Read Waray Samarenyo Meaning Based Ezequiel 5 Bible Online

Ezequiel 5 - Waray Samarenyo Meaning Based bible

Ezequiel 5

¹Nagsiring an GINOO, “Anak hin tawo, kuha hin matarom nga espada ngan gamita ini nga labaha hin pagkiskis han imo bungot ngan han ngatanan mo nga buhok ha ulo. Niyan timbanga an buhok ngan pagtuloa ini ka bahin.

²Sunoga an usa nga bahin didto han syudad kon mahuman na an pagsulong. Kuhaa an ikaduha nga bahin ngan tadtara ini han imo espada samtang naglilibot ka ha gawas han syudad. Igpasarang an ikatulo nga bahin ngadto han kahanginan, ngan paglalanaton ko ini pinaagi han akon espada.

³Pagsalin hin gutiay nga buhok ngan putsa ini dida han sidsid han imo panapton.

⁴Katapos kuhai liwat ini hin gutiay ngan ilabog ini ngadto ha kalayo, ngan ipaugtang ini. Tikang hini magsasarang in kalayo ngadto han bug-os nga nasod han Israel.”

⁵Nagsiring an Ginoo nga DYOS, “Tan-awa an Jerusalem. Iginbutang ko hiya ha butnga han kalibutan, nga ginpapalibotan hiya han iba nga mga nasod.

⁶Kundi sinmupil an Jerusalem han akon mga sugo ngan nagpakita nga labaw pa hiya hin kamaraot kay han iba nga mga nasod, labaw pa hin kamasinupakon kay han mga nasod nga palibot ha iya. Ginsikway han Jerusalem an akon mga sugo ngan dinmiri hin pagtuman han akon mga balaod.

⁷Jerusalem, pamati yana han ginyayakan ko, an Ginoo nga DYOS. Tungod hin diri nimo pagsugot han akon mga balaod o pagtuman han akon mga sugo, nakasamok ka labaw pa kay han mga nasod nga nagpapalibot ha imo. Ginsunod mo an mga pamatasan han iba nga mga nasod.

⁸Sanglit nagsusumat ha imo ako nga Ginoo nga DYOS nga kaaway mo na ako. Paghuhukman ko ikaw diin hikikit-an ini han ngatanan nga mga nasod.

⁹Tungod han ngatanan nga mga butang nga imo binubuhat nga akon napupungtan, pagkakastigohon ko an Jerusalem sugad nga waray ko pa ini pagbuhata hadto ngan diri ko na pagbubuhaton liwat.

¹⁰Tungod hini kakaonon han mga kag-anak didto ha Jerusalem an ira mga anak, ngan kakaonon han mga anak an ira mga kag-anak. Kakastigohon ko ikaw ngan ipapasarang ko an mahisalin nga buhi ngadto ha bisan diin nga dapit.

¹¹“Sanglit, sugad nga ako amo an buhi nga Dyos—amo ini an pulong han Ginoo nga DYOS—tungod nga ginhugawan mo an akon Templo pinaagi han ngatanan nga maraot ngan makapupungot nga mga butang nga imo ginbuhat, pagpupuohon ko ikaw hin waray pagkalooy.

¹²Magkakamatay hin sakit ug gutom an ikatulo ka bahin han imo mga tawo didto han syudad; pamamatayon pinaagi hin mga espada an sunod nga ikatulo ka bahin didto ha gawas han syudad; ngan igpapasarang ko an kataposan nga ikatulo nga bahin ngadto ha kahanginan ngan paglalanaton ko hira pinaagi hin espada.

¹³“Aabaton mo an ngatanan nga kusog han akon kapungot ngan kangalas, tubtob han akon pagtunga. Kon mahinabo na ini ngatanan, magmamatuod ka nga ako, an GINOO, amo an naghimangraw ha imo kay napungot gud ako han diri nimo pagkamatinumanon.

¹⁴Magyuyubit ngan mapahirayo ha imo an ngatanan nga malabay nga tikang han mga nasod nga nagpapalibot ha imo.

¹⁵“Kon nasisina ngan napupungot ako ha imo ngan nagkakastigo ha imo, mahahadlok hin duro an ngatanan nga mga nasod nga nagpapalibot ha imo. Matan-aw hira ha imo dara in pagtamay ngan pag-iintrimisan ka nira.

¹⁶Uutdon ko an ihinahatag ha imo nga pagkaon basi ka gutomon. Aabaton mo[8] an kasakitan hin gutom sugad hin magtarom nga mga pana nga ginpadara hin pagpuo ha imo.

¹⁷Magpapadara ako hin gutom ngan magpintas nga kamanampan hin pagpatay han imo mga anak, ngan magpapadara ako hin sakit, paglupig, ug araway hin pagpatay ha imo. Ako nga GINOO an nagyakan.”