Read Waray Samarenyo Meaning Based Daniel 12 Bible Online

Daniel 12 - Waray Samarenyo Meaning Based bible

Daniel 12

¹Nagsiring an anghel nga nakakabado hin lino nga panapton, “Dida hito nga panahon mapakita an dako nga anghel nga hi Miguel nga nagbabantay han imo katawhan. Niyan magkakamay-ada panahon hin mga kasamokan nga labi kamakuri tikang pa han kahimo han kanasoran. Pag-abot hito nga panahon matatalwas an ngatanan nga mga tawo han imo nasod kanay mga ngaran nahisusurat dida han basahon han Dyos.

²Hadton mga nagkamatay na damo in mababanhaw: may-ada ngadto han dayon nga kinabuhi, ngan an iba na man ngadto han dayon nga kakurian.

³Adton may kinaadman magmamalamrag sugad han kamapawa han kalangitan. Adton mga nagtututdo hin damo nga mga tawo hin pagbuhat han matadong, masirang ha kadayonan sugad han bitoon nga waray pagkatunod.”

⁴Nagsiring hiya ha akon, “Ngan yana, Daniel, tipigi an mga pulong ngan kidyoma an basahan ngan silyohi ini ngada han pag-abot han kataposan han kalibutan. Ha diri pa maabot an kataposan, damo nga mga tawo an magkakarag han ira mga paningkamot hin pag- isinasabotan kon ano an nahinanabo.”

⁵Niyan hinkit-an ko in duha ka tawo nga nagkakatukdaw ha ligid hin usa nga salog, an kada usa ha tagsa nga pangpang.

⁶Nagpakiana an usa ha ira ngadto han anghel nga natukdaw didto ha iraya nga dapit, “Tubtob san-o katatapos ini nga urosahon nga mga hinabo?”

⁷Inalsa han anghel an iya mga kamot ngadto ha langit ngan nagsumpa ha ngaran han Waray Kataposan nga Dyos. Hinbatian ko hiya nga nasiring, “Tubtob ini hin tulo ka tuig ug tunga. Kon matapos na pagpakurii an katawhan han Dyos, manhihinabo na ini ngatanan nga mga butang.”

⁸Hinbatian ko an iya iginsiring, kundi waray ako masayod hini. Sanglit pinmakiana ako, “Kundi, uunanhon an pagkatapos hini ngatanan?”

⁹Binmaton hiya, “Kinahanglan lumakat ka na, Daniel, kay hihilomon ngan tatagoon ini nga mga pulong ngada han pag-abot han kataposan.

¹⁰Paglilinisan in damo nga mga tawo. Diri makakasabot adton mga magraot, ngan magpapadayon hira hin pagkamaraot; adton mga makinaadmananon la an makakasabot.

¹¹“Tikang han pagpahunonga han ikinaadlaw nga mga halad nga tinubod, ha aton pa, tikang han panahon han Makaharadlok nga Taran-awon,[28] malabay in 1,290 ka adlaw.

¹²Palaran adton mga nagpapabilin nga matinumanon ngada han paglabay hin 1,335 ka adlaw!

¹³“Ngan ikaw, Daniel, pagmatinumanon tubtob ha kataposan. Niyan mapatay ka, kundi mababanhaw ka hin pagkarawat han imo balos kon umabot na an kataposan nga panahon.”