Read Waray Samarenyo Meaning Based Ezequiel 48 Bible Online

Ezequiel 48 - Waray Samarenyo Meaning Based bible

Ezequiel 48

¹An amihanan nga pag-ultan han tuna natipasinirangan tikang ha Dagat Mediteraneo ngadto han syudad han Hetlon, ngadto han Agianan han Hamat, ngadto han syudad han Enon, ngadto han pag-ultan ha butnga han mga ginhadian han Damasco ug Hamat. Makarawat an kada tribo hin usa nga bahin han tuna nga natikang han sinirangan nga pag-ultan tipakatundan ngadto han Dagat Mediteraneo,[120] hini nga pagkasunodsunod tikang ha amihanan ngadto ha timogan: Dan Aser Neftali Manases Efraim Ruben Juda

⁸An sunod nga bahin han tuna igagahin para hin linain nga paggamit. Mga 16 ka kilometro an kahiluag hini tikang ha amihanan ngadto ha timogan, ngan pareho an kahilaba tikang ha sinirangan ngadto ha katundan sugad han mga bahin nga iginhatag ngadto han mga tribo. Titindogon an Templo dida hini nga bahin.

⁹Ha butnga hini nga bahin, ihahalad ngadto han GINOO in linain nga dapit nga mga 16 ka kilometro an kahilaba ngan mga 13 ka kilometro[121] an kahiluag.

¹⁰Magkakamay-ada bahin an kapadian hini nga baraan nga dapit. Tikang ha sinirangan ngadto ha katundan masukol hin mga 16 ka kilometro an ira bahin, nga mga unom ka kilometro tikang ha amihanan ngadto ha timogan. Mahimumutang an Templo han GINOO dida han butnga hini nga dapit.

¹¹Para han kapadian nga mga tulin ni Sadoc ini nga baraan nga dapit. Nag-alagad hira ha akon hin matinumanon ngan waray hira tumampo han iba nga mga Israelita hin pagbuhat hin maraot, sugad han ginbuhat han iba nga mga sakop han tribo ni Levi.

¹²Sanglit mag-aangkon hira hin linain nga dapit nga sapit gudla han dapit nga gintatag-iya han mga Levita, ngan magigin labi kabaraan ini nga dapit han ngatanan.

¹³Magkakamay-ada liwat linain nga dapit an mga Levita didto ha timogan han kanan kapadian. Mga 16 ka kilometro liwat ini tikang ha sinirangan ngadto ha katundan, ngan mga unom ka kilometro tikang ha amihanan ngadto ha timogan.

¹⁴An dapit nga iginhalad ngadto han GINOO amo an gimamaupayi nga bahin han bug-os nga tuna, ngan waray gud bahin hini nga mahibabaligya, o mahibabalyo, o mahibabalhin ngadto hin iba nga tawo. Baraan ini ngan gintatag-iya ini han GINOO.

¹⁵Diri baraan an nahibilin nga bahin han linain nga dapit nga mga 16 ka kilometro an kahilaba ngan mga tulo ka kilometro an kahiluag, kundi para ini hin komon nga paggamit han mga tawo. Makakaukoy hira didto ngan makakagamit han tuna. Ikakada an syudad ha butnga hini,

¹⁶ngan magigin kwadrado ini nga 2,250 ka metros an kada ligid.

¹⁷Ha palibot han syudad, magkakamay-ada mahawan nga dapit nga 125 ka metros an kahiluag.

¹⁸Gagamiton an nahibilin nga tuna katapos mahitindog an syudad, didto ha timogan gudla han baraan nga dapit—nga mga unom ka kilometro an kahilaba ngan mga tulo ka kilometro an kahiluag didto ha sinirangan ngan mga unom ka kilometro an kahilaba ngan mga tulo ka kilometro an kahiluag didto ha katundan sugad nga pag-uumhan han mga tawo nga nag-uokoy didto han syudad.

¹⁹Makakag-uma hito nga tuna an bisan hin-o nga nag-uokoy didto han syudad, bisan tikang diin hiya nga tribo.

²⁰Sanglit magigin usa nga kwadrado nga dapit an bug-os nga tuna didto ha butnga han bahin nga iginggahin nga masukol hin mga 16 ka kilometro an kada ligid, ngan mahiuupod hini an dapit nga hinmumutangan han syudad.

²¹Pagtatag-iyahon han nangungulo nga prinsipe an mahibilin nga tuna ngadto ha sinirangan ngan ngadto ha katundan hini nga dapit nga hinmumutangan han Templo, han tuna han kapadian, han tuna han mga Levita, ngan han syudad. Naabot ini ngadto han sinirangan nga pag-ultan ngan ha katundan ngadto ha Dagat Mediteraneo, ngan nabubutnga ini han tuna ni Juda didto ha amihanan ngan han tuna ni Benjamin didto ha timogan.

²³Ha timogan hini nga linain nga bahin, makarawat an kada usa han nahisalin nga mga tribo hin usa ka bahin han tuna, tikang ha sinirangan nga pag-ultan ngan napakatundan ngadto han Dagat Mediteraneo, hini nga pagkasunodsunod tikang ha amihanan ngadto ha timogan: Benjamin Simeon Isacar Zabulon Gad

²⁸Didto han timogan han bahin nga iginhatag ngadto han tribo ni Gad, natipatimogan-katundan an pag-ultan tikang ha Tamar ngadto han katubigan han Cades Meriba, ngan natipaamihanan-katundan ha ligid han pag-ultan han Ehipto ngadto han Dagat Mediteraneo.

²⁹Nagsiring an Ginoo nga DYOS, “Amo ito an pagbahinbahin han tuna nga pagtatag-iyahon han mga tribo han Israel nga magigin ira mga bahin.”

³⁰May-ada dose nga mga aragian ngadto han syudad han Jerusalem. 2,250 ka metros an kahilaba han kada usa han upat nga mga pader, ngan may-ada tulo nga mga ganghaan dida hini; ginngaranan an kada usa para han usa han mga tribo. Ginngaranan an mga ganghaan didto han amihanan nga pader; para kanda Ruben, Juda, ug Levi; an didto han sinirangan nga pader; para kanda Jose, Benjamin, ug Dan; an didto han timogan nga pader; para kanda Simeon, Isacar, ug Zabulon; ngan an didto han katundan nga pader; para kanda Gad, Aser, ug Neftali.

³⁵An kahilaba han upat nga mga pader han syudad 9,000 ka metros ngatanan. Tikang yana pagngangaranan an syudad hin “Aanhi-An-GINOO!”