Read Waray Samarenyo Meaning Based Ezequiel 29 Bible Online

Ezequiel 29 - Waray Samarenyo Meaning Based bible

Ezequiel 29

¹Dida han ika-12 nga adlaw han ikanapulo nga bulan han ikanapulo ka tuig han amon pagkabihag, naghimangraw ha akon an GINOO.

²Nagsiring hiya, “Anak hin tawo, isumbong an hadi han Ehipto. Sumati hiya kon uunanhon ko hin pagkastigo ha iya ngan han bug-os nga tuna han Ehipto.

³Sidnga nga amo ini an igyayakan han Ginoo nga DYOS ngadto han hadi han Ehipto: Kaaway mo ako, ikaw nga higante nga buaya nga naukoy ha salog. Nasiring ka nga imo an Nilo, ngan ikaw an naghimo hini.[67]

⁴Kakab-itan ko hin kawil an imo sulang ngan ipapadukot ko ngada han imo mga hingbis an mga isda dida han imo salog. Niyan bubutongon ko ikaw tikang han Nilo upod an ngatanan nga isda nga nadukot dida ha imo.

⁵Ilalabog ko ikaw ngan ito ngatanan nga mga isda ngadto ha kamingawan. Mahuhulog an imo lawas ngada han tuna ngan diri ini iglulubong. Ihahatag ko ini nga pagkaon ngadto han katamsihan ngan kamanampan.

⁶Niyan makilala an ngatanan nga mga tawo ha Ehipto nga ako amo an GINOO.” Nasiring an GINOO, “Tinmapod an mga Israelita han tambulig niyo nga mga Ehiptohanon, kundi sugad la kamo hin matapok nga kagingking.

⁷Han pagsandig nira ha iyo, nabari kamo, natunok an ira mga irok, ngan ginpasakitan niyo an ira mga bungkog.[68]

⁸Sanglit yana, nagsusumat ha iyo ako nga Ginoo nga DYOS, nga pasusulongon ko ha iyo in mga tawo nga may mga espada, ngan pamamatayon nira an iyo mga tawo ngan an iyo mga mananap.

⁹Mahihimo nga waray gamit nga kamingawan an Ehipto. Niyan makilala kamo nga ako amo an GINOO. “Tungod nga nagsiring ka nga imo an Nilo ngan ikaw an naghimo hini,

¹⁰kaaway ko ikaw ngan an imo Nilo. Hihimoon ko nga kamingawan nga waray gamit an bug-os nga Ehipto, tikang han syudad han Migdol didto ha amihanan ngadto han syudad han Asuan ha timogan, tubtob gud ngadto han Sudanhon nga pag-ultan.

¹¹Waray tawo o mananap nga maglalatas hini. Sulod hin 40 ka tuig waray bisan ano nga mag-uokoy didto.

¹²Hihimoon ko an Ehipto nga gimimingawi nga nasod dinhe ha bug-os nga kalibutan. Sulod hin 40 ka tuig usa nga kamingawan an mga syudad han Ehipto, kamingawan nga labaw pa hin kamaraot kay hadton iba nga mga syudad. Hihimoon ko nga mga kalagiw an mga Ehiptohanon. Mangangalagiw hira ngadto han tagsa nga nasod ngan mag-uokoy hira tampo han iba nga mga katawhan.”

¹³Nasiring an Ginoo nga DYOS, “Katapos hin 40 ka tuig igbabalik ko an mga Ehiptohanon tikang han mga nasod diin ko hira ginpasarang,

¹⁴ngan pauokyon ko hira didto ha timogan nga Ehipto nga ira tunay nga urokyan. Didto magigin maluya hira nga ginhadian,

¹⁵an labi hin kamaluya nga ginhadian han ngatanan, ngan diri na gud hira maghahadi hin iba nga mga nasod. Hihimoon ko hira nga diri na gud importante nga nasod nga diri na hira makapugos hin iba nga nasod hin pagsunod han ira kaburot-on.

¹⁶Diri na gud matapod an Israel han ira tambulig. Magpapahinumdom han Israel an kasugaran han Ehipto han ira kasayop hin pagtapod ha ira. Niyan makilala an Israel nga ako amo an Ginoo nga DYOS.”

¹⁷Dida han syahan nga adlaw han syahan nga bulan han ika-27 ka tuig han amon pagkabihag, naghimangraw ha akon an GINOO.

¹⁸Nagsiring hiya, “Anak hin tawo, ginsulong ni Hadi Nabucodonosor han Babilonia an Tiro. Pinapagdara niya an iya mga sondalo hin duro kamabug-at nga mga darad-on nga nagkapapahak an ira mga ulo ngan nagkapapaklasan an ira mga sugbong, kundi waray gud magpulos an hadi o an iya kasondalohan han ngatanan nira nga ginkabudlayan.

¹⁹Sanglit yana amo ini an igyayakan ko, an Ginoo nga DYOS: Ihahatag ko an tuna han Ehipto ngadto kan Hadi Nabucodonosor. Titikasan ngan kakawatan niya ini, ngan dadad-on sugad nga suhol han iya kasondalohan an ngatanan nga mga manggad han Ehipto.

²⁰Inihatag ko ha iya an Ehipto sugad nga bayad han iya mga pag-alagad, kay nagtrabaho an iya kasondalohan para ha akon. Ako nga Ginoo nga DYOS an nagyakan.

²¹“Kon mahinabo na ito, pakukusgon ko an mga tawo han Israel ngan tutugotan ko ikaw hin pagyakan, Ezequiel, diin hibabatian ka han ngatanan, basi kumilala hira nga ako amo an GINOO.”