Read Waray Samarenyo Meaning Based Ezequiel 24 Bible Online

Ezequiel 24 - Waray Samarenyo Meaning Based bible

Ezequiel 24

¹Dida han ikanapulo ka adlaw han ikanapulo ka bulan han ikasiyam ka tuig han amon pagkabihag, naghimangraw ha akon an GINOO.

²Nagsiring hiya, “Anak hin tawo, isurat an pitsa yana nga adlaw, kay amo ini nga adlaw nga nagtikang an hadi han Babilonia hin pagsulong han Jerusalem.

³Sumati an akon masupilon nga mga tawo hini nga pananglitan nga tikang ha akon, an Ginoo nga DYOS: Isun-ad an kaldero dida han kalayo ngan pun-a ini hin tubig.

⁴Butangi han gimamag-upayi nga mga pedaso hin karne— an mga sugbong ngan an mga paa— ngan han pinili nga mga tul-anon nga mga pedaso.

⁵Gamita an karne han gimama-upayi nga karnero; tambaka an sungo[53] ha ilarom han kaldero. Pakaladkara an tubig; lagaa an mga tul-an ngan an unod.”

⁶Amo ini an igyayakan han Ginoo nga DYOS: “Maghihikaraot an syudad hin mga parapamatay! Sugad ini hin taoyon nga kaldero nga diri gud gin-aarisan. Gintatag-usausa paghukad an kada pedaso nga karne, ngan waray gud isinasalin.

⁷May-ada panmatay didto han syudad, kundi waray ihuwad an dugo ngada han tuna diin katatahoban ini han tapotapo; kundi iginhuwad ini ngada hin bato.

⁸Ginpabay-an ko an dugo dida han bato, diin diri ini matatago, ngan nagkikinahanglan ini hin nasisina nga pagbulos.”

⁹Amo ini an igyayakan han Ginoo nga DYOS: “Maghihikaraot an syudad hin mga parapamatay! Ako ngahaw an magtatambak han sungo.

¹⁰Dugangi pa hin sungo! Palagaha hin maupay! Lutoa an karne! Pahubsa an sabaw![54] Tubora an mga tul-an!

¹¹Yana ikada an waray sulod nga bronse nga kaldero ha bawbaw han mga baga, ngan banggaha ini. Niyan magmamalinis na liwat an kaldero sumala han seremonyas kahuman masunog an mga taoy,

¹²bisan kon diri mauubos kawara dida han kalayo an mga taoy.[55]

¹³Jerusalem, nahugawan ka han imo maglaw-ay nga mga binuhatan. Nagpabilin ka nga mahugaw bisan kon gintinguha ko hin paglinis ha imo. Diri ka na magmamalinis liwat tubtob han pag-abata mo han bug-os nga kusog han akon kapungot.

¹⁴Ako nga GINOO an nagyakan. Inmabot na an panahon han akon paggios. Diri ko pababay-an an imo mga sala o diri ako mapaid o malolooy. Pagkakastigohon ka tungod han imo ginbuhat.” An Ginoo nga DYOS an nagyakan.

¹⁵Naghimangraw ha akon an GINOO.

¹⁶Nagsiring hiya, “Anak hin tawo, pinaagi hin usa nga paghampak kukuhaon ko an tawo nga imo hinihigugma labaw han ngatanan. Diri ka magngungurutob, o magtatangis, o magpapaagay hin luha.

¹⁷Ayaw ipabati an imo pagbakho. Ayaw paglakat nga waray pandong o sandalyas sugad nga tigaman hin pagmabidoon. Ayaw pagtahobi an imo bayhon o pagkaon han kinakaon han mga magsulob-on.”

¹⁸Temprano pa han pagkaaga, nakighimangraw ako han mga tawo. Hito manta nga gab-i namatay an akon asawa, ngan han pagkabuwas gintuman ko an iginsugo ha akon.

¹⁹Ginpakianhan ako han mga tawo, “Kay ano nga nanggagawi ka hin sugad?”

²⁰Sanglit ginsiring ko hira, “Naghimangraw ha akon an GINOO ngan ginsiring ako

²¹hin pagsumat ha iyo nga mga Israelita hini nga mensahe: Naparayaw kamo han kamadig-on han Templo. Naruruyag kamo hin pagtan-aw ngan pagduaw hini, kundi paghuhugawan ini han GINOO. Ngan panmamatayon didto ha pag-awayan an batan-on nga mga sakop han iyo mga panimalay nga mahibilin didto ha Jerusalem.

²²Niyan pagbubuhaton niyo an akon ginbuhat. Diri niyo tatahoban an iyo mga bayhon o kakaonon an kinakaon han mga magsulob-on.

²³Diri kamo malakat nga waray pandong o waray sandalyas, o magmamabidoon, o magtatangis. Manggagasa kamo tungod han iyo mga sala, ngan maghaharoy kamo ngatanan.

²⁴Niyan magigin tigaman ako ngada ha iyo; pagbubuhatoon niyo an ngatanan nga akon ginbuhat. Nasiring an GINOO nga kon mahinabo na ini, makilala kamo nga hiya amo an Ginoo nga DYOS.”

²⁵Nagsiring an GINOO, “Yana, anak hin tawo, kukuhaon ko tikang ha ira an madig-on nga Templo nga amo an ira parayaw ngan kalipay, nga naruyagan nira hin pagtan-aw ngan pagduaw. Ngan kukuhaon ko an ira mga anak nga kalalaken-an ug kababayen-an.

²⁶Dida han adlaw nga pagbuhaton ko na ini, maabot in tawo nga nakalikay han kabungkagan ngan pagsusumatan ka niya hiunong hini.

²⁷Hito manta nga adlaw mahibabalik ha imo an gahom hin pagyakan nga imo nawara, ngan makikighimangraw ka ha iya. Dida hini nga paagi magigin tigaman ka ngadto han mga tawo, ngan makilala hira nga ako amo an GINOO.”