Read Waray Samarenyo Meaning Based Ezequiel 26 Bible Online

Ezequiel 26 - Waray Samarenyo Meaning Based bible

Ezequiel 26

¹Dida han syahan nga adlaw han ika…nga bulan[58] han ika-11 nga tuig han amon pagkabihag, naghimangraw ha akon an GINOO.

²Nagsiring hiya, “Anak hin tawo, amo ini an iginrarayhak han mga tawo didto han syudad han Tiro. Nagoliat hira, ‘Naruba na an Jerusalem! Waray na an iya gahom hin pagpatigayon! Diri na hiya makompitensya ha amon!’

³“Sanglit yana, amo ini an igyayakan ko nga Ginoo nga DYOS: Kaaway mo ako, syudad han Tiro. Dadad-on ko in damo nga mga nasod hin pagsulong ha imo, ngan magkakaabot hira sugad hin mga balod han dagat.

⁴Pagbubungkagon nira an imo pader han syudad ngan pagrurumpagon nira an imo mga lantawan. Niyan pagkukuhaon ko an ngatanan nga tuna basi gumataw na la an mga bato.

⁵Maaadto ka ha butnga han dagat ngan dida ha imo magbubulad an mga mangirisda han ira mga pukot. Ako nga Ginoo nga DYOS an nagyakan. Paninikasan an Tiro han mga nasod,

⁶ngan pinaagi han ira mga espada pamamatayon nira adton mga nag-uokoy didto han iya mga bungto didto han kadak-an nga tuna. Niyan makilala an Tiro nga ako amo an GINOO.”

⁷Nasiring an Ginoo nga DYOS, “Dadad-on ko an labi kagamhanan nga hadi han ngatanan—hi Hadi Nabucodonosor han Babilonia—hin pagsulong han Tiro. Maabot hiya tikang ha amihanan upod in damo nga kasondalohan, mga kakabayohan, ngan mga karuwahe, ngan dikabayo nga mga sondalo.

⁸Panmamatayon didto han araway adton mga nag-uokoy ha mga bungto didto han kadak-an nga tuna. Mag-uukad an kaaway hin mga salipdanan, magtitindog hin mga tinambak nga tuna, ngan maghihimo hin marig-on nga pader hin mga taming kontra ha imo.

⁹Pagbubundolon nira pinaagi hin mga igburungkag an imo mga pader ngan pagrurumpagon an imo mga lantawan pinaagi hin mga barra nga puthaw.

¹⁰Tatahoban ka han mga madakmol nga tapotapo nga tapwad han ira kakabayohan. Babay-ogon an imo mga pader han aringasa han ira kakabayohan nga nagsasaog hin mga karomata ngan mga karuwahe, samtang naagi hira han mga ganghaan han nabungkag nga syudad.

¹¹Pagtatamaktamakan han ira dikabayo nga mga sondalo an imo kakalsadahan ngan panmamatayon han ira mga espada an imo mga tawo. Magkakatutumba ha tuna an imo dagko nga mga harigi.

¹²Magpapatakas an imo mga kaaway han imo manggad ngan mga baligya. Pagrurumpagon nira an imo pader ngan pagpupukanon an imo magtahom nga kabablayan. Hahakoton nira an mga bato ug kahoy, ngan an ngatanan nga mga rinuba, ngan ilalabog ini ngadto han dagat.

¹³Tataposon ko na an ngatanan mo nga mga kanta, ngan pamimingawon ko an tokar han imo mga arpa.

¹⁴Mahibibilin na la in mga bato nga kabubularan han ira mga pukot. Diri na liwat pagtitindogon an syudad. Ako nga Ginoo nga DYOS an nagyakan.”

¹⁵Amo ini an igyayakan han Ginoo nga DYOS ngadto han syudad han Tiro: “Kon madaog ka na, magkakahadlok hin duro an mga tawo nga nag-uokoy ha baybayon kon makabati hira han mga kurinit hadton mga pinanmamatay.

¹⁶Malusad tikang han ira mga trono an ngatanan nga kahadian han mga nasod nga may pakabuhi ha dagat. Huhuboon nira an ira higlaba nga mga bado ngan an binordahan nira nga mga panapton ngan manlilingkod hira nga nanngungurog dida ha tuna. Mahahadlok hira hin duro han imo kasugaran nga diri na hira mahunong hin pagkurog.

¹⁷Kakantahon nira para ha imo ini nga kanta hin paglubong: Nabungkag an bantogan nga syudad! Gin-anod[59] ha kadagatan an iya mga barko. Naghadi han kadagatan an mga tawo hini nga syudad. Ngan ginhadlok nira an ngatanan nga nag-uokoy ha baybayon.

¹⁸Yana, dida han adlaw han pagkapukan hini, Nangungurog an mga puro, Ngan nahadlok an ira mga tawo hin sugad nga pagkabungkag.”

¹⁹Nasiring an Ginoo nga DYOS: “Hihimoon ko ikaw nga sugad kamamingaw han nagkaruruba nga mga syudad nga waray nag-uokoy. Lalapwason ko ikaw han tubig han hilarom nga kalalawdan.

²⁰Palulusaron ko ikaw ngadto han kalibutan han mga patay basi mahitampo ka han mga tawo nga nag-ukoy hadto nga mga katuigan. Pauokyon ko ikaw didto hito nga kalibutan ha ilarom han tuna ha butnga han dayon nga kabungkagan, ngan tampo han mga patay. Tungod hini diri ka na gud pag-uokyan ngan mawawaray ka na dapit,[60] didto han tuna han mga buhi.

²¹Hihimoon ko ikaw nga makaharadlok nga pananglitan, ngan amo ito an imo kataposan. Bangin mamiling ha imo an mga tawo, kundi diri ka na gud hiaagian.” An Ginoo nga DYOS an nagyakan.