Read Waray Samarenyo Meaning Based Amos 3 Bible Online

Amos 3 - Waray Samarenyo Meaning Based bible

Amos 3

¹Mga tawo han Israel, pamati hini nga mensahe nga ginhimangraw han GINOO hiunong ha iyo, an bug-os nga nasod nga ginpagawas niya tikang ha Ehipto:

²“Han ngatanan nga mga nasod han tuna, kamo la an akon ginkilala ngan ginpanimangno. Amo ito an nakakahimo han iyo mga sala nga uraura hin kamakalilisang, sanglit tungod hini kinahanglan kastigohon ko kamo.”

³Magkakabunyog ba in duha ka tawo hin diri anay hira magsasabot?

⁴Mangurob ba in liyon didto ha kagurangan labot kon hintad-an na an iya paratayon? Nagngungurob ba in nati nga liyon didto han iya luoban labot kon may-ada na hiya nadakpan?

⁵Nabibitik ba in tamsi kon waray pagpaoni an bitik? Nabubukas ba in bitik kon waray magsabod ini?

⁶Nagtutunog ba in trompeta hin away dida hin syudad nga diri ini makapahadlok han mga tawo? Hinahampak ba hin karat-an in syudad labot kon ipadara ini han GINOO?

⁷Diri gud magbubuhat hin bisan ano an Ginoo nga DYOS kon diri anay niya ipadayag an iya pagburot-an ngadto han iya mga surugoon nga mga manaragna.

⁸Kon magngungurob in liyon, hin-o in diri mahahadlok? Kon naghihimangraw an Ginoo nga DYOS, hin-o in makakapugong hin pagsangyaw han iya mensahe?

⁹Pahibaroa adton mga nag-uokoy didto han mga palasyo han Asdod ug Ehipto: “Pagkatirok kamo didto han kapungtoran palibot han Samaria ngan kitaa an dako nga kasamok ngan an mga pagtalapas nga binubuhat didto.”

¹⁰Nasiring an GINOO, “Ginpupuno hini nga mga tawo an ira mga palasyo hin mga butang nga tinikas nira pinaagi hin pagtalapas ug panlupig. Diri ngani hira maaram kon ano an pagkatangkod.

¹¹Sanglit paglilibotan hin kaaway an ira tuna, pagbubungkagon an ira mga kota, ngan paninikasan an ira mga palasyo.”

¹²Nasiring an GINOO, “Sugad nga hin-abotan pa hin magmarangno hin karnero in duha na la nga paa o usa na la nga talinga han karnero nga ginkaon hin liyon, gutiay la liwat an mahisasalin nga buhi han mga tawo han Samaria, nga yana nanhuhundarig dida hin magtahom nga mga higdaan.[4]

¹³Pamati yana ngan pahimatngoni an mga tulin ni Jacob,” nasiring an Ginoo nga DYOS nga Labi Kamakagarahum.

¹⁴“Dida han adlaw nga kastigohon ko na an mga tawo han Israel tungod han ira mga sala, bubungkagon ko an mga altar han Betel. Mapupunggot an mga kanto han kada altar ngan mahuhulog ha tuna.

¹⁵Bubungkagon ko in mga balay han kathagkot ngan mga balay han katpaso. Maruruba an mga balay nga inadornohan hin marpil ngan mabubungkag an dagko nga mga balay.”