Read Waray Samarenyo Meaning Based Joel 1 Bible Online

Joel 1 - Waray Samarenyo Meaning Based bible

Joel 1

¹Amo ini an mensahe han GINOO ngadto kan Joel nga anak ni Petuel.

²Pamati, kamo nga larolagas nga mga tawo; pamati, kamo ngatanan ha Juda. May-ada na ba nahinabo nga sugad hini yana nga panahon o ha panahon han iyo mga ginikanan?

³Sumati hini an iyo mga anak; susumatan nira an ira mga anak nga magsusumat liwat han nasunod ha ira nga katulinan.

⁴Hinmugdon dida han mga abot in sunodsunod nga kabalay hin mga duron. An nahisalin han mga duron gin-ubos pagkaona han mga lukton.

⁵Pagmata ngan pagtangis, kamo nga mga parahubog. Pagnguyngoy, kamo nga mga parainom hin bino; kay naubos na an mga ubas nga hirimoon nga bag-o nga bino.

⁶Ginhugpaan an aton tuna hin kabalay hin mga duron. Gamhanan hira nga diri gud maiihap; sugad hin kanan liyon kamagtarom an ira mga ngipon.

⁷Gin-ubos nira pagkaona an aton mga tanom nga ubas ngan ginkitkit an aton mga kahoy nga igos. Ginkitkit hin maupay an mga panit han igos nga mabusag na an mga sanga.

⁸Pagnguyngoy, kamo nga mga tawo, sugad hin daraga nga masulob-on tungod han kamatay han lalake nga mangarasawa ha iya.

⁹Waray na pagkaon o bino nga ighahalad didto han Templo; nagmamabidoon an kapadian kay waray nira mga halad para han GINOO.

¹⁰Waray na tanom an kaumhan. Nagmamabidoon an tuna kay nadaot an mga aranihon, nagkauuga an mga ubas, ngan nagkalalaya an mga olibo.

¹¹Pagmabidoon, kamo nga mga parauma. Pagnguyngoy, kamo nga mga magmarangno han mga urubasan, kay waray na gamit an trigo, an sebada, ngan an ngatanan nga mga abot.

¹²Nagkalalaya na an mga ubas ngan an mga igos; sugad man an ngatanan nga mga nabunga nga kahoy. Waray na an kalipay han mga tawo.

¹³Pagbado hin sako ngan pagnguyngoy, kamo nga kapadian nga nag-aalagad dida han altar! Sulod ngadto han Templo ngan pagmasulob-on ha bug-os nga gab-i! Waray na pagkaon o bino nga ighahalad ngadto han iyo Dyos.

¹⁴Pagsugo hin pagpuasa; pagtawag hin katirok! Tiroka an mga pangulo ngan an ngatanan nga mga tawo han Juda ngadto han Templo han GINOO nga iyo Dyos ngan pagsangpit kamo ngadto ha iya!

¹⁵Hirani na an adlaw han GINOO, an adlaw nga magdadara hin kabungkagan an Labi Kamakagarahum. Hin kamakaharadlok han mahinanabo hito nga adlaw!

¹⁶Waray naton nahihimo kundi an pagkinita la samtang ginbubungkag an aton mga abot. Waray na gud kalipay didto han Templo han aton Dyos.

¹⁷Waray manurok an mga binhe nga ginpugas dida han mamara nga tuna. Waray na pagkaon nga paghihimoson, sanglit mga ruba na an waray sulod nga mga kamalig.

¹⁸Nag-iinga ha ira kalisang an kabakahan kay waray na nira panibsiban; nag-aantos liwat an mga panon hin kakarnerohan.

¹⁹Nagtatawag ako ha imo, O GINOO, kay nagkauuga na an mga panibsiban ngan kakahoyan, sugad hin ginsunog ini hin kalayo.

²⁰Bisan an magpintas nga kamanampan nagtatawag ha imo kay nagmara na an mga sapa.