Read Waray Samarenyo Meaning Based Oseas 6 Bible Online

Oseas 6 - Waray Samarenyo Meaning Based bible

Oseas 6

¹Nasiring an katawhan, “Balik kita ngadto han GINOO! Ginpasakitan kita niya, kundi tatambalon gud kita niya; ginsamad kita niya, kundi bubutkon niya an aton mga kasamdan.

²Katapos hin duha o tulo ka adlaw bubuhion kita niya ngan mag-uokoy kita ha iya atubangan.

³Talinguhaa ta hin pagkilala han GINOO. Makanhi hiya ha aton sugad han pagpunias han adlaw, sugad han pag-uran ha tuna kon panahon hin pananom o pamugas.”

⁴Kundi nasiring an GINOO, “Israel ug Juda, ano an akon pagbubuhaton ha iyo? An iyo gugma ha akon napapara la dayon sugad han burong ha kaagahon; sugad ini hin tun-og nga napapara ha pagsidlit han adlaw.

⁵Sanglit ginpadara ko ha iyo an akon mga manaragna dara an akon mensahe hin paghukom ug pagpukan. Yano ngan dayag an akon ginkikinahanglan ha iyo:

⁶Karuyag ka an iyo dayuday nga paghigugma, diri an iyo mga hayop nga tinubod. Gabay pa nga kumilala ha akon an akon katawhan kay nga maghalad hira hin mga hayop nga tinubod.

⁷“Kundi han pagsulod gud la nira han tuna didto ha Adan,[17] ginsupak nira an ginsaaran nga akon ginhimo ha ira.

⁸An syudad han Galaad puno hin magraogdaog nga mga tawo ngan mga parapamatay.

⁹An kapadian sugad hin hugpo hin mga tikasan nga nagama hin tawo. Bisan dida han dalan ngadto han baraan nga dapit ha Siquem nanmamatay hira. Ngan tinutuyo gud nira ini ngatanan nga karat-an!

¹⁰Hinkit-an ko didto ha Israel in makangingirhat nga butang: ginhugawan han akon katawhan an ira kalugaringon pinaagi hin pagsingba hin mga diyosdiyos.

¹¹“Ngan mahitungod ha iyo nga katawhan han Juda, nagtalaan ako hin panahon hin pagkastigo ha iyo tungod han iyo binubuhat.