Read Waray Samarenyo Meaning Based Numero 19 Bible Online

Numero 19 - Waray Samarenyo Meaning Based bible

Numero 19

¹Ginsugo han GINOO hira Moises ug Aaron

²hin paghatag ha mga Israelita han masunod nga mga turumanon. Pagdara hin usa nga pula nga baka nga waray mga dum-it ngan waray pa gamita hin pag-uma,

³ngan ighatag ini kan Eleazar nga padi. Pagdadad-on ini ha gawas han kampo ngan pag-iihawon ha iya atubangan.[14]

⁴Niyan makuha hi Eleazar hin dugo hini ngan pinaagi han iya tudlo iwawarikwik hin makapito tipakadto han Tulda.

⁵Pagtutuboron ha atubangan han padi an bug-os nga baka, lakip an panit, unod, dugo ngan mga tinae.

⁶Niyan makuha hiya hin kahoy nga sidro, usa nga sanga hin isopo, ngan usa nga pula nga lubid, ngan ilalabay ini ngadto han kalayo.

⁷Katapos, paglalabhan niya an iya panapton ngan makarigos hiya, ngan onina makakasulod na hiya han kampo; kundi mahugaw la hiya gihapon sumala han seremonyas ngada han pagkagab-i.

⁸Kinahanglan maglaba liwat han iya panapton an tawo nga nagtubod han baka, ngan makarigos hiya, kundi mahugaw la hiya gihapon ngada han pagkagab-i.

⁹Niyan titirokon hin usa ka tawo nga malinis sumala han seremonyas an mga agbon han tinubod nga baka ngan igbubutang ini dida hin usa nga dapit nga malinis sumala han seremonyas ha gawas han kampo, diin hihiposon ini para han bungto nga Israelita, ngan gagamiton ini hin pag-andam han tubig para han seremonyas hin paglinis. Binubuhat ini nga seremonyas hin pagkuha hin sala.

¹⁰Kinahanglan maglaba han iya panapton an tawo nga nagtirok han agbon, kundi mahugaw pa hiya ngada han pagkagab-i. Diri ini mababalhin nga turumanon ha ngatanan nga panahon nga tiarabot han mga Israelita ngan han mga lumalangyaw nga nag-uokoy dida ha ira.

¹¹An bisan hin-o nga magkamkam hin minatay mahugaw hiya sumala han seremonyas sulod hin pito ka adlaw.

¹²Kinahanglan maglinis hiya han iya kalugaringon pinaagi han tubig para hin paglinis dida han ikatulo ngan han ikapito ka adlaw, ngan onina magmamalinis hiya. Kundi kon diri hiya maglinis han iya kalugaringon dida han ikatulo ngan han ikapito ka adlaw, diri hiya magmamalinis.

¹³Mahugaw la gihapon an bisan hin-o nga magkamkam hin minatay ngan diri maglinis han iya kalugaringon, kay waray hiya kahugasi han tubig para hin paglinis. Ginhuhugawan niya an Tulda han GINOO, ngan diri na gud hiya pag-iisipon nga sakop han mga tawo han Dyos.

¹⁴Hiunong hin usa ka tawo nga mapatay ha sakob hin usa nga tulda, an bisan hin-o nga aada ha sakob hini nga tulda o sumulod hini ha panahon han kamatay hini nga tawo, nagmamahugaw sumala han seremonyas sulod hin pito ka adlaw.

¹⁵Nagmamahugaw liwat an tagsa nga tibod o daba nga waray takop[15] ha sakob han tulda.

¹⁶Kon may tawo nga magkamkam hin tawo nga ginpatay o namatay ha iya la kalugaringon ha gawas hin balay, o kon may tawo nga magkamkam hin tul-an hin tawo o hin lubnganan, nagmamahugaw hiya sulod hin pito ka adlaw.

¹⁷Basi makuha an pagkamahugaw, makuha hin mga agbon han pula nga baka nga gintubod nga ginhalad tungod hin sala ngan igsusulod ini dida hin usa nga daba ngan dudugangan ini hin puraw nga tubig.

¹⁸Mahitungod han syahan nga paagi, makuha in tawo nga malinis sumala han seremonyas hin usa nga sanga hin isopo, itutunlob ini dida han tubig, ngan pagsasabligan niya an tulda, an ngatanan nga mga butang dida hini, ngan an mga tawo nga aadto ha sakob. Mahitungod han ikaduha nga paagi, an tawo nga malinis sumala han seremonyas amo an magsasablig han tawo nga kinmamkam han tul-an hin tawo o han patay nga lawas o han lubnganan.

¹⁹Dida han ikatulo ngan han ikapito ka adlaw, isasablig han tawo nga malinis sumala han seremonyas an tubig ngadto han mahugaw nga tawo. Dida han ikapito ka adlaw paglilinisan niya an tawo. Kahuman hini nga tawo maglaba han iya panapton ngan kumarigo, magmamalinis na hiya ha pagkatunod han adlaw.

²⁰An bisan hin-o nga nagmahugaw sumala han seremonyas ngan diri maglinis han iya kalugaringon, nagpapabilin nga mahugaw la gihapon kay waray hiya kahugasi han tubig para hin paglinis. Ginhuhugawan niya an Tulda han GINOO ngan diri na gud hiya pag-iisipon nga sakop han mga tawo han Dyos.

²¹Pagsusundon niyo ini nga turumanon ha ngatanan nga panahon nga tiarabot. Kinahanglan liwat maglaba han iya panapton an tawo nga nagsablig han tubig para hin paglinis; nagpapabilin nga mahugaw sumala han seremonyas ngada han pagkagab-i an bisan hin-o nga magkamkam han tubig.

²²Mahugaw an bisan ano nga pagkamkamon hin usa nga mahugaw nga tawo, ngan an bisan hin-o nga magkamkam han butang nga ginkamkam han mahugaw nga tawo nagpapabilin nga mahugaw ngada han pagkagab-i.