Read Waray Samarenyo Meaning Based Amos 2 Bible Online

Amos 2 - Waray Samarenyo Meaning Based bible

Amos 2

¹Nasiring an GINOO, “Nagpinakasala an mga tawo han Moab, ngan tungod hini pagkakastigohon ko gud hira. Waray nira pagtahora an mga tul-an han hadi han Edumea kay gin-agbon nira ini.

²Pagsusunogon ko an tuna han Moab ngan uugtangon ko an mga kota han Queriot. Magkakamatay an mga tawo han Moab didto ha pag-awayan samtang naggogogliat an mga sondalo ngan nagtutunog an mga trompeta.

³Papatayon ko an punoan han Moab ngan an ngatanan nga mga pangulo han tuna.”

⁴Nasiring an GINOO, “Nagpinakasala an mga tawo han Juda, ngan tungod hini pagkakastigohon ko gud hira. Gintamay nira an akon mga pagturon-an ngan waray nira pagtumana an akon mga sugo. Nahibulag hira han matuod nga dalan tungod han diri matuod nga kadiyosan nga gin-alagad han ira kaapoy-apoyan.

⁵Sanglit pagsusunogon ko an Juda ngan uugtangon ko an mga kota han Jerusalem.”

⁶Nasiring an GINOO, “Nagpinakasala an mga tawo han Israel, ngan tungod hini pagkakastigohon ko gud hira. Ginbabaligya nira nga mga oripon in magtadong nga mga tawo nga diri nakakabayad han ira mga utang, kablas nga mga tawo nga diri nakakabayad bisan la han kanan usa ka padis nga sandalyas.

⁷Tinatamakan[2] nira an mga magluya ngan magpakalolooy ngan tinitikwang nira ha dalan an mga kablas. Nakikighilawas in anak nga lalake ngan an iya amay han amo ngahaw nga oripon nga babaye, ngan tungod hini ginhuhugawan nira an akon baraan nga ngaran.

⁸Ha kada dapit hin pagsingba nahigda hira dida hin mga panapton nga ira nakuha tikang han mga kablas sugad nga bayad hin mga utang. Didto han templo han ira Dyos nainom hira hin bino nga ira sinukot hadton mga utangan ha ira hin kwarta. (2:7, 8)

⁹“Kundi, mga tawo ko, tungod adto ha iyo nga akon ginpuo an mga Amoreohanon nga sugad kahigtaas hin sidro nga mga kahoy ngan sugad kamagrig-on hin mga tuog.

¹⁰Ginpagawas ko kamo tikang ha Ehipto, ginmandoan ko kamo hin paglatas han kamingawan sulod hin 40 ka tuig, ngan iginpatag-iya ko ha iyo an tuna han mga Amoreohanon.

¹¹Ginpili ko in pira han iyo mga anak nga kalalaken-an nga magin mga manaragna, ngan an pira han iyo batan-on nga kalalaken-an nga magin mga Nazarita.[3] Diri ba ini matuod, mga tawo han Israel? Ako nga GINOO an nagyakan.

¹²Kundi ginpainom niyo hin bino an mga Nazarita ngan iyo gindid-an an mga manaragna hin paghimangraw han akon mensahe.

¹³Ngan yana dudugmokon ko kamo ha tuna ngan maghaharoy kamo sugad hin agutiot hin karomata nga kargado hin mga trigo.

¹⁴Waray makakakalagiw bisan pa han maglaksi nga mga paradalagan; manluluya an magkusog nga mga tawo, ngan waray mga sondalo nga makakatalwas han ira kalugaringon nga mga kinabuhi.

¹⁵Waray mga parapana nga makakaasdang, waray makakalikay han maglaksi nga mga paradalagan, ngan waray makakapalagiw han mga dikabayo.

¹⁶Hito nga adlaw bisan an giiisogi nga mga sondalo mabul-iw han ira mga hinganiban ngan magdadadlagan.” An GINOO an nagyakan.