Read Waray Samarenyo Meaning Based Amos 6 Bible Online

Amos 6 - Waray Samarenyo Meaning Based bible

Amos 6

¹Hin kamakaharadlok para ha iyo nga an kinabuhi himyang didto ha Sion, ngan para ha iyo nga waray kahadlok ug kakulba an pag-ukoy didto ha Samaria—kamo nga mga dumagko hini nga gamhanan nga nasod nga Israel, kamo nga dinadangpan han mga tawo hin pakibulig.

²Kadtoa ngan kitaa an syudad han Calne. Niyan kadtoa an dako nga syudad han Hamat ngan lugsong ngadto han Filisteohanon nga syudad han Gat. Mauruupay ba hira kay han mga ginhadian han Juda ug Israel? Hiruhiluag ba an ira katunaan kay han iyo?

³Nadiri kamo hin pagtuod nga maabot in adlaw hin karat-an, kundi an iyo binubuhat amo an nakapahirani hito nga adlaw.

⁴Hin kamakaharadlok para ha iyo nga nahundaray dida han iyo magtahom nga mga higdaan, nga nagkikinaon hin karne han mga nati nga baka ug karnero.

⁵Sugad kan David naruruyag kamo hin pagkomposo hin mga kanta, ngan pagtokar hini dida hin mga arpa.

⁶Nagpatakas kamo hin pag-inom hin bino ngan nagamit kamo han gimamaupayi nga mga pahamot, kundi waray kamo pagmasulob-on han karuba han Israel.

⁷Sanglit uunahon kamo hin paghalina nga mga bihag. Matatapos an iyo mga pangaon ngan mga bangkite.

⁸Iginsumpa han GINOO nga Dyos nga Labi Kamakagarahum ini nga pahimatngon: “Napupungot ako han kamapahitas-on han mga tawo han Israel. Gintatamay ko an ira magtahom nga mga palasyo. Itutubyan ko an ira kapital nga syudad ngan an ngatanan nga aada hini ngadto han mga kaaway.”

⁹Kon may-ada napulo nga kalalaken-an nga mahibilin dida hin panimalay, magkakamatay hira.

¹⁰An tawo nga uropod han minatay, nga tinaporan liwat han paglubong, amo an magdadara han minatay ha gawas han balay. Sisidngon an bisan hin-o nga nahibilin pa ha balay, “May-ada pa ba dida iba nga kaupod mo?” Mabaton ito nga tawo, “Waray!” Niyan masiring an uropod, “Hilom! Kinahanglan maghinay kita bisan hin paghinabi han ngaran han GINOO.”[6]

¹¹Kon magsugo na an GINOO, gugubaon an dagko ngan gudti nga mga balay.

¹²Nadalagan ba an mga kabayo dida hin kababtoan? Gin-aarado ba hin mga tawo an dagat pinaagi hin mga baka? Kundi ginhimo niyo nga hilo an katadongan ngan sayop an matadong.

¹³Naghinambog kamo mahitungod han pagbihaga niyo han bungto han Lodebar.[7] Naparayaw kamo, “Nakuha namon an Karnaim[8] pinaagi han amon kalugaringon nga kusog.”

¹⁴Nasiring an GINOO nga Dyos nga Labi Kamakagarahum, “Mga tawo han Israel, susugoon ko in taga gawas nga kasondalohan hin pagsakop han iyo nasod. Pagraraogdaogon kamo hini nga mga sondalo tikang ha Aragian han Hamat didto ha amihanan ngadto han Sapa han Araba didto ha timogan.”