Read Waray Samarenyo Meaning Based Oseas 12 Bible Online

Oseas 12 - Waray Samarenyo Meaning Based bible

Oseas 12

¹An ngatanan nga binubuhat han katawhan han Israel tikang han pagkaaga ngadto han pagkagab-i waray gamit ngan nakakadaot. Nagtitidugang an paglingo ngan mga buhat hin panlupig dida ha ira. Nakikigsarabot hira han Asiria ngan nakikigpatigayon hira han Ehipto.”

²May sumbong an GINOO kontra han katawhan han Juda; kakastigohon liwat niya an Israel tungod han binuhatan han iya katawhan. Iya babaloson hira tungod han ira ginbuhat.

³Nakigdulong hi Jacob nga ira ginikanan kan Esau nga iya karuha nga lalake han nakadto pa hira ha tiyan han ira nanay; ngan han dako na hi Jacob nakig-away hiya han Dyos—

⁴nakig-away hiya hin anghel ngan nagdaog hiya. Nagtangis hiya ngan nangaro hin bendisyon. Ngan didto ha Betel nakigkita an Dyos kan Jacob nga aton ginikanan, ngan nakighimangraw ha iya.[37]

⁵Amo ini an GINOO nga Dyos nga Labi Kamakagarahum—an GINOO amo an iya ngaran.

⁶Sanglit yana, kamo nga mga tulin ni Jacob, sarig kamo han iyo Dyos ngan balik kamo ha iya. Pagmaunongon ngan pagmatadong kamo, ngan paghulat kamo nga mapinailubon han Dyos.

⁷Nasiring an GINOO, “Sugad han mga Canaanhon hin kadiri tangkod an katawhan han Israel; maruruyagon hira hin paglimbong han ira mga pumaralit pinaagi hin diri husto nga mga timbangan.

⁸Nasiring hira, ‘Mga riko kami. Nakaangkon kami hin manggad. Ngan waray makakagsumbong ha amon nga diri tangkod an amon pagriko.’

⁹Kundi ako nga GINOO nga iyo Dyos, nga nagpagawas ha iyo tikang han Ehipto amo an magpapaukoy na liwat ha iyo dida hin mga tulda, sugad han iyo ginbuhat han pagkadtoa ko ha iyo didto han kamingawan.

¹⁰“Ginhimangrawan ko an mga manaragna ngan gintagan ko hira hin damo nga mga panan-awon, ngan pinaagi han mga manaragna ginpahimatngon ko an akon katawhan.

¹¹Kundi ginsisingba in mga diyosdiyos didto ha Galaad, ngan magkakamatay adton mga nagsisingba ha ira. Iginhahalad nga tinubod in mga todo didto ha Gilgal, ngan an mga altar didto mahihimo nga mga tinambak nga bato didto han inarado nga kaumhan.”

¹²Kinmalagiw an aton ginikanan nga hi Jacob ngadto ha Mesopotamia, diin nagbudlay hiya para hin lain nga tawo ngan nagmangno han iya mga karnero basi la hiya makaasawa.

¹³Nagsugo hin manaragna an GINOO hin pagtalwas han katawhan han Israel tikang han pagkaoripon didto ha Ehipto ngan hin pagmangno ha ira.

¹⁴Gintukso han katawhan han Israel nga masina hin duro an GINOO; angay gud hira mamatay tungod han ira mga pagtalapas. Pagkakastigohon hira han GINOO tungod han kaarawdan nga ira gindara ha iya.