Read Waray Samarenyo Meaning Based Jonas 3 Bible Online

Jonas 3 - Waray Samarenyo Meaning Based bible

Jonas 3

¹Nagyakan na liwat kan Jonas an GINOO.

²Nagsiring hiya, “Kadto ha Ninibe, hito nga bantogan nga syudad, ngan igsangyaw ha mga tawo an mensahe nga iginhatag ko ha imo.”

³Sanglit ginsugot ni Jonas an GINOO ngan kinmadto hiya ha Ninibe nga usa nga hiluag kaupay nga syudad nga tulo gud ka adlaw an paglatas hini.

⁴Nagtikang hi Jonas hin paglatas han syudad ngan kahuman niya paglinakat hin usa ka adlaw, nagsangyaw hiya, “Kwarenta na la ka adlaw ngan pagbubungkagon na an Ninibe!”

⁵Tinmoo han mensahe han Dyos an mga tawo ha Ninibe. Sanglit nagkasarabot hira nga kinahanglan magpuasa an tagsatagsa, ngan magbado hin sako an ngatanan nga mga tawo, tikang han gilalabawi ngadto han giuubosi ha pagpakita nga nagbasol hira.

⁶Han pakabati hini han hadi han Ninibe, linmusad hiya ha iya trono, ginlubas an iya bado nga hilaba, nagbado hiya hin sako, ngan linmingkod hiya dida hin mga agbon.

⁷Nagpagawas hiya hin usa nga pasangyaw ngadto han mga tawo ha Ninibe: “Usa ini nga sugo tikang han hadi ngan han iya mga opisyal: Waray bisan usa nga kumaon hin bisan ano; gindidid-an hin pagkaon o pag-inom an ngatanan nga mga tawo, kabakahan, ngan kakarnerohan.

⁸Kinahanglan magbado hin sako an ngatanan nga mga tawo ngan mga mananap. Kinahanglan an tagsatagsa mag-ampo hin kinasingkasing ngadto han Dyos ngan kinahanglan bayaan an magraot niya nga mga panggawi ngan an mga magraot niya nga mga binuhatan.

⁹Manggad na la magliwat an Dyos han iya hunahuna; manggad na la umukoy na hiya hin kasina ngan diri kita magkamatay!”

¹⁰Hinkit-an han Dyos an ira ginbuhat; hinkit-an niya nga binayaan nira an magraot nira nga mga panggawi. Sanglit ginliwat niya an iya hunahuna ngan waray hira pagkastigoha sumala han iya ginsaad ha ira.