Read Waray Samarenyo Meaning Based Numero 2 Bible Online

Numero 2 - Waray Samarenyo Meaning Based bible

Numero 2

¹Iginhatag han GINOO kanda Moises ug Aaron an masunod nga mga tugon.

²Kon magkampo an mga Israelita, magkampo an kada tawo ha ubos han iya hugpo hin kasondalohan ngan han bandera han iya kalugaringon nga banay. Pagtitindogon an kampo palibot han Tulda.

³Didto ha sinirangan, magkakampo ha ira mga hugpo adton mga sakop han bandera han hugpo hin kasondalohan ni Juda ha ubos han ira mga pangulo, sumala han masunod: [Tribo] — [Pangulo] — [Kadamo] Juda — Hi Naason nga anak ni Aminadab — 74,600 Isacar — Hi Natanael nga anak ni Zuar — 54,400 Zabulon — Hi Eliab nga anak ni Helon — 57,400 — Total: — 186,400 Mag-uuna hin pagmartsa an hugpo hin kasondalohan ni Juda.

¹⁰Didto ha timogan, magkakampo ha ira mga hugpo adton mga sakop han bandera han hugpo hin kasondalohan ni Ruben ha ubos han ira mga pangulo, sumala han masunod: [Tribo] — [Pangulo] — [Kadamo] Ruben — Hi Elizur nga anak ni Sedeur — 46,500 Simeon — Hi Selumiel nga anak ni Zurisadai — 59,300 Gad — Hi Eliasaf nga anak ni Deuel — 45,650 — Total: — 151,450 An ikaduha nga mamartsa amo an hugpo hin kasondalohan ni Ruben.

¹⁷Niyan magmamartsa an mga Levita ha butnga han syahan nga duha nga mga hugpo hin kasondalohan ngan han kataposan nga duha, ngan dadad-on nira an Tulda. Magmamartsa an kada hugpo hin kasondalohan sugad han pagkasunodsunod han ira pagkampo, ngan an kada usa ha ubos han bandera han iya hugpo.

¹⁸Didto ha katundan, magkakampo ha ira mga hugpo adton mga sakop han bandera han hugpo hin kasondalohan ni Efraim ha ubos han ira mga pangulo, sumala han masunod: [Tribo] — [Pangulo] — [Kadamo] Efraim — Hi Elisama nga anak ni Amiud — 40,500 Manases — Hi Gamaliel nga anak ni Pedasur — 32,200 Benjamin — Hi Abidan nga anak ni Gideoni — 35,400 — Total: — 108,100 Ikatulo nga magmamartsa an hugpo hin kasondalohan ni Efraim.

²⁵Didto ha amihanan, magmamartsa ha ira mga hugpo adton mga sakop han bandera han hugpo hin kasondalohan ni Dan ha ubos han ira mga pangulo, sumala han masunod: [Tribo] — [Pangulo] — [Kadamo] Dan — Hi Ahiezer nga anak ni Amisadai — 62,700 Aser — Hi Pagiel nga anak ni Ocran — 41,500 Neftali — Hi Ahira nga anak ni Enan — 53,400 — Total: — 157,600 Magmamartsa ha kataposan an hugpo hin kasondalohan ni Dan.

³²An kadamo han mga tawo han Israel 603,550 nga iginlista dida han mga hugpo hin kasondalohan pinaagi hin huruhugpo.

³³Waray iglista an mga Levita upod han iba nga mga Israelita, sumala han iginsugo han GINOO kan Moises.

³⁴Sanglit ginbuhat han mga tawo han Israel an ngatanan nga iginsugo han GINOO kan Moises. Nagkampo hira, nga an kada usa nakada ha ubos han iya kalugaringon nga bandera, ngan nagmartsa hira, nga an kada usa kaupod han iya kalugaringon nga banay.