Read Waray Samarenyo Meaning Based Ezequiel 27 Bible Online

Ezequiel 27 - Waray Samarenyo Meaning Based bible

Ezequiel 27

¹Nagsiring ha akon an GINOO,

²“Anak hin tawo, pagkanta hin kanta hin paglubong para han Tiro,

³ito nga syudad nga aada ha ligid han dagat ngan nakikigpatigayon han mga tawo nga nag-uokoy ha ngatanan nga kabaybayonan. Sumati hiya han igyayakan han Ginoo nga DYOS: “Tiro, iginhambog mo an imo hingpit nga kaanyag.

⁴An dagat amo an imo urokyan. Ginhimo ka han imo mga magtirindog sugad hin matahom nga barko.

⁵Ginmamit hira hin gipat han mga kahoy nga palotsina nga tikang han Bukid Hermon, Ngan hin sidro nga tikang ha Libano para han imo palo.

⁶Nagkuha hira hin tuog nga mga kahoy tikang ha Basan hin paghimo hin mga rimo; Ginhimo nira an imo salog tikang hin kahoy nga sipres nga tikang ha Cipre. Ngan linubngan ini hin marpil.

⁷Hinimo hin lino an imo mga layag, Binordahan nga lino nga tikang ha Ehipto, Masayon makilala bisan hirayo pa. Hinimo hin gimamaupayi nga tela an imo mga atop-atop, Nga granate nga tikang han puro han Cipre.

⁸An imo mga paragaod taga syudad han Sidon ug Arvad. An imo kalugaringon nga batid nga mga tawo amo an mga tripulante.

⁹An mga panday han barko Mga batid nga mga tawo nga taga-Biblos. Nakigpatigayon didto han imo mga tindahan An mga magsarakay nga tikang han ngatanan nga mga barko.

¹⁰“Nahimo nga imo mga sondalo an mga taga-Persia, Lidia, ug Libya. Isinab-ong nira an ira mga taming ngan an ira mga helmet didto han imo mga urokyan hin mga sondalo. Amo hira an mga tawo nga nagdara ha imo hin kadaogan.

¹¹Ginbantayan an imo mga pader han mga sondalo nga taga-Arvad, ngan an imo mga lantawan han mga tawo nga taga-Gamad. Iginsab-ong nira an ira mga taming dida han imo mga pader. Amo ini hira nga mga tawo an nagpaanyag ha imo.

¹²“Nakigpatigayon ka didto ha Espania ngan kinarawat mo in salapi, puthaw, lata, ug timga nga balyo han imo uraura hin kadamo nga mga baligya.

¹³Nakigpatigayon ka didto ha Grecia, Tubal, ug Mesec ngan iginbalyo mo an imo mga baligya hin mga oripon ngan mga butang nga hinimo hin bronse.

¹⁴Iginbalyo mo an imo mga baligya hin mga kabayo para hin pagtrabaho, mga kabayo nga igpangaraway, ngan mga mula nga tikang ha Bettogarma.

¹⁵Nakigpatigayon ha imo an mga tawo han Rodas.[61] Gintagan ka han mga tawo ha ligid han baybayon hin marpil ngan kamagong nga mga kahoy nga balyo han imo mga baligya.

¹⁶Ginpalit han mga tawo han Siria an imo mga ginpapatigayon ngan mga ginbabaligya. Ginhatag nira in mga esmeralda, granate nga hiniro, bordado nga mga dugnit, pino nga lino, kuralo, ngan mga rubi nga balyo han imo mga baligya.

¹⁷Ginbaydan han Juda ug Israel an imo mga baligya hin trigo,[62] dugos, lana hin olibo, ngan mga panakot.

¹⁸Ginpalit han mga tawo han Damasco an imo mga igbaraligya ngan an imo mga hinimo, ngan ginbaydan ka nira hin bino nga tikang ha Helbon ngan delana nga tikang ha Sahar.[63] Ginbalyo nira hin puthaw ngan mga pahamot an imo mga baligya.

²⁰Iginbalyo han mga tawo han Dedan hin mga hapin hin muntora an imo mga baligya.

²¹Ginbayaran an imo mga baligya han mga Arabianhon ngan han mga punoan han tuna han Kedar hin mga nati nga karnero, mga karnero, ngan mga kanding.

²²Iginbalyo han mga magparatigayon han Seba ug Raama hin mga alahas, bulawan, ngan han gimamag-upayi nga mga panakot an imo mga baligya.

²³Nakigpatigayon ha imo an ngatanan nga mga syudad han Haran, Cane, ug Eden, ngan an mga magparatigayon han Saba ug an mga syudad han Asur ug Cilmad.

²⁴Ginbaligyaan ka nira hin marahalon nga mga panapton, mga hiniro nga granate ngan binordahan nga mga dugnit, dekolor nga mga alpombra, ngan mga lubid nga mag-upay hin kahimo ngan mga pisi.

²⁵Iginkarga an imo mga ibaraligya dida hin dagko nga mga barko ha kadagatan. “Sugad ka hin usa nga barko ha dagat Nga tugob hin mabug-at nga karga.

²⁶Gindara ka han imo mga maggaraod ngadto ha lawod, Nalunod ka ha lawod tungod han hangin nga kabunghan.

²⁷Han kalunod han imo barko Naanaw an ngatanan didto ha dagat— An ngatanan mo nga mga ibaraligya, An ngatanan mo nga mga tripulante, An imo mga panday han barko ngan an imo mga magparatigayon, An tagsa nga sondalo nga sakay han barko.

²⁸Nag-aningal dida han baybayon An gogliat han nalulumos nga mga tripulante.

²⁹“Binayaan na yana an tagsa nga barko, Ngan hinmaw-as na an tagsa nga tripulante.

³⁰Nagmabidoon hira ngatanan tungod ha imo, Nga nagsabrag hira hin tapotapo ha ira mga ulo ngan nagpulilid dida han mga agbon.

³¹Ginkikiskisan nira an ira mga ulo tungod ha imo. Ngan nagbado hira hin mga sako. Mabidoon an ira mga kasingkasing samtang nagtatangis hira.

³²Nagkanta hira hin usa nga kanta hin paglubong para ha imo: ‘Hin-o an makakatanding han Tiro, Han Tiro nga mamingaw na didto ha ilarom han dagat?

³³Han pagtabok han kadagatan han imo mga ibaraligya Nakapalit han ira mga kinahanglanon an tagsa nga nasod. Ginpariko mo an kahadian Pinaagi han manggad han imo mga baligya.

³⁴Yana nalunod ka na didto han dagat; Nalunod ka ngadto han kahiladman han kalalawdan. Nagkawawara upod ha imo didto han dagat An imo mga ibaraligya ngan an ngatanan nga nagtrabaho para ha imo.’

³⁵“Nahadlok han imo kasugaran an ngatanan nga nag-uokoy ha baybayon. Nahadlok hin duro bisan pa an ira kahadian, ngan hinkit-an an ira kahadlok dida han ira mga bayhon.

³⁶Waray ka na, nawara ka ha kadayonan, ngan nahadlok hin duro an mga magparatigayon ha bug-os nga kalibutan, nahadlok nga bangin makaangbit hira han imo kasugaran.”