Read Waray Samarenyo Meaning Based Ezequiel 10 Bible Online

Ezequiel 10 - Waray Samarenyo Meaning Based bible

Ezequiel 10

¹Tinman-aw ako ngadto han lukob nga atop ha igbaw han mga ulo han buhi nga mga binuhat,[19] ngan ha igbaw nira may-ada butang nga daw sugad hin trono nga sapiro.

²Ginsiring han Dyos an tawo nga nakakabado hin lino, “Pabutnga han mga kaliding ha ilarom han mga binuhat, ngan pun-a hin mga baga an imo mga kamot. Niyan ipasarang an mga baga ha igbaw han syudad.” Ginkinitaan ko hiya han iya paglakat.

³Naninindog an mga binuhat didto ha timogan han Templo han pagsulod niya, ngan ginpuno hin dampog an sarusakob nga bungsaran.

⁴Inmigbaw an mabislaw nga kapawa han himaya han GINOO tikang han mga binuhat ngan binmalhin ngadto han aragian han Templo. Niyan ginpuno han dampog an Templo, ngan naglamrag han kapawa an bungsaran.

⁵Hinbatian an aringasa han mga pako han mga binuhat bisan didto han gawas nga bungsaran. Sugad ini han tingog han Dyos nga Labi Kamakagarahum.

⁶Han pagsugoa han GINOO han tawo nga nakakabado hin lino nga kuhaon niya an kalayo tikang ha butnga han mga kaliding nga nakada ha ilarom han mga binuhat, sinmulod an tawo ngan tinmindog ha sapit han usa han mga kaliding.

⁷Ikinadto han usa han mga binuhat an kalayo nga nakada ha butnga nira, pinmurot ini hin mga baga, ngan iginbutang ini dida han mga kamot han tawo nga nakakabado hin lino. Kinarawat han tawo an mga baga ngan linmakat hiya.

⁸Hinkit-an ko an kada binuhat nga may sugad hin kamot hin tawo pagkit-on ha ilarom han kada pako hini.

⁹Hinkit-an ko liwat nga may-ada upat nga mga kaliding nga parapreho ngatanan, usa nga kaliding sapit han kada binuhat. Nasilaw an mga kaliding sugad hin mahal nga mga bato, ngan may sulod liwat nga lain nga kaliding an kada usa.

¹¹Kon nagkikiwa an mga binuhat, naupod liwat an mga kaliding hin waray paglingilingi. Nagbuburunyog hira ngatanan bisan ngain an ira karuyag kadtoan ngan diri na kinahanglan maglingilingi.

¹²Luob hin mga mata an ira mga lawas, mga bungkog, mga kamot, mga pako, ngan mga kaliding.

¹³Amo manta ini nga mga kaliding an akon hinkit-an didto han akon syahan nga panan-awon.

¹⁴May upat nga mga bayhon an tagsa nga binuhat. Bayhon hin baka an syahan, bayhon hin tawo an ikaduha, bayhon hin liyon an ikatulo, ngan bayhon hin agila an ikaupat.

¹⁵(Amo gihapon ini nga mga binuhat an hinkit-an ko didto ha ligid han Salog Quebar.) Kon napaigbaw an mga binuhat

¹⁶ngan nagkikiwa, bunyog gihapon ha ira an mga kaliding.

¹⁷Kon nahunong an mga binuhat, nahunong liwat an mga kaliding, kay an gahom han mga binuhat nakada han mga kaliding.

¹⁸Niyan binmaya han aragian han Templo an mabislaw nga kapawa han himaya han GINOO ngan binmalhin ngadto hin dapit ha igbaw han mga binuhat.

¹⁹Ginbuklad nira an ira mga pako ngan linmupad tipaigbaw tikang ha tuna samtang nagkikita ako, ngan binmunyog ha ira an mga kaliding. Hinmunong hira didto han sinirangan nga ganghaan han Templo, ngan pinmaigbaw ha ira an mabislaw nga kapawa.

²⁰Kinilala ko hira sugad nga amo ngahaw nga mga binuhat nga hinkit-an ko ha ilarom han Dyos han Israel didto han Salog Quebar.

²¹An kada usa ha ira may upat nga mga bayhon ngan upat nga mga pako, ngan may sugad hin kamot hin tawo pagkit-on ha ilarom han kada pako.

²²An ira mga bayhon sugad gud han mga bayhon[20] nga hinkit-an ko didto ha ligid han Salog Quebar. Natadong pagkiwa tipaunhan an tagsa nga binuhat.