Read Waray Samarenyo Meaning Based Ezequiel 2 Bible Online

Ezequiel 2 - Waray Samarenyo Meaning Based bible

Ezequiel 2

¹Han paghikit-i ko hini, hinmapa ako ha tuna. Niyan hinbatian ko in tingog nga nasiring, “Anak hin tawo, tindog. Makikighimangraw ako ha imo.”

²Han nagyayakan pa an tingog, sinmulod ha akon an espiritu han Dyos ngan ginpatukdaw ako, ngan hinbatian ko an tingog nga nagpadayon hin pagsiring,

³“Anak hin tawo, sinusugo ko ikaw ngadto han mga tawo han Israel. Sinmupil ngan binmaya hira ha akon, ngan masupilon pa gihapon hira sugad gud han ira kaapoy-apoyan.

⁴Magtig-a an ira mga ulo ngan diri hira natahod ha akon, sanglit ginsusugo ko ikaw hin pagsumat ha ira nga ako nga Ginoo nga DYOS an nagyayakan ha ira.

⁵Mamati ha imo o diri hira nga mga masupilon, makakasabot hira nga nakada tampo ha ira in usa nga manaragna.

⁶“Kundi ikaw, anak hin tawo, kinahanglan diri ka mahadlok ha ira o hin bisan ano nga ira igyayakan. Aatohan ngan pagtatamayon ka nira; masusugad ini hin pag-ukoy ha butnga hin mga bungad. Ayaw gihapon kahadlok hito nga mga masupilon o hin bisan ano nga ira igyayakan.

⁷Pagsusumatan mo hira han bisan ano nga igsusumat ko ha imo hin pagyakan, mamati hira o diri. Hinumdomi nga mga masupilon gud hira.

⁸“Anak hin tawo, pamatii an akon igsisiring ha imo. Ayaw pagmasupilon sugad ha ira. Abrehe an imo baba ngan kaona an akon ihahatag ha imo.”

⁹Hinkit-an ko in kamot nga gin-unat ngadi ha akon, ngan nakapot ini hin usa nga linikid nga basahan.

¹⁰Ginbuklad han kamot an linikid nga basahan, ngan hinkit-an ko nga sinuratan ini paluyoluyo—mga pagtangis hin kabidoan, mga pagnguyngoy, ngan mga pag-araba an iginsurat dida hini.