Read Waray Samarenyo Meaning Based Numero 22 Bible Online

Numero 22 - Waray Samarenyo Meaning Based bible

Numero 22

¹Nagpadayon pagbaktas an mga Israelita ngan nagkampo hira didto han kapatagan han Moab, ha sinirangan han Jordan ngan tugbang han Jerico.

²Han pakabati la ni Balak nga hadi han Moab, nga anak ni Zipor, han kadamo han mga Israelita ngan han ira ginbuhat han mga Amoreohanon,

³nahadlok hin duro hiya ngan an ngatanan nga mga tawo niya.

⁴Nagsiring an mga taga-Moab ngadto han mga pangulo han mga Midianitanhon, “Diri maiha pupuohon hini nga hugpo an ngatanan nga palibot ha aton, sugad ini hin usa nga todo nga baka nga nananabsab han mga banwa hin usa nga panabsaban.” Sanglit may-ada hi Hadi Balak ginsugo hin pagtawag kan Balaam nga anak ni Beor, nga nakadto ha Petor, hirani han salog Eufrates, didto han tuna han Amav. Gindad-an nira hi Balaam hini nga tugon tikang kan Balak: “Karuyag ko nga imo hibaroan nga inmabot tikang ha Ehipto in usa nga bug-os nga nasod; naluluob an ngatanan nga dapit hini nga mga tawo ngan nag-uokoy hira atbang la ha akon.

⁶Damo hin duro hira kay ha aton, sanglit pakadi gad ngan tungloa hira para ha akon. Niyan bangin makadaog na kita ha ira ngan makapaiwas ha ira tikang han tuna. Maaram ako nga kon nagbebendisyon ka, naghihingaupay an mga tawo, ngan kon nagtutunglo ka, naghihingaraot hira.”

⁷Sanglit gindara han mga taga-Moab ngan taga-Midian nga mga pangulo an bayad para han pagtunglo, kinmadto hira kan Balaam, ngan iginhatag ha iya an tugon ni Balak.

⁸Ginsiring hira ni Balaam, “Pabilin kamo dinhe yana nga gab-i, ngan buwas susumatan ko kamo han bisan ano nga igyakan ha akon han GINOO.” Sanglit nagpabilin upod kan Balaam an mga pangulo nga taga-Moab.

⁹Kinmada kan Balaam an Dyos ngan nagpakiana, “Hin-o ini nga mga tawo nga kaupod mo?”

¹⁰Binmaton hiya, “Ginsugo hira ni Hadi Balak han Moab hin pagsumat ha akon

¹¹nga nakakaluob na ha bug-os nga tuna in usa nga hugpo hin mga tawo nga nagkaabot tikang ha Ehipto. Karuyag niya nga pagtunglohon ko hira para ha iya, basi makaaway hiya ha ira ngan makapaiwas ha ira.”

¹²Nagsiring kan Balaam an Dyos, “Ayaw pag-upod hini nga mga tawo ngan ayaw pagtunglo-a an mga tawo han Israel, kay ginbendisyonan ko hira.”

¹³Han pagkaaga na, ginkadto ni Balaam an mga sinugo ni Balak ngan ginsiring hira, “Oli na la kamo; waray ako tugoti han GINOO hin pag-upod ha iyo.”

¹⁴Sanglit binmalik hira ngadto kan Balak ngan ginsumatan nira hiya nga dinmiri hi Balaam hin pag-upod ha ira.

¹⁵Niyan nagsugo hi Balak hin darudamo nga mga pangulo nga mas dungganan kay han tuna.

¹⁶Kinmadto hira kan Balaam ngan iginhatag ha iya ini nga tugon tikang kan Balak: “Ayaw gad pagpaulang hin bisan ano hin pagkadi ha akon!

¹⁷Babaloson ko ikaw hin maupay ngan tutumanon ko an bisan ano nga imo igsiring. Pakadi gad ngan tunglo-a ini nga mga tawo para ha akon.”

¹⁸Kundi binmaton hi Balaam, “Bisan pa ihatag ha akon ni Balak an ngatanan nga salapi ug bulawan didto han iya palasyo, diri ako makakasupak han sugo han GINOO nga akon Dyos. Tutumanon ko gud an gigugutiayi nga butang han iya sugo.

¹⁹Kundi pabilin kamo dinhe yana nga gab-i sugad han ginbuhat han iba, basi hibaroan ko kon may-ada ba o waray iba nga igsusumat ha akon han GINOO.”

