Read Waray Samarenyo Meaning Based Numero 26 Bible Online

Numero 26 - Waray Samarenyo Meaning Based bible

Numero 26

¹Katapos han sakit nga ginpadara han GINOO, nagsiring an GINOO kanda Moises ug Eleazar nga anak ni Aaron,

²“Pag-ihapa pinaagi hin mga panimalay an bug-os nga bungto han Israel, an ngatanan nga kalalaken-an nga 20 ngadto ha igbaw an panuigon nga angay na magsondalo.”

³Gintuman nira Moises ug Eleazar an sugo ngan gintirok an ngatanan nga kalalaken-an hito nga panuigon. Nagtirok hira didto han kapatagan han Moab, nga tabok han Salog Jordan tikang ha Jerico. Amo ini an mga Israelita nga nagkagawas tikang ha Ehipto:

⁴

⁵An tribo ni Ruben (hi Ruben amo an suhag nga lalake ni Jacob): an mga banay nira Hanoc, Falu,

⁶Hesron, ug Carmi.

⁷May-ada kapin hin 43,730 nga kalalaken-an ini nga mga banay.

⁸An mga tulin ni Falu amo hira Eliab

⁹ngan an iya mga anak: hira Nemuel, Datan, ug Abiram. (Amo ini nga Datan ug Abiram nga ginpili han bungto. Inatohan nira hira Moises ug Aaron ngan tinmampo hira kan Core, han pagsupil nira han GINOO.

¹⁰Binmuka an tuna ngan ginlam-oy hira, ngan nagkamatay hira upod kan Core ngan han iya mga kaupod han pag-ugtanga hin kalayo in 250 nga mga tawo; nahimo hira nga pahimatngon para han mga tawo.

¹¹Kundi waray magkamatay an mga anak ni Core.)

¹²An tribo ni Simeon: an mga banay nira Nemuel, Jamin, Jaquin,

¹³Sori, ug Saul.

¹⁴May-ada 22,200 nga kalalaken-an ini nga mga banay.

¹⁵An tribo ni Gad: an mga banay nira Sifon, Aggi, Suni,

¹⁶Osni, Eri,

¹⁷Arod, ug Ariel.

¹⁸May-ada 40,500 nga kalalaken-an ini nga mga banay.

¹⁹An tribo ni Juda: an mga banay nira Sela, Peres, Sera, Hesron, Hamul. (Nagkamatay didto ha tuna han Canaan in duha han mga anak ni Juda: hira Er ug Onan.)

²⁰

²¹

²²May-ada 76,500 nga kalalaken-an ini nga mga banay.

²³An tribo ni Isacar: an mga banay nira Tola, Pua,

²⁴Jasub, ug Simran.

²⁵May-ada 64,300 nga kalalaken-an ini nga mga banay.

²⁶An tribo ni Zabulon: an mga banay nira Sered, Elon, ug Jalel.

²⁷May-ada 60,500 nga kalalaken-an ini nga mga banay.

²⁸An mga tribo ni Jose nga amay hin duha nga mga anak nga kalalaken-an, hira Manases ug Efraim.

²⁹An tribo ni Manases: hi Maquir nga anak ni Manases amo an amay ni Galaad. Amo ini an mga tulin ni Galaad:

³⁰an mga banay nira Heser, Helek,

³¹Asriel, Siquem,

³²Semida, ug Hefer.

³³Kababayen-an la an mga anak ni Salfaad nga anak ni Hefer. An ira mga ngaran amo hira Maala, Noa, Hogla, Milca, ug Tirsa.

³⁴May-ada 52,700 nga kalalaken-an ini nga mga banay.

³⁵An tribo ni Efraim: an mga banay nira Sutala, Bequer, ug Teen.

³⁶Tikang kan Sutala an banay ni Heran.

³⁷May-ada 32,500 nga kalalaken-an ini nga mga banay. Amo ini an mga banay nga tulin ni Jose.

³⁸An tribo ni Benjamin: an mga banay nira Bela, Asbel, Airam,

³⁹Sufam, ug Hupam.

⁴⁰Tikang kan Bela an mga banay nira Ered ug Naaman.

⁴¹May-ada 45,600 nga kalalaken-an ini nga mga hugpo.

⁴²An tribo ni Dan: an banay ni Suham

⁴³nga may-ada 64,400 nga kalalaken-an.

⁴⁴An tribo ni Aser: an mga banay nira Hemna, Jesui, ug Beria.

⁴⁵Tikang kan Beria an mga banay nira Heber ug Melquiel.

⁴⁶May anak nga babaye hi Aser nga ginngaranan kan Sera.

⁴⁷May-ada 53,400 nga kalalaken-an ini nga mga banay.

⁴⁸An tribo ni Neftali: an mga banay nira Jesiel, Guni,

⁴⁹Jeser, ug Silim.

⁵⁰May-ada 45,400 nga kalalaken-an ini nga mga banay.

⁵¹Inmabot hin 601,730 an kadamo han ngatanan nga kalalaken-an nga Israelita.

⁵²Nagsiring kan Moises an GINOO,

⁵³“Pagbahinbahin an tuna ngadto han mga tribo sumala han ira kadagko.

⁵⁴Pagbahinbahin an tuna pinaagi hin pagripa, ngan ihatag in hiluag nga bahin ngadto hin dako nga tribongan in haligot nga bahin ngadto hin gutiay nga tribo.”

⁵⁵

⁵⁶

⁵⁷Sakop han tribo ni Levi an mga banay nira Gerson, Cohat, ug Merari.

⁵⁸Upod hini dinhe an gurugudti nga mga banay nira Libni, Hebron, Moholi, Musi, ug Core. Hi Cohat amo an amay ni Amram

⁵⁹nga nakaasawa kan Jocabed nga anak nga babaye ni Levi, nga natawo didto ha Ehipto. Igin-anak ni Jocabed para kan Amram in duha nga anak: hira Aaron ug Moises, ngan hin anak nga babaye nga hi Miriam.

⁶⁰May upat nga mga anak hi Aaron: hira Nadab, Abihu, Eleazar, ug Itamar.

⁶¹Nagkamatay