Read Waray Samarenyo Meaning Based Oseas 1 Bible Online

Oseas 1 - Waray Samarenyo Meaning Based bible

Oseas 1

¹Amo ini an mensahe nga iginhatag han GINOO kan Oseas nga anak ni Beeri, han panahon nga mga hadi han Juda hira Oseas, Jotam, Acas, ug Ezequias, ngan hadi han Israel hi Jeroboam nga anak ni Joas.

²Han syahan nga paghimangraw han GINOO ngadto ha Israel pinaagi kan Oseas, nagsiring hiya kan Oseas, “Pakadto ngan pangasawa; magmamalingo hiya ha imo ngan sugad man an imo mga anak.[1] Ha sugad nga paagi binayaan ako han akon katawhan ngan naglingo hira ha akon.”

³Sanglit nangasawa hi Oseas hin babaye nga ginngaranan kan Gomer nga anak ni Diblaim. Han katawo han ira syahan nga anak, usa nga lalake,

⁴ginsiring han GINOO hi Oseas, “Ngarani hiya kan ‘Jezrael,’ kay diri na mag-iiha nga akon kakastigohon an hadi han Israel tungod han mga pamatay nga ginbuhat han iya ginikanan nga hi Jehu didto ha Jezrael.[2] Tataposon ko an paghadi han panimalay ni Jehu.[3]

⁵Ngan hito nga panahon bubungkagon ko an gahom han kasondalohan han Israel didto han Kahamub-an han Jezrael.”

⁶Nag-anak hi Gomer hin ikaduha, usa nga babaye. Nagsiring kan Oseas an GINOO, “Ngarani hiya kan ‘Diri Hinigugma’ kay diri ko na hihigugmaon o pasasayloon an katawhan han Israel.

⁷Kundi hihigugmaon ko an katawhan han Juda. Ako nga GINOO nga ira Dyos an magtatalwas ha ira, kundi diri ko ini bubuhaton pinaagi hin away—hin mga espada, o hin mga pana, o hin mga kabayo ngan mga dikabayo.”

⁸Han pagkalutasa na ni Gomer han iya anak nga babaye, nagburod na liwat hiya ngan nag-anak hin lalake.

⁹Nagsiring kan Oseas an GINOO, “Ngarani hiya kan ‘Diri-Akon-Katawhan’ kay diri akon katawhan an katawhan han Israel, ngan diri ako ira Dyos.”

¹⁰An katawhan han Israel masusugad han baras han dagat; diri gud ini maiihap o matatakos. Yana nasiring ha ira an Dyos, “Diri kamo akon katawhan,” kundi maabot an adlaw nga masiring hiya ha ira, “Mga anak kamo han buhi nga Dyos!”

¹¹Mauusa na liwat an katawhan han Juda ngan an katawhan han Israel. Magpipili hira para ha ira hin usa la nga pangulo, ngan magdadamo ngan magmamainuswagon na liwat hira didto han ira tuna. Tinuod, magigin dako nga adlaw an adlaw han Jezrael.[4]