²⁰Hito nga gab-i kinmada kan Balaam an Dyos ngan nagsiring, “Kon kinmanhi ini nga mga tawo hin paghangyo ha imo nga umupod ka ha ira, pag-andam ngan upod, kundi buhata la an akon igsisiring ha imo.”

²¹Sanglit han pagkaaga, ginmuntorahan ni Balaam an iya asno ngan inmupod hiya han taga-Moab nga mga pangulo.

²²Nasina an Dyos nga inmupod hi Balaam ngan han nasakay hi Balaam han iya asno, nga inupdan han duha niya nga surugoon, tinmindog dida ha dalan an anghel han GINOO hin pag-ulang ha iya.

²³Han pakakita han asno nga natindog didto an anghel, nga nakakakapot hin espada, sinmimang ini han dalan ngan napakadto han kaumhan. Ginlatob ni Balaam an asno ngan ginpabalik ini ngadto han dalan.

²⁴Niyan tinmindog an anghel dida han masigpit nga dalan, nga nabubutnga hin duha nga mga urubasan nga ha paluyo may-ada pader nga bato.

²⁵Han pakakita la han asno han anghel, pinmaligid an asno han pader ngan naipit an tiil ni Balaam. Ginlatob na liwat ni Balaam an asno hin pagpalakat.

²⁶Linmakat liwat ngadto ha unhan an anghel; tinmindog hiya dida hin masigpit nga dapit nga waray gud sadang agian ha ligid.

²⁷Hini nga takna, han pakakita la han asno han anghel, linmuob an asno. Waray na hi Balaam makapugong han iya kasina ngan ginlatob niya an asno han iya tungkod.

²⁸Niyan gintagan han GINOO hin gahom hin pagyakan an asno ngan nagsiring ini kan Balaam, “Ano an ginbuhat ko ha imo? Kay ano nga ginlatob mo ako hin makatulo na?”

²⁹Binmaton hi Balaam, “Kay gin-uwat mo la ako! Kon may-ada ko la espada, pinapatay ko gud ikaw.”

³⁰Binmaton an asno, “Diri ba ako an amo ngahaw nga asno nga imo sarakyan ha bug-os mo nga kinabuhi? Ginbuhat ko na ba ha imo hadto in sugad hini?” “Waray,” binmaton hiya.

³¹Niyan ginpakita han GINOO hi Balaam han anghel nga natindog didto, nga nakapot han iya espada; ngan hinmapa hi Balaam ha tuna.

³²Pinmakiana an anghel, “Kay ano nga ginlatob mo hin sugad hini an imo asno hin makatulo na? Kinmanhi ako hin pag-ulang han imo dalan, kay diri ka unta angay lumakat.[24]

³³Kundi hinkit-an ako han imo asno ngan sinmimang ini hin makatulo. Kon waray ini sumimang, pinapatay ko unta ikaw ngan binubuhian ko an asno.”

³⁴Binmaton hi Balaam, “Nakasala ako. Diri ako maaram nga natindog ka ha dalan hin pag-ulang ha akon; kundi yana kon naghuhunahuna ka man nga sayop para ha akon an pagpadayon, maoli na la ako.”

³⁵Kundi nagsiring an anghel, “Upod na la hini nga mga tawo, kundi igyakan la an igsisiring ko ha imo.” Sanglit inmupod ha ira hi Balaam.

³⁶Han pakabati ni Balak nga tiabot hi Balaam, gintapo niya hi Balaam didto ha Ar nga usa nga syudad ha tangpi han Salog Arnon didto han pag-ultan han Moab.

³⁷Nagsiring ha iya hi Balak, “Kay ano nga waray ka kumanhi han syahan nga pagpasugoi ko ha imo? Naghunahuna ka ba nga diri ako makakabalos ha imo hin igo?”

³⁸Binmaton hi Balaam, “Aanhi na ako, di' ba? Kundi yana, ano man in akon gahom? Makakaghimangraw la ako han igsisiring ha akon han Dyos.”

³⁹Sanglit inmupod hi Balaam kan Balak ngadto han bungto han Quiriat-huzot,

⁴⁰diin nag-ihaw hi Balak hin mga baka ngan mga karnero, ngan tinagan niya han karne hi Balaam ngan an mga pangulo nga upod niya.

⁴¹Han pagkaaga gindara ni Balak hi Balaam ngadto ha igbaw han Bamot-baal, diin hinkikit-an ni Balaam in usa ka hugpo han mga tawo han Israel.