Read Waray Samarenyo Meaning Based Numero 24 Bible Online

Numero 24 - Waray Samarenyo Meaning Based bible

Numero 24

¹Ngada yana hinbaroan na ni Balaam nga karuyag han Dyos nga iya pagbendisyonan an mga tawo han Israel, sanglit waray na hiya magpamulat hin mga magraot nga tigaman sugad han iya ginbuhat hadto. Inmatubang hiya han kamingawan

²ngan hinkit-an niya an mga tawo han Israel nga nagkampo pinaagi han ira mga tribo. Pinmakada ha iya an espiritu han Dyos,

³ngan iginyakan niya ini nga panagna: “An tugon ni Balaam nga anak ni Beor, An mga pulong han tawo nga dayag an pagkita[26]

⁴Ngan an pamati han iginyayakan han Dyos. Ha akon pagtutok, nakita ako dida hin usa nga inop Usa nga panan-awon nga tikang han Dyos nga Labi Kamakagarahum.

⁵Magtahom an mga tulda han Israel,

⁶Sugad hin namamarapara nga rumbay hin mga palmera Sugad hin mga tanaman ha ligid hin salog, Sugad hin mga bukad nga igintanom han GINOO, O hin mga sidro ha ligid han tubig.

⁷Magkakamay-ada hira hura nga uran Nga magtutubig han mga kaumhan nga pagtatamnan han ira binhe.[27] Mas gamhanan kay kan Agag an ira hadi, Ngan maabot an iya ginhadian ngadto ha kahigrayoan.

⁸Ginpagawas hira han Dyos tikang ha Ehipto; Nakig-away hiya tungod ha ira sugad hin ihalas nga baka. Linalam-oy nira an ira mga kaaway, Dinudugmok an ira mga tul-an, binabari an ira mga pana.

⁹Sugad an nasod hin usa nga makusog nga liyon; Kon nakaturog ini waray magpapasipara hin pagpukaw. Bebendisyonan an bisan hin-o nga nagbebendisyon han Israel, Ngan tutunglohon an bisan hin-o nga magtunglo han Israel.”

¹⁰Ginkumo ni Balak an iya mga kamauo tungod hin kasina ngan nagsiring kan Balaam, “Gintawag ko ikaw hin pagtunglo han akon mga kaaway, kundi makatulo na yana nga imo lugod hira ginbendisyonan.

¹¹Sanglit yana oli na la! Nagsaad ako hin pagbalos ha imo, kundi ginpugngan ka han GINOO hin pagkarawat han balos.”

¹²Binmaton hi Balaam, “Ginsiring ko an imo mga sinugo ha akon nga

¹³bisan kon ihatag mo ha akon an ngatanan nga salapi ug bulawan didto han imo palasyo, diri ako makakasupak han sugo han GINOO pinaagi hin pagbuhat hin bisan ano ha akon la kalugaringon. Ighihimangraw ko la an ipinapagyakan ha akon han GINOO.”

¹⁴Nagsiring kan Balak hi Balaam, “Yana maoli na ako ngadto han akon kalugaringon nga mga tawo, kundi nga diri pa ako malakat, ginpapahimatngon ko ikaw kon ano an pagbubuhaton han mga tawo han Israel ngadto han imo mga tawo ha tiarabot nga panahon.”

¹⁵Niyan iya iginyakan ini nga panagna: “An tugon ni Balaam nga anak ni Beor, An mga pulong han tawo nga dayag an pagkita,[28]

¹⁶Ngan an pamati han iginyayakan han Dyos Ngan nakarawat han hibaro nga natikang han Gihahataasi. Ha akon pagtutok nakita ko dida hin inop Usa nga panan-awon nga tikang han Dyos nga Labi Kamakagarahum.

¹⁷Tinatan-aw ko an panahon nga tiarabot, Ngan nakita ako han nasod han Israel. Mabangon dida hini nga nasod in usa nga hadi nga sugad hin mapawa nga bitoon. Mapakita in baston tikang ha Israel. Hahampakon niya an mga pangulo han Moab Ngan lalatobon niya an ngatanan nga mga tawo han Set.[29]

¹⁸Dadag-an niya an iya mga kaaway didto ha Edumea, Ngan tatag-iyahon niya an ira tuna, Samtang nagpapadayon nga madaogon an Israel.

¹⁹Pagtatamaktamakan hira han nasod han Israel, Ngan pagpupuohon an mga nanhisalin nga buhi.”

²⁰Niyan dida han iya panan-awon hinkit-an ni Balaam an mga Amalekanhon ngan iginyakan niya ini nga panagna: “An Amalek amo an labi kagamhanan han ngatanan nga mga nasod, Kundi ha kataposan mawawara ini ha kadayonan.”

²¹Dida han iya panan-awon hinkit-an niya an mga Kinitanhon, ngan iginyakan niya ini nga panagna: “Marig-on gud an dapit mga imo inuokyan, Waray kataragman sugad hin usa nga salag nga didto hin hitaas nga umpas.

²²Kundi pupuohon kamo nga mga Kinitanhon Kon pagbihagon na kamo han Asiria.”[30]

²³Iginyakan ni Balaam ini nga panagna: “Hin-o ini nga mga tawo nga nagtitirok didto ha amihanan?[31]

²⁴Magsasakay an mga parasulong tikang ha Kitim; Pipirdehon nira an Asiria ug Heber, Kundi mawawara liwat an Kitim ha kadayonan.”

²⁵Niyan nag-andam hi Balaam ngan inmoli hiya, ngan limakat man hi Balak.