat ako han iya gahom.

⁴Hinmangad ako ngan hinkit-an ko in usa nga alipuros tikang ha amihanan. Nagkinidlat tikang hin madakmol nga dampog, ngan nalamragan an bug-os nga kalangitan. Dida han dapit nga ginawsan han kikidlat, may nasilaw nga sugad hin bronse.

⁵Dida ha butnga han alipuros, ginmawas in sugad hin upat nga buhi nga mga binuhat nga dagway hin tawo pagkit-on,

⁶kundi an kada usa ha ira may tag upat nga mga bayhon ngan tag upat nga mga pako.

⁷Magtadong an ira mga bitiis ngan may nira mga kulo nga sugad hin kanan baka, nasilaw ini sugad hin pinainggat nga bronse.

⁸Labot han ira tag upat nga mga bayhon ngan tag upat nga mga pako, may liwat hira tag upat nga mga kamot hin tawo, usa ha ilarom han kada pako.

⁹Binubuklad an duha nga mga pako han kada binuhat, nga naghihiabot an magkasi kataposan han ira mga pako sanglit kwadrado an porma han mga binuhat. Kon nalupad hira, nagkikiwa hira sugad hin usa nga hugpo, nga waray nira lingilingi.

¹⁰An kada buhi nga binuhat may tag upat nga magkalainlain nga mga bayhon: ha atubangan, bayhon hin tawo; ha tuo, bayhon hin liyon; ha wala, bayhon hin baka; ngan ha talikoran, bayhon hin agila.

¹¹Inaalsa an duha nga mga pako[2] han kada binuhat, sanglit dinadapatan an magkasi kataposan han mga pako han mga binuhat nga sapit hini, ngan itinatahob han ira mga lawas an duha pa nira nga mga pako.

¹²Naatubang an tagsa nga binuhat han upat nga dapit han hangin, sanglit napakadto an hugpo ha bisan ngain nga ira karuyag, nga waray nira lingilingi.

¹³Dida[3] han mga binuhat, may-ada sugad hin naglalaga nga sulo pagkit-on nga nagkikiniwa. Naulyap tipaigbaw an kalayo ngan nagkikinidlat.

¹⁴Nagbabalikbalik an mga binuhat ngan sugad hin kikidlat hin kamalaksi.

¹⁵Samtang nakada pa an upat nga mga binuhat, hinkit-an ko in upat nga mga kaliding nga nadapat ha tuna, usa ha ligid han kada usa hini.[4]

¹⁶Waray kalainan an upat nga mga kaliding; nasilaw an kada usa sugad hin mahal nga bato, ngan an kada usa nga kaliding may sulod nga usa nga kaliding,

¹⁷sanglit nakakahimo hin pagkaliding ha bisan ngain nga dapit.

¹⁸Lukop hin mga mata an mga yanta han mga kaliding.[5]

¹⁹Kon nagkikiwa an mga binuhat, nagkikiwa man an mga kaliding upod ha ira, ngan kon natukal ha tuna an mga binuhat, natukal man an mga kaliding.

²⁰Kon napakadto an mga binuhat ha bisan ngain nga ira karuyag, napakadto man liwat an mga kaliding kay aada han mga kaliding an gahom han mga binuhat.

²¹Sanglit kada pagkikiwa han mga binuhat, o pag-uokoy, o pagtutukal ha tuna, amo man an ginbubuhat han mga kaliding.

²²Ha igbaw han mga ulo han mga binuhat may-ada sugad hin lukob nga atop pagkit-on nga hinimo hin masinaw nga salaming.

²³Didto ha ilarom han atop natindog an mga binuhat, nga binubuklad han kada usa in duha nga mga pako tipakadto han sunod hini, ngan itinatahob han iya lawas an duha pa nga mga pako.

²⁴Hinbatian ko an aringasa han ira mga pako ha ira paglupad; sugad ini han dinaguhob han dagat, sugad han aringasa hin damo nga kasondalohan, sugad han tingog han Dyos nga Labi Kamakagarahum. Kon diri hira nalupad, ira kinikidyom an ira mga pako,

²⁵kundi may-ada pa tunog nga natikang han atop ha igbaw han ira mga ulo.

²⁶Ha igbaw han atop may-ada sugad hin trono nga sapiro pagkit-on, ngan may-ada sugad hin tawo pagkit-on nga nalingkod dida han trono.

²⁷Daw nasilaw hiya sugad hin bronse dida ha butnga hin usa nga kalayo. Nalulukop ini hin kasilaw pinaagi hin malamrag nga kapawa

²⁸nga sugad han pagpakita han balangaw ha langit kahuman hin uran. Amo ini an mabislaw nga kapawa han himaya han GINOO.