Read Waray Samarenyo Meaning Based Ezequiel 42 Bible Online

Ezequiel 42 - Waray Samarenyo Meaning Based bible

Ezequiel 42

¹Niyan gindara ako han tawo ngadto han gawas nga bungsaran ngan gin-updan ako niya ngadto hin usa nga balay didto han amihanan nga dapit han Templo nga diri hirayo tikang han balay didto ha katundan nga kataposan han Templo.

²An kahilaba hini nga balay 50 ka metros ngan 25 ka metros an kahiluag.

³Didto han usa nga ligid naatubang ini han napulo ka metros nga wada nga sapit han Templo, ngan didto han luyo nga dapit naatubang ini han binatoan nga dapit han gawas nga bungsaran. Gintindog ini hin tulo ka andana, ngan an tulo nga mga andana nagtitikahaligut tipaigbaw.

⁴Ha ligid han amihanan nga dapit hini nga balay may-ada usa nga aragian nga lima ka metros an kahiluag ngan 50 ka metros an kahilaba,[103] nga may mga porta dida hito nga ligid.

⁵Haruhaligot an mga kwarto han iruigbaw nga andana kay han butnga ngan ubos nga mga andana, kay igin-isol man ini.

⁶Gintindog dida han mga balkon an mga kwarto han tulo nga mga andana, ngan diri ini tinukod hin mga harigi sugad han iba nga mga balay didto han bungsaran.

⁷Dida han ubos nga andana, bug-os gud an gawas nga bungbong han balay sulod hin 25 ka metros, nga katunga ini han kahilaba han bungbong; ngan may mga kwarto dida han nahibibilin nga 25 ka metros. Didto han giiigbawi nga andana luob hin mga kwarto an bug-os nga kahilaba han balay.

⁹Ha ubos hini nga kwarto, didto han sinirangan nga kataposan han balay, nga natikang an pader han bungbong,[104] may usa nga aragian ngadto ha gawas nga bungsaran. Didto han timogan[105] nga dapit han Templo may-ada pareho gud nga balay nga diri hirayo tikang han balay ha katundan nga kataposan han Templo.

¹¹Ha atubangan han mga kwarto, may-ada aragian nga sugad gud han aragian didto han amihanan. May-ada ini pareho nga mga sukol, pareho nga pangguhit ha bungbong, ngan pareho nga mga aragian.

¹²May-ada usa nga porta ha sirong han mga kwarto didto han timogan han balay, ha sinirangan nga kataposan nga tinitikangan han bungbong.

¹³Nagsiring ha akon an tawo, “Baraan ini nga duha nga mga balay. Didto ha sulod hini kinakaon han kapadian nga nasulod ngadto ha atubangan han GINOO an labi kabaraan nga mga halad. Tungod nga baraan an mga kwarto, ibubutang didto han kapadian an labi kabaraan nga mga halad; an mga halad nga pagkaon ngan an mga halad nga tinubod nga iginhahalad para hin sala o sugad nga mga halad hin paglukat.

¹⁴Kon nahingadto na ha sakob han Templo an kapadian ngan karuyag nira kumadto han gawas nga bungsaran, kinahanglan ibilin nira dida hini nga mga kwarto an baraan nga mga panapton nga iginsul-ot nira han ira pag-alagad han GINOO. Kinahanglan magliwan hira hin iba nga panapton ha diri pa hira nagawas ngadto han dapit nga gintitirokan han mga tawo.”

¹⁵Han kahuman na han tawo pagsukol han sakob nga dapit han Templo, gindara ako niya ha gawas pinaagi han sinirangan nga ganghaan, ngan ginsukol niya an gawas nga dapit han Templo.

¹⁶Kinuha niya an isirukol nga lipak ngan ginsukol an sinirangan nga ligid, ngan 250 ka metros ini.

¹⁷Niyan ginsukol niya an amihanan nga ligid, an timogan nga ligid, ngan an katundan nga ligid; papreho kahiglaba an kada ligid, 250 ka metros,[106]

²⁰sanglit nalikos ini han pader nga kwadrado nga 250 ka metros an kada ligid. An pader amo an nagbubulag han baraan tikang han diri baraan nga dapit.