Read Waray Samarenyo Meaning Based Numero 25 Bible Online

Numero 25 - Waray Samarenyo Meaning Based bible

Numero 25

¹Han pagkampo han mga Israelita didto han Kahamub-an han Akasya, nagtikang an kalalaken-an nga Israelita hin pakighilawas han kababayen-an nga Moabita nga nag-ukoy didto.

²Gindapit hira hini nga kababayen-an hin pagtambong han ira paghalad hin mga hayop nga tutuboron. An mga Israelita nangaon hini nga mga halad ngan nagsingba han diyos ni Moab,

³nga amo hi Baal han Peor. Sanglit nasina ha ira an GINOO

⁴ngan nagsiring kan Moises, “Kuhaa an ngatanan nga mga pangulo han Israel ngan, ha pagsugot ha akon, pamataya hira ha atubangan han mga tawo[32] ngan diri na gud ako masisina han mga tawo.”

⁵Ginsiring ni Moises an mga opisyal, “An kada usa ha iyo kinahanglan magpatay han ngatanan dida han iyo tribo nga nagsingba kan Baal han Peor.”

⁶Nagdara in usa han mga Israelita hin babaye nga taga-Midian ngadto han iya tulda ha atubangan ni Moises ngan han bug-os nga bungto samtang nagmamabidoon hira didto han agian han Tulda han GINOO.

⁷Han paghikit-i hini ni Pinehas nga anak ni Eleazar ngan apo ni Aaron nga padi, binmuhat hiya ngan binmaya han katirok. Kinmuha hiya hin usa nga bangkaw,

⁸ginsunod an lalake ngan an babaye ngadto han tulda, ngan ginbangkaw hira ngan natahos an ira mga lawas. Dida hini hinmunong an sakit nga nakamatay hin mga tawo han Israel,

⁹kundi 24,000 nga mga tawo an namatay han sakit.

¹⁰Nagsiring kan Moises an GINOO,

¹¹“Tungod han ginbuhat ni Pinehas, diri na ako nasisina han mga tawo han Israel. Waray niya pagpasagdi an pagsingba hin bisan ano nga diyos labot ha akon, sanglit waray ko hira pagpuoha tungod han akon kasina.

¹²Sanglit sumati hiya nga maghihimo ako ha iya hin usa nga ginsaaran nga magpapadayon ha ngatanan nga panahon nga tiarabot.

¹³Magpapahimulos hiya ngan an iya mga tulin hin ka padi ha kadayonan, ngan waray gud maliwan ha ira kay waray hiya tumugot hin iba nga diyos labot ha akon, ngan hiya an nagtalinguha nga mapasaylo an sala han mga tawo.”

¹⁴An ngaran han Israelita nga ginpatay upod han babaye nga taga-Midian amo hi Simri nga anak ni Salu, nga pangulo hin usa nga panimalay dida han tribo ni Simeon.

¹⁵Hi Cosbi an ngaran han babaye. Hi Zur nga amay ni Cosbi amo in usa nga punoan hin hugpo hin mga taga-Midian nga mga banay.

¹⁶Ginsugo han GINOO hi Moises,

¹⁷“Sulonga an mga Midianitanhon ngan puoha hira,

¹⁸tungod han karat-an nga ginbuhat nira ha iyo han ira paglimbong ha iyo didto ha Peor, ngan tungod kan Cosbi nga ginpatay ha panahon han pag-abot han sakit didto ha Peor.”