Read Waray Samarenyo Meaning Based Ezequiel 30 Bible Online

Ezequiel 30 - Waray Samarenyo Meaning Based bible

Ezequiel 30

¹Naghimangraw na liwat ha akon an GINOO.

²Nagsiring hiya, Anak hin tawo, pagtagna ngan igpahibaro an igyayakan ko, an Ginoo nga DYOS. Igogoliat mo ini nga mga pulong: Tiarabot in usa nga makaharadlok nga adlaw!

³Hirani na an adlaw, an adlaw nga magios na an GINOO. Usa nga adlaw hin mga dampog ngan hin kakurian para han mga nasod.

⁴Magkamamay-ada araway didto ha Ehipto Ngan dako nga kasakitan didto ha Sudan. Damo an panmamatayon didto ha Ehipto; Pagtitikasan an nasod Ngan babayaan nga ruba an syudad.

⁵“Ito nga araway manmamatay liwat han sinuholan nga mga sondalo nga taga-Sudan, Libia, Lidia, Arabia, Cub, ngan bisan an akon kalugaringon nga mga tawo.”

⁶Nasiring an GINOO, “Panmamatayon didto ha pag-awayan an ngatanan nga binmulig han Ehipto, tikang ha Migdol didto ha amihanan ngadto ha Asuan didto ha timogan. Pagbubungkagon an mapahitas-on nga kasondalohan han Ehipto. Ako nga Ginoo nga DYOS an nagyakan.

⁷Mahihimo an Ehipto nga labi hin kamingaw nga tuna dinhe ha kalibutan, ngan babayaan nga mga ruba an mga syudad hini.

⁸Kon pagsuritan ko na an Ehipto ngan panmatayon an ngatanan nga binmulig ha iya, niyan makilala hira nga ako amo an GINOO.

⁹“Kon umabot na ito nga adlaw, ngan mabungkag na an Ehipto, magsusugo ako hin mga magsarangyaw nga sakay hin mga barko hin paghadlok han diri matinahapon nga mga tawo han Sudan, ngan malilisang hira. Maabot ra ito nga adlaw!”

¹⁰Nasiring an Ginoo nga DYOS, “Gagamiton ko hi Hadi Nabucodonosor han Babilonia hin pagbungkag han manggad han Ehipto.

¹¹Maabot hiya ngan an iya magbangis nga kasondalohan hin pagpuo han tuna. Susulongon nira an Ehipto pinaagi hin mga espada, ngan maluluob hin patay nga mga lawas an tuna.

¹²Pamamad-on ko an Nilo ngan itutubyan ko an Ehipto ha gahom hin magraot nga mga tawo. Pagpupuohon hin mga lumalangyaw an bug-os nga nasod. Ako nga GINOO an nagyakan.”

¹³Nasiring an Ginoo nga DYOS, “Pagbubungkagon ko an mga diyosdiyos ngan an diri matuod nga kadiyosan didto ha Memfis. Waray na magpapangulo han Ehipto, ngan paghahadlokon ko an ngatanan nga mga tawo.

¹⁴Hihimoon ko nga kamingawan an timogan nga dapit han Ehipto ngan susuritan ko an syudad han Zoan didto ha amihanan. Kakastigohon ko an kapital nga syudad han Tebas.

¹⁵Paaabaton ko han akon kapungot an syudad han Pelusium, an dako nga balwarte han Ehipto. Pupuohon ko an mga umurokoy han Tebas.

¹⁶Susuritan ko an Ehipto, ngan papapag-antoson hin duro an Pelusium. Marurumpag an mga pader han Tebas, ngan paglulunopan[69] an syudad.

¹⁷Magkakamatay didto ha pag-awayan an batan-on nga kalalaken-an han mga syudad han Heliopolis ug Bubastis, ngan mabibihag an iba nga mga tawo.

¹⁸Magsisirom didto ha Tafanes kon utdon ko na an gahom han Ehipto ngan taposon ko na an kusog nga ira gud ipinaparayaw. Tatahoban hin usa nga dampog an Ehipto, ngan pamimihagon an mga tawo han ngatanan nira nga mga syudad.

¹⁹Kon kastigohon ko na an Ehipto hin sugad hini, makilala hira nga ako amo an GINOO?”

²⁰Dida han ikapito ka adlaw han syahan nga bulan han ika-11 ka tuig han amon pagkabihag, naghimangraw ha akon an GINOO.

²¹Nagsiring hiya, “Anak hin tawo, ginpiol ko na an butkon han hadi han Ehipto. Waray may nagbutok hini basi mag-upay ngan magmakusog na liwat hin pagkapot hin espada.

²²Sanglit yana amo ini an igyayakan ko, an Ginoo nga DYOS: Ako amo an kaaway han hadi han Ehipto. Pipiolon ko an duha niya nga mga butkon—an maupay ngan an daan piol—ngan diri na hiya makakakapot han iya espada.

²³Igpapasarang ko ha bug-os nga kalibutan an mga Ehiptohanon.

²⁴Niyan pakukusgon ko an mga butkon han hadi han Babilonia ngan ibubutang ko an akon espada dida han iya mga kamot. Kundi pipiolon ko an mga butkon han hadi han Ehipto, ngan maghaharoy hiya ngan mapatay ha atubangan han iya kaaway.

²⁵Tinuod, paluluyahon ko hiya ngan pakukusgon ko an hadi han Babilonia. Kon ihatag ko na ha iya an akon espada, ngan alsahon niya tipakadto ha Ehipto, makilala an ngatanan nga ako amo an GINOO.

²⁶Igpapasarang ko ha bug-os nga kalibutan an mga Ehiptohanon. Niyan makilala hira nga ako amo an GINOO.”