Read Waray Samarenyo Meaning Based Amos 5 Bible Online

Amos 5 - Waray Samarenyo Meaning Based bible

Amos 5

¹Pamati, mga tawo han Israel, hini nga masulob-on nga kanta nga akon ginkakanta ha iyo:

²Napukan na an uray nga Israel, Ngan diri na gud mabangon! Nalunay hiya nga ginpasibay-an ha tuna, Ngan waray gud nabulig hin pagbangon ha iya.

³Nasiring an Ginoo nga DYOS, “In usa nga syudad ha Israel mapadara hin usa ka yukot nga mga sondalo, kundi usa la ka gatos an mabalik; mapadara in lain nga syudad hin usa ka gatos, kundi napulo la an mabalik.”

⁴Nasiring an GINOO ha mga tawo han Israel, “Kadi kamo ha akon ngan mabubuhi kamo.

⁵Ayaw kamo pagkadto ha Berseba hin pagsingba. Ayaw kamo pamiling ha akon didto ha Betel—mapupukan na an Betel. Ayaw kamo pagkadto ha Gilgal—mabibihag an iya mga tawo.”

⁶Pakadto kamo ha GINOO ngan mabubuhi kamo. Kon diri kamo kumadto, mabutho hiya sugad hin kalayo ngada han mga tawo han Israel. Susunogon an mga tawo han Betel ngan waray gud makakaparong hini.

⁷Ginhukman na kamo nga naglulubag han katadongan ngan naglilimbong han mga tawo han ira mga katungod!

⁸Ginhimo han GINOO an mga bitoon, an Pleyades ug Orion. Ginhimo niya nga kapawa an kasisidman, ngan gab-i an adlaw. Tinatawag niya an katubigan han dagat, ngan hinuhuwad niya ngada han tuna. An GINOO amo an iya ngaran.

⁹Binubungkag niya an mga gamhanan ngan an ira magrig-on nga mga panalipdanan.

¹⁰Kamo nga mga tawo napupungot hin bisan hin-o nga nagsasaway han diri matadong ngan nagyayakan han bug-os nga kamatuoran didto ha hukmanan.

¹¹Gintalumpigos niyo an mga kablas ngan gintikasan niyo hira han ira mga pagkaon. Sanglit diri kamo mag-uokoy dida han maghusay nga mga balay nga bato nga iyo gintitindog o diri kamo mainom hin bino tikang han magtahom nga mga urubasan nga iyo gintatanom.

¹²Maaram ako nga makalilisang an iyo mga sala ngan damo an mga pagtalapas nga iyo nabuhat. Ginpapakurian niyo an mag-upay nga mga tawo, kinakarawat niyo in mga hukip, ngan ginpupugngan niyo an mga kablas hin pag-angkon hin katadongan didto han mga hukmanan.

¹³Sanglit maupay nala an paghilom ha sugad nga magraot nga mga panahon.

¹⁴Talinguhaa an pagbuhat han matadong ngan diri han maraot, basi mabuhi kamo. Niyan maupod ha iyo hin tinuod an GINOO nga Dyos nga Labi Kamakagarahum, sumala han iyo siring.

¹⁵Pagdumti an maraot, higugmaa an maupay, ngan parig-ona an katadongan didto han mga hukmanan. Bangin malooy an GINOO ha mga tawo hini nga nasod nga nanhisalin pa nga buhi.

¹⁶Sanglit nasiring an Ginoo nga DYOS nga Labi Kamakagarahum, “May-ada mga pagnguyngoy ngan mga pagtangis hin kabido dida han mga kalsada han syudad. Bisan an mga para-uma tatawgon hin pagmasulob-on upod hadton mga sinuholan hin pagmasulob-on.

¹⁷May-ada mga pagnguyngoy didto han ngatanan nga mga urubasan. Mahinanabo ini ngatanan kay makanhi ako hin pagkastigo ha iyo.” An GINOO an nagyakan.

¹⁸Hin kamakalilisang para ha iyo nga ngangangandoy han adlaw han GINOO! Ano man an kaupayan ha iyo hito nga adlaw? Para ha iyo magigin adlaw ini hin kasisidman, ngan diri hin kapawa.

¹⁹Sugad ini hin tawo nga ha paglikay niya hin liyon iginkatapo hin uso! O sugad hin tawo nga nauli ha iya balay ngan ha pagduon ha bungbong tinukob hin halas!

²⁰Magdadara an adlaw han GINOO hin kasisidman ngan diri hin kapawa; adlaw ini hin kadulom nga waray gud pagkamapawa.

²¹Nasiring an GINOO, “Nadiri ako han iyo mga pyesta, makuri ko na mailob ini!

²²Kon maghalad kamo han iyo mga hayop nga tinubod ngan mga halad nga pagkaon, diri ako makarawat hini. Diri ako makarawat han mga mananap nga iyo ginpatambok, nga gindadara nga halad ngadi ha akon.

²³Pahunonga na an iyo mag-aringasa nga mga kanta; diri ako karuyag mamati han iyo mga arpa.

²⁴Paawasa lugod niyo an katadongan sugad hin sapa ngan an pagkamatadong sugad hin salog nga diri gud nagmamara.

²⁵“Mga tawo han Israel, waray ako magkinahanglan hin mga halad nga tinubod ngan mga halad sulod hadto nga 40 ka tuig nga akon pagdara ha iyo hin paglatas han kamingawan.

²⁶Kundi yana, tungod nga ginsingba niyo in mga ladawan ni Sicut nga iyo hadi nga diyos, ngan ni Quiyon nga iyo bitoon nga diyos, dadad-on niyo ito nga mga ladawan

²⁷kon ighalin ko na kamo hin kabihag ngadto hin tuna nga unhan pa han Damasco,” nasiring an GINOO kanay ngaran amo an Dyos nga Labi Kamakagarahum.