Read Waray Samarenyo Meaning Based Ezequiel 25 Bible Online

Ezequiel 25 - Waray Samarenyo Meaning Based bible

Ezequiel 25

¹Naghimangraw ha akon an GINOO.

²Nagsiring hiya, “Anak hin tawo, isumbong an nasod han Amon.

³Sidnga hira nga mamati han igyayakan ko, an Ginoo nga DYOS: Nalipay kamo hin pagkita nga nahugawan an akon Templo, napukan an tuna han Israel, ngan nabihag an mga tawo han Juda.

⁴Tungod nga nalipay kamo, ipapasakop ko kamo han mga tribo nga tikang ha sinirangan han kamingawan. Magkakampo hira didto han iyo nasod ngan mag-uokoy hira didto. Kakaonon nira an mga bunga ngan iimnon an gatas nga unta iyo ini.

⁵Hihimoon ko nga turil hin mga kamelyo an syudad han Raba, ngan panabsaban hin mga karnero an bug-os nga tuna han Amon, basi kumilala kamo nga ako amo an GINOO.

⁶“Amo ini an igyayakan han Ginoo nga DYOS: Nanmakpak kamo ngan nanlukso hin kalipay. Gintamay niyo an tuna han Israel.

⁷Tungod nga ginbuhat niyo ini, itutubyan ko kamo ngadto hin iba nga mga nasod nga magtitikas ngan mangangawat ha iyo. Pagpupuohon ko kamo basi diri na kamo mahimo nga nasod, o makaangkon hin tuna nga iyo kalugaringon. Niyan makilala kamo nga ako amo an GINOO.”

⁸Nagsiring an Ginoo nga DYOS, “Tungod nga nagsiring an Moab nga sugad la an Juda han iba nga mga nasod,

⁹ipapasulong ko an mga syudad nga nananalipod han pag-ultan han Moab,[56] lakip an labi kamatahom nga mga syudad—an Bet Jesimot, Baal Meon, ug Quiriataim.

¹⁰Ipapasakop ko an Moab han mga tribo han sinirangan nga kamingawan lakip an Amon, basi diri na mahimo nga nasod an Moab.[57]

¹¹Pagkakastigohon ko an Moab, ngan makilala hira nga ako amo an GINOO.”

¹²Nagsiring an Ginoo nga DYOS, “An mga tawo han Edumea binmulos nga makalilisan han Juda, ngan nakadara ini hin waray kataposan nga kasal-anan han Edumea.

¹³Yana iginpapahibaro ko nga pagkakastigohon ko an Edumea ngan pamamatayon ko an ngatanan nga mga tawo ngan mga mananap didto. Hihimoon ko ini nga kamingawan, tikang han syudad han Teman ngadto han syudad han Dedan, ngan pamamatayon hira didto ha pag-awayan.

¹⁴Bubulson an Edumea pinaagi han akon mga tawo nga Israel, ngan paaabaton nira an Edumea han akon mapintas nga kapungot. Mahibabaroan han Edumea an karuyag sidngon han akon pagbulos.” An Ginoo nga DYOS an nagyakan.

¹⁵Nagsiring an Ginoo nga DYOS, “Ginbulos hin mabangis han mga Filisteohanon an ira maiha na gud nga mga kaaway ngan ginpuo hira ha ira kapungot.

¹⁶Sanglit ginpapahibaro ko nga pagsusulongon ko an mga Filisteohanon ngan pagpupuohon ko hira. Pupuohon ko an ngatanan nga nahisalin nga nag-uokoy didto han Filisteohanon nga Kapatagan.

¹⁷Kakastigohon ko hira hin makalilisang ngan bubulson ko hira hin tinuod. Aabaton nira an akon kapungot. Niyan makilala hira nga ako amo an GINOO.”