Read Waray Samarenyo Meaning Based Ezequiel 14 Bible Online

Ezequiel 14 - Waray Samarenyo Meaning Based bible

Ezequiel 14

¹Inmabot in pipira han mga pangulo han mga Israelita hin pagpakiana ha akon mahitungod han kaburot-on han GINOO.

²Niyan naghimangraw ha akon an GINOO.

³Nagsiring hiya, “Anak hin tawo, igintubyan hini nga mga tawo ngadto hin mga diyosdiyos an ira mga kasingkasing ngan tinutugotan nira an mga diyosdiyos hin pagmando ha ira ngadto hin pagpakasala. Ano an ira pakasiring nga mabaton ako ha ira?

⁴“Yana paghimangrawi ngan sumati hira han igyayakan ha ira nakon, an Ginoo nga DYOS: An tagsa nga Israelita nga naghatag han iya kasingkasing ngadto hin mga diyosdiyos ngan natugot hini hin pagmando ha iya ngadto hin pakasala, ngan katapos napakadto hin pagpakiana hin usa nga manaragna, makarawat hira hin baton tikang ha akon—an baton nga angay han damo nga mga diyosdiyos niya!

⁵Tinmalikod na ha akon an mga Israelita pinaagi han ngatanan nga mga diyosdiyos kundi pinaagi han akon baton, naglalaom ako nga mahibabalik an ira kamatinumanon ha akon.

⁶“Sanglit yana, sumati an mga Israelita han igyayakan nakon, an Ginoo nga DYOS: Balik kamo ngan bayai an iyo magpakapupungot nga mga diyosdiyos.

⁷“Kon natalikod ha akon in usa han mga Israelita o usa han mga lumalangyaw nga nag-uokoy didto han Israelita nga bungto ngan nagsisingba hin mga diyosdiyos, ngan unina napakadto hin pagpakiana hin usa nga manaragna, ako, an GINOO, an mabaton ha iya!

⁸Susupakon ko hiya! Hihimoon ko hiya nga pananglitan. Kukuhaon ko hiya tikang han bungto han akon mga tawo, basi kumilala kamo nga ako amo an GINOO.

⁹“Kon nalimbongan in usa nga manaragna ngadto hin paghatag hin diri matuod nga baton, tungod ini nga ako nga GINOO amo an naglimbong ha iya. Pupuohon ko hiya tikang han mga tawo han Israel.

¹⁰Makarawat hin sugad nga kastigo an manaragna ngan an nagpapakiana ha iya.

¹¹Pagbubuhaton ko ini basi diri bumaya ha akon an mga Israelita ngan diri hira maghugaw han ira mga kalugaringon pinaagi han ira mga sala. Magigin akon mga tawo hira ngan magigin Dyos ako nira.” An Ginoo nga DYOS an nagyakan.

¹²Naghimangraw ha akon an GINOO.

¹³Nagsiring hiya, “Anak hin tawo, kon makasala in usa nga nasod ngan diri na magmatinumanon ha akon, uunaton ko an akon kamot ngan bubungkagon ko an kinukuhaan hin pagkaon hini. Magpapadara ako hin gutom ngan pamamatayon ko an mga tawo ngan mga mananap.

¹⁴Bisan kon didto pag-ukoy adto nga tulo nga mga tawo, hira Noe, Danel[24] ug Job, an ira pagkamaupay matatalwas han ira la kalugaringon nga mga kinabuhi.” An Ginoo nga DYOS an nagyakan.

¹⁵“O bangin magpadara ako hin magpintas nga kamanampan hin pagpatay han mga tawo, nga makakahimo han tuna nga makaharadlok paglaktan nga waray tawo nga magpapasipara hin paglatas hini,

¹⁶ngan bisan kon nag-ukoy didto adto nga tulo nga mga tawo—sugad nga ako, an Ginoo nga DYOS, amo an buhi nga Dyos—diri gud hira makakatalwas bisan pa han ira kalugaringon nga mga anak. Matatalwas nira an ira kalugaringon nga mga kinabuhi, ngan mahihimo nga kamingawan an tuna.

¹⁷“O bangin magdara ako hin araway ngada hito nga nasod ngan magpadara ako hin makamaratay nga mga hinganiban hin pagpuo han mga tawo ngan mga mananap,

¹⁸ngan bisan kon nag-ukoy didto adto nga tulo nga mga tawo—sugad nga ako, an Ginoo nga DYOS, amo an buhi nga Dyos—diri gud hira makakatalwas bisan pa han ira mga anak, kundi han ira la kalugaringon nga mga kinabuhi.

¹⁹“Kon magpadara ako hin mga sakit ngada hito nga nasod, ngan ha akon kapungot kuhaon ko in damo nga mga kinabuhi, nga manmatay ako hin mga tawo ngan mga mananap,

²⁰bisan kon nag-ukoy didto hira Noe, Danel, ug Job—sugad nga ako, an Ginoo nga DYOS, amo an buhi nga Dyos—diri gud hira makakatalwas bisan pa han ira kalugaringon nga mga anak. An ira pagkamaupay makakatalwas han ira la kalugaringon nga mga kinabuhi.”

²¹Amo ini an igyayakan han Ginoo nga DYOS: “Igpapadara ko ngada ha Jerusalem an akon upat nga dagko nga mga kastigo—araway, gutom, magpintas nga kamanampan, ug mga sakit—hin pagpuo hin mga tawo ngan mga mananap.

²²Kon may mahisalin man nga buhi ngan magtalwas han iya mga anak, tan-awa hira kon kumada hira ha imo. Kitaa an ira pagkamaraot, ngan pagmatuod nga matadong an kastigo ngan akon gindadara dida ha Jerusalem;

²³ngan mahibabaroan mo nga may maupay nga pangatadongan an ngatanan nga akon ginbuhat.” An Ginoo nga DYOS an nagyakan.