Read Waray Samarenyo Meaning Based Ezequiel 8 Bible Online

Ezequiel 8 - Waray Samarenyo Meaning Based bible

Ezequiel 8

¹Dida han ikalima ka adlaw han ikaunom ka bulan han ikaunom ka tuig han amon pagkabihag, nagkakalingkod upod ha akon an mga pangulo han mga nabihag nga tikang ha Juda didto ha akon balay. Tigda la nga inmabot ha akon an gahom han Ginoo nga DYOS.

²Hinmangad ako ngan hinkit-an in usa nga panan-awon hin nagkakalayo nga dagway hin tawo. Sugad hin kalayo pagkit-on an iya lawas tikang ha hawak ngadto ha ubos, ngan nasilaw hiya sugad hin pinainggat nga bronse tikang ha hawak ngadto ha igbaw.

³Nakita ko sugad hin kamot nga kinmapot han akon buhok. Niyan dida hini nga panan-awon, ginbayaw ako han espiritu han Dyos ngadto ha panganoron ngan gindara ako ngadto ha Jerusalem. Gindara ako niya ngadto han sulod nga aragian han amihanan nga ganghaan han Templo, diin nakadto in diyosdiyos nga ikinangangalas han Dyos.

⁴Hinkit-an ko didto an mabislaw nga kapawa nga nagpapakita han himaya han Dyos han Israel, sugad han akon paghikit-i hini han nakadto ako ha ligid han Salog Quebar.

⁵Nagsiring ha akon an Dyos, “Anak hin tawo, tan-aw daw tipaamihanan.” Tinman-aw ako, ngan hinkit-an ko didto an diyosdiyos nga ikinangangalas han Dyos ha hirani han altar dida han aragian han ganghaan.

⁶Nagsiring ha akon an Dyos, “Anak hin tawo, hinkikit-an ba nimo an nahinanabo? Tan-awa an makapupungot nga mga butang nga binubuhat dinhe han mga tawo han Israel, nga nagpapaiwas ha akon basi mahirayo ako han akon baraan nga dapit. Makita ka pa hin labaw hini hin kamangil-ad nga mga butang.”

⁷Gindara ako niya ngadto han aragian ha gawas nga bungsaran ngan iginpakita ha akon in usa nga buho dida han pader.

⁸Nagsiring hiya, “Anak hin tawo, lusot dinhe hinin pader.” Linmusot ako ngan hin-agian ko in porta.

⁹Nagsiring hiya ha akon, “Sulod ngan kitaa an magraot ngan mangil-ad nga mga butang nga binubuhat nira didto.”

¹⁰Sanglit sinmulod ako ngan tinman-aw. Luob an mga bungbong hin mga ladawan hin mga halas ngan iba pa nga maghugaw nga kamanampan,[14] ngan han iba pa nga mga butang nga ginsisingba han mga Israelita.

¹¹Nakadto in 70 nga mga pangulo nga Israelita, lakip hi Jasanias nga anak ni Safan. Nakapot hin surudlan hin insyenso an tagsa ha ira, ngan nagtitipaigbaw in aso tikang han insyenso.

¹²Nagpakiana ha akon an Dyos, “Anak hin tawo, hinkikit-an ba nimo an sekreto nga ginbubuhat han mga pangulo nga Israelita? Nagsisingba hira ngatanan dida hin usa nga kwarto nga puno hin mga ladawan. Amo ini an ira baribad: ‘Diri nakita ha aton an GINOO! Ginpabay-an na niya an nasod.’”

¹³Niyan ginsiring ako han GINOO, “Hikikit-an mo hira nga magbubuhat hin labaw pa ngani hito hin kamakapupungot nga mga butang.”

¹⁴Sanglit gindara ako niya ngadto han amihanan nga ganghaan han Templo ngan iginpakita ha akon in kababayen-an nga nananangis tungod han kamatay han diyos nga hi Tamuz.[15]

¹⁵Nagpakiana hiya, “Anak hin tawo, hinkikit-an mo ba ito? Hikikit-an mo in labaw pa ngani hin kamakapupungot nga mga butang.”

¹⁶Sanglit gindara ako niya ngadto han surusulod nga bungsaran han Templo. Didto, ha hirani han agian han baraan nga dapit, nga nabubutnga han altar ngan han balkon, nakadto in mga 25 ka tawo. Natalikod hira han baraan nga dapit ngan nanyuyukbo tipasinirangan, nga nagsisingba han nasirang nga adlaw.

¹⁷Nagsiring ha akon an GINOO, “Anak hin tawo, hinkikit-an mo ba ito? Diri natunga ini nga mga tawo han Juda hin pagbuhat la han ngatanan nga magpakapupungot nga mga butang nga hinkit-an mo dinhe ngan hin pagpasarang hin panlupig ha bug-os nga nasod. Diri, kinahanglan pa gud hira kumanhi ngan buhaton nira ini dinhe gud ha Templo ngan pag-uriton gud ako nira. Tan-awa gudla an ira pagtamay ha akon ha makangaralas gud nga paagi![16]

¹⁸Makakatilaw hira han bug-os nga kusog han akon kapungot. Diri ko hira palilikayon ha akon o kalolooyan. Magoliat hira hin pag-ampo ngadi ha akon, kundi diri ko hira pamamatian.”