Read Waray Samarenyo Meaning Based Ezequiel 45 Bible Online

Ezequiel 45 - Waray Samarenyo Meaning Based bible

Ezequiel 45

¹Kon pagbahinbahinon an tuna ha paghatag hin malon han kada tribo, ighahalad ngadto han GINOO in usa ka bahin. Mga 16 ka kilometro an kahilaba hini ngan mga 13 ka kilometro[109] an kahiluag. Magigin baraan an bug-os nga dapit.

²Dida hini nga dapit, mamamay-ada kwadrado nga tuna para han Templo nga 250 ka metros an kada ligid, nga pagpapalibotan hin tuna nga mahawan nga 25 ka metros an kahiluag.

³Igagahin pagsukol an katunga hini nga dapit, usa nga bahin nga 16 ka kilometro an kahilaba ngan mga lima ka kilometro an kahiluag; isasakob dinhe an Templo, nga amo an labi kabaraan nga dapit han ngatanan.

⁴Magigin baraan ini nga bahin han nasod, nga iginggahin para han kapadian nga nag-aalagad han GINOO didto han iya Templo. Isasakob hini an ira mga balay ngan an tuna para han Templo.

⁵Igagahin an lain nga katunga hini nga tuna nga pagtatag-iyahon han mga Levita nga nagtutuman han mga buruhaton didto han Templo. Magkakamay-ada mga bungto didto nga ira pag-uokyan.[110]

⁶Sapit han baraan nga dapit, igagahin liwat in lain nga dapit nga 16 ka kilometro an kahilaba ngan mga kapin hin tulo ka kilometro an kahiluag para hin usa nga syudad nga pag-uokyan han mga tawo han Israel.

⁷Igagahin liwat in tuna para han nangungulo nga prinsipe. Tikang ha katundan nga pag-ultan han baraan nga dapit, matipakatundan ini ngadto han Dagat Mediteraneo; ngan tikang han sinirangan nga pag-ultan, maabot ini ngadto han sinirangan nga pag-ultan han nasod, sanglit masugad an kahilaba hini han kahilaba hin usa han mga dapit nga iginhatag ngadto han mga tribo han Israel.

⁸Magigin bahin ini nga dapit han nangungulo nga prinsipe nga iya pagtatag-iyahon didto han tuna han Israel, basi diri na hiya maglupog han mga tawo, kundi ipapaangkon niya han mga tribo han Israel an iba nga bahin han nasod.

⁹Nagsiring an Ginoo nga DYOS, “Maiha na hin duro an pagpinakasala niyo nga mga punoan han Israel! Hunonga na an iyo panlupig ngan panraogdaog. Buhata an maupay ngan matadong. Kinahanglan diri na gud niyo pagpaiwason an akon mga tawo tikang han ira tuna. Ako nga Ginoo nga DYOS an nagyayakan hini ha iyo.

¹⁰“Kinahanglan gumamit an ngatanan hin husto nga mga timbangan ngan mga taraksan:

¹¹“An efa nga taraksan para hin mamara nga mga butang, kinahanglan mapareho han bat nga taraksan para hin tubigon nga mga butang. An Homer[111] amo an opisyal nga taraksan, ngan an nasunod nga mga taraksan an pagsusundon: 1 ka homer = 10 ka efa = 10 ka bat

¹²“Sugad hinin nasunod an iyo mga timbangan: 20 ka gera = 1 ka siklo[112] 60 ka siklo = 1 ka mina

¹³“Amo ini an babasaran niyo han iyo mga paghalad: Trigo: 1/60 han iyo naani Sebada: 1/60 han iyo naani Lana hin olibo: 1/100 han nahimo han iyo mga kahoy nga olibo (Taksa ini pinaagi han bat: 10 ka bat = 1 ka homer = 1 ka kor.) Karnero: 1 nga karnero han kada 200 tikang han mga panabsaban han Israel. “Magdadara kamo hin mga halad nga pagkaon, mga mananap nga pagtutuboron hin bug-os, ngan mga mananap para hin mga halad hin pagkaurosa, basi pasayloon an iyo mga sala. Ako nga Ginoo nga DYOS an nagsusugo hini.

¹⁶“Kinahanglan dad-on[113] han ngatanan nga mga tawo han tuna ini nga mga halad ngadto han nangungulo nga prinsipe han Israel.

¹⁷Magigin iya katungdanan an pag-andam han mga mananap nga pagtutuboron hin bug-os, han mga halad nga pagkaon, ngan han mga halad nga bino para han bug-os nga nasod han Israel dida han mga pyesta han Subang nga Bulan, han mga Adlaw nga Iparahuway, ngan han iba pa nga mga pyesta. Hiya an mag-aandam han mga halad para hin sala, han mga halad nga pagkaon, han mga halad nga pagtutuboron hin bug-os, ngan han mga halad hin pagkaurosa, hin pagkuha han mga sala han mga tawo han Israel.”

¹⁸Nagsiring an Ginoo nga DYOS, “Dida han syahan nga adlaw han syahan nga bulan maghahalad kamo hin usa nga baka nga lalaki nga waray gud karat-an ngan lilinisan niyo an Templo.

¹⁹Makuha an padi hin dugo hini nga halad para hin sala ngan ipapahid ini dida han mga harigi han mga porta han Templo, dida han upat nga mga kanto han altar, ngan dida han mga harigi han mga ganghaan ngadto han sakob nga bungsaran.

²⁰Dida han ikapito nga adlaw han bulan amo gihapon an iyo pagbubuhaton para han bisan hin-o nga nakakasala hin diri tinuyo o tungod hin katapang. Ha sugad hini mababaraan an Templo.

²¹“Dida han ika-14 nga adlaw han syahan nga bulan, titikangan niyo an pagsaurog han Pyesta han Paglabay. Sulod hin pito ka adlaw kakaonon han ngatanan in tinapay nga waray patubo.

²²Dida han syahan nga adlaw han pyesta, kinahanglan maghalad an nangungulo nga prinsipe hin usa nga baka nga lalaki sugad nga halad nga tinubod para han iya mga sala ngan para han mga sala han ngatanan nga mga tawo.

²³Dida han kada adlaw han pito ka adlaw han pyesta, maghahalad hiya ngadto han GINOO hin halad nga tinubod nga pito nga mga baka nga lalaki ngan pito nga mga karnero nga lalaki nga waray gud mga karat-an ngan pagtutuboron ini hin bug-os. Maghahalad liwat hiya kada adlaw hin usa nga kanding nga lalaki sugad nga halad para hin sala.

²⁴Para han kada baka ngan kada karnero nga ighahalad, magkakamay-ada 17 1/2 ka litro nga halad nga pagkaon ngan mga 3 ka litro nga lana hin olibo.

²⁵“Para han Pyesta han Payagpayag, nga matikang dida han ika-15 nga adlaw han ikapito nga bulan, maghahalad an prinsipe ha kada adlaw sakob han pito ka adlaw han amo manta nga halad para hin sala, han amo manta nga mga halad nga pagtutuboron hin bug-os, ngan han amo manta nga mga halad nga pagkaon ngan lana hin olibo.”