Read Waray Samarenyo Meaning Based Numero 1 Bible Online

Numero 1 - Waray Samarenyo Meaning Based bible

Numero 1

¹Dida han syahan nga adlaw han ikaduha nga bulan han ikaduha ka tuig tikang gumawas ha Ehipto an mga tawo han Israel, naghimangraw an GINOO kan Moises didto han iya Tulda ha Kamingawan han Sinai. Nagsiring hiya,

²“Pag-iihapon niyo ngan hi Aaron an mga tawo han Israel pinaagi hin mga banay ngan pinaagi hin mga panimalay. Iglilista niyo an mga ngaran han ngatanan nga kalalaken-an

³nga 20 o labaw an panuigon nga angay magsondalo.

⁴Hahangyoon niyo hin pagbulig ha iyo in usa nga puno hin banay tikang han kada tribo.”

⁵Amo ini an kalalaken-an nga mga pangulo dida han ira mga tribo nga napili para hini nga buruhaton: [Tribo] — [Puno hin Banay] Ruben — Hi Elizur nga anak ni Sedeur Simeon — Hi Selumiel nga anak ni Zurisadai Juda — Hi Naason nga anak ni Aminadab Isacar — Hi Natanael nga anak ni Zuar Zabulon — Hi Eliab nga anak ni Helon Efraim — Hi Elisama nga anak ni Amiud Manases — Hi Gamaliel nga anak ni Pedasur Benjamin — Hi Abidan nga anak ni Gideoni Dan — Hi Ahiezer nga anak ni Amisadai Aser — Hi Pagiel nga anak ni Ocran Gad — Hi Eliasaf nga anak ni Deuel Neftali — Hi Ahira nga anak ni Enan

¹⁷Binuligan hini nga dose nga kalalaken-an, gintirok nira Moises ug Aaron an bug-os nga bungto dida han syahan nga adlaw han ikaduha nga bulan ngan iginlista an ngatanan nga mga tawo pinaagi hin mga banay ngan pinaagi hin mga panimalay. Iginlista ngan gin-ihap an mga ngaran han ngatanan nga kalalaken-an nga 20 ka tuig o labaw an panuigon,

¹⁹sumala han iginsugo han GINOO. Iginlista ni Moises an mga tawo didto ha Kamingawan han Sinai.

²⁰Iginlista an mga ngaran han kalalaken-an nga 20 ka tuig o labaw an panuigon nga angay magsondalo, sumala han banay ngan hin mga panimalay, tikang han tribo ni Ruben nga suhag nga lalake ni Jacob. Amo inin nasunod an mga total: [Tribo] — [Kadamo] Ruben — 46,500 Simeon — 59,300 Gad — 45,650 Juda — 74,600 Isacar — 54,400 Zabulon — 57,400 Efraim — 40,500 Manases — 32,200 Benjamin — 35,400 Dan — 62,700 Aser — 41,500 Neftali — 53,400 Total: — 603,550

⁴⁷Waray iglista upod han iba nga mga tribo an mga Levita

⁴⁸kay nagsiring an GINOO kan Moises,

⁴⁹“Kon mag-ihap ka han kalalaken-an nga angay magsondalo, ayaw ig-upod an tribo ni Levi.

⁵⁰Himoa lugod an mga Levita nga tinaporan han akon Tulda ngan han ngatanan nga mga kasangkapan hini. Hira an magdadara hini ngan han mga kasangkapan hini; hira an mag-aalagad ngan mag-aataman hini, ngan hira an magkakampo palibot han Tulda.

⁵¹Kada pagbabalhin niyo han iyo kampo, pagbubulkason han mga Levita an Tulda ngan pagtitindogon liwat ini didto han kada bag-o nga karampohan. An bisan hin-o nga humarani han Tulda pagpapatayon.

⁵²Magkakampo an iba nga mga Israelita pinaagi han ira mga hugpok hin mga sondalo an kada tawo upod han iya kalugaringon nga hugpo ngan ha ubos han iya kalugaringon nga bandera.

⁵³Kundi magkakampo an mga Levita palibot han Tulda ha pagbantay hini, basi waray tawo nga humarani ngan mag-aghat han akon kasina hin paghampak han bungto han Israel.”

⁵⁴Sanglit ginbuhat han mga tawo han Israel an ngatanan nga iginsugo han GINOO kan Moises.