Read Waray Samarenyo Meaning Based Oseas 13 Bible Online

Oseas 13 - Waray Samarenyo Meaning Based bible

Oseas 13

¹Hadto anay kon naghihimangraw an tribo han Efraim, nahahadlok kaupay an iba nga mga tribo han Israel; tinahod nira an Efraim. Kundi nakasala an mga tawo pinaagi hin pagsingba kan Baal ngan tungod hini mamamatay hira.

²Aada pa hira hin pakasala pinaagi hin paghimo hin metal nga mga ladawan nga pagsisingbahon—mga diyosdiyos nga salapi nga gindibuho pinaagi hin mga hunahuna hin tawo ngan ginhimo pinaagi hin mga kamot hin tawo. Ngan niyan nasiring hira, “Paghalari niyo ini hin mga halad nga tinubod!” Uunanhon hin mga tawo pagharok hito nga mga diyosdiyos—mga diyosdiyos nga hitsura hin mga baka nga todo![38]

³Sanglit mawawara ini nga mga tawo sugad hin burong ha kaagahon, sugad hin tun-og nga napapara ha pagsidlit han adlaw. Sugad hira hin uhot nga iginpapalid tikang han giriokan, sugad hin aso tikang han guruwaan hin aso.

⁴Nasiring an GINOO, “Amo ako an GINOO nga iyo Dyos, nga nagpagawas ha iyo tikang ha Ehipto. Waray kamo iba nga Dyos labot ha akon. Ako la an iyo magtaralwas.

⁵Ginmangnoan ko kamo didto hin mamara nga kamingawan.

⁶Kundi han pagsulod na niyo han tuna nga hura hin pagkaon, nabusog ngan tinmunga kamo, ngan katapos nagmapahitas-on kamo ngan hinngalimtan ako niyo.

⁷Sanglit susulongon ko kamo sugad hin liyon. Sugad hin leyopardo gagamaan ko kamo ha iyo dalan.

⁸Dadasmagan ko kamo sugad hin aso nga nawad-an han iya mga nati, ngan pagpipikaspikason ko an iyo lawas. Sugad hin liyon lalamonon ko kamo dida dayon, ngan sugad hin mapintas nga mananap paghuhunothunoton ko kamo.

⁹“Pupukanon ko kamo, mga tawo han Israel! Niyan hin-o man an makakabulig ha iyo?[39]

¹⁰Nangaro kamo hin hadi ngan hin mga pangulo, kundi uunanhon nira hin pakatalwas han nasod?[40]

¹¹Ha akon kasina tinagan ko kamo hin kahadian, ngan ha akon kapungot kinuha ko hira.

¹²“Nahisurat an sala ug pagtalapas han Israel ngan ginhimos hin maupay an mga sinurat.

¹³May higayon nga mabuhi an Israel, kundi lurong hin duro hira hin pagpahimulos hini—sugad hin bata nga tikatarawo nga nadiri paggawas ha tiyan!

¹⁴Diri ko tatalwason ini nga mga tawo tikang han kalibutan han mga patay o babawion hira tikang han gahom han kamatayon. Hala kamatayon, dad-a na[41] an imo mga peste! Hala, kalibutan han mga patay, dad-a na[42] an imo pagkabungkag! Diri na gud ako malolooy hini nga mga tawo.

¹⁵Bisan maglangbo an Israel sugad hin kabanwaan, magpapadara ako hin mapaso nga hangin nga timog tikang ha kamingawan, ngan magmamara an ira mga burabod ngan mga atabay. Kukuhaon hini an ngatanan nga mga mapulsanon nga butang.

¹⁶Kinahanglan kastigohon an Samaria kay sinmupil hiya ha akon. Magkamatay unta ha pag-awayan an iya mga tawo; ipupusdak ha tuna an mga minasus-an ngan bubon-on an tiyan han mga burod nga kababayen-an.”