Read Waray Samarenyo Meaning Based Numero 11 Bible Online

Numero 11 - Waray Samarenyo Meaning Based bible

Numero 11

¹Nagtikang an mga tawo hin pagngurutob han GINOO hiunong han ira mga kakurian. Han paghibatii ha ira han GINOO, nasina hiya ngan ginpadad-an hin kalayo an mga tawo. Naglarab ini dida ha ira ngan nakasunog hin usa nga kataposan nga dapit han kampo.

²Nagtawag an mga tawo kan Moises hin pakibulig; nag-ampo hi Moises ngadto han GINOO ngan naparong an kalayo.

³Sanglit ginngaranan nga Tabera[4] an dapit kay didto naglarab dida ha ira an kalayo han GINOO.

⁴May mga lumalangyaw nga binmunyog han mga Israelita. Nahidlaw na gud hira hin pagkaon hin karne, ngan bisan an mga Israelita ngahaw nagtikang na hin pagngurutob: “Kon may-ada la unta naton karne!

⁵Didto ha Ehipto hura kita han ngatanan nga isda ngan diri naton pinalit. Nahinunumdom ba kamo han mga pipino, mga sandiya, mga ahos, mga sibuyas, ngan mga lasona?

⁶Kundi yana maluya na kita. Waray na sadang makaon—waray na gud, labot hini nga mana nga masumo na!” (

⁷An mana sugad hin gudtiay nga mga liso nga baga labsag an kamadulaw.

⁸Nagkakataktak ini ngada han kampo kon gab-i upod han tun-og. Ha pagkakaaga nagsusudoy ngan gintitirok ini han mga tawo, ginigiling o binabayo ini nga mahimo nga harina, ngan ginluluto ini ngan ginhihimo ini nga mga magnipis nga torta. An rasa hini sugad hin tinapay nga ginhudno nga sinaktan hin lana hin olibo.)

¹⁰Hinbatian ni Moises an ngurutob han ngatanan nga mga tawo samtang nagpupurupundok hira dida han mga agian han ira mga tulda. Nabido hi Moises kay nasina ha ira an GINOO,

¹¹ngan nagsiring hiya han GINOO, “Kay ano nga ginpakurian mo ako? Kay ano nga nabubudlay ka ha akon? Kay ano nga iginhatag mo ha akon an katungdanan hin pag-alagad hini ngatanan nga mga tawo?

¹²Waray ako magtuha o mag-anak ha ira! Kay ano nga pinapagmangnoan mo hira ha akon nga sugad ako hin yaya nga nagkukugos ha ira sugad hin mga minasus-an ngadto han tuna nga imo iginsaad ha ira kaapoy-apoyan?

¹³Hain ko man kukuhaa in igo nga karne para hini ngatanan nga mga tawo? Nagnginginurutob ngan nag-iinaro hira hin karne.

¹⁴Diri ako makakabaton ha akon kalugaringon hini ngatanan nga mga tawo; mabug-at ini hin duro para ha akon!

¹⁵Kon susugaron mo na manla ako hini, kalooyi ako ngan pataya na la ako, basi diri na ako mag-inantos hin maiha han imo pagkamaisog.”

¹⁶Nagsiring kan Moises an GINOO, “Tiroka in 70 nga tinahod nga mga tawo nga kinikilala nga mga pangulo han bungto, dad-a hira nganhi ha akon didto han akon Tulda, ngan patindoga hira didto, sapit ha imo.

¹⁷Malusad ako ngan makikighimangraw ako ha imo, ngan babahinan ko hira han espiritu nga akon iginhatag ha imo. Niyan makakabulig na hira ha imo hin pagtuman han katungdanan para hini nga mga tawo, ngan diri ka na maglulugaring hin pagdumara ha ira.

¹⁸Yana sidnga an mga tawo, ‘Paglinis kamo han iyo kalugaringon para han buwas nga adlaw; magkakamay-ada na kamo karne nga kakaonon. Hinbatian kamo han GINOO nga nagnginginorutob ngan sinasablok na kamo hin karne, ngan nasiring kamo, “Mauruupay pa an amon kamutangan didto ha Ehipto.” Yana tatagan kamo han GINOO hin karne nga kakaonon niyo.

¹⁹Kakaonon ini niyo diri la hin usa ka adlaw, o lima, o napulo, o bisan pa 20 ka adlaw,

²⁰kundi sulod hin bug-os nga bulan, tubtob han pagsumhi ngan pagluwara ha iyo, nga kamo na an madiri hin pagkaon. Mahinanabo ini kay iginsikway niyo an GINOO nga aanhi kaupod niyo, ngan nagngurutob kamo ha iya nga maupay pa unta waray kamo bumaya han Ehipto.’”

²¹Nagsiring hi Moises han GINOO, “Iini ako nga nagmamangulo hin 600,000 nga mga tawo, ngan nasiring ka nga tatagan mo hira hin karne nga igo para hin usa ka bulan?

²²May sadang ba kadamo nga mga baka ngan mga karnero para ha ira? Igo ba para ha ira an ngatanan nga kaisdaan ha dagat?”

²³Binmaton an GINOO, “May-ada ba katubtoban an akon gahom? Makita ka kon mahinanabo ba o diri an akon iginsiring!”

²⁴Sanglit ginmawas hi Moises ngan ginsumatan niya an mga tawo han iginsiring han GINOO. Gintirok niya in 70 han mga pangulo ngan iginbutang hira palibot han Tulda.

²⁵Niyan linmusad an GINOO dida han dampog ngan nakighimangraw ha iya. Kinuha niya in bahin han espiritu nga iginhatag niya kan Moises ngan iginhatag ini ngadto han 70 nga mga pangulo. Han katagi na ha ira han espiritu, naggogliat hira sugad hin mga manaragna, kundi waray la pag-iha.

²⁶Nagpabilin didto han kampo in duha han 70 nga mga pangulo, hira Eldad ug Medad, ngan waray hira gumawas ngadto han Tulda. Didto han kampo ihinatag ha ira an espiritu ngan naggogliat liwat hira sugad hin mga manaragna.

²⁷Dinmalagan in usa nga batan-on nga lalake hin pagsumat kan Moises han ginbubuhat nira Eldad ug Medad.

²⁸Niyan nagyakan hi Josue nga anak ni Nun, nga nagin kabulig ni Moises tikang han batan-on pa hiya, ngan nagsiring kan Moises, “Agaron, sawaya hira!”

²⁹Binmaton hi Moises, “Nababaraka ka ba tungod han akon kaupayan? Ihatag unta han GINOO an iya espiritu ngadto han ngatanan niya nga mga tawo, ngan paguliaton hira ngatanan sugad hin mga manaragna!”

³⁰Niyan binmalik ngadto han kampo hira Moises ngan an 70 nga mga pangulo han Israel.

³¹Ha gilayon inmabot in hangin nga sugo han GINOO nga nagdara hin usa ka panon hin mga tuhil tikang ha dagat, nga nagkakalupad hin usa ka metro ha bawbaw han tuna. Nanhugdon ini dida han kampo ngan ginluob nira palibot han kampo ngan haluag hin duro an ira ginhagdonan.[5]

³²Sanglit nagpinanakop an mga tawo hin mga tuhil ha bug-os hito nga adlaw ug gab-i, ngan ha bug-os pa han sunod nga adlaw; waray usa nga nakatirok hin kulang hin usa ka sako. Gin-ihaw ngan ginbulad nira ini palibot han kampo.

³³Samtang damo pa an ira pagkaon nga karne, nasina han mga tawo an GINOO, ngan ginpadara in sakit ngada ha ira.

³⁴Ginngaranan adto nga dapit hin Kibrot-Hataara o “Mga Lubnganan hin Pag-ungara” kay didto iginlubong nira an mga tawo nga nag-ungara hin karne.

³⁵Tikang didto nagbalhin han kampo an mga tawo ngadto ha Hazerot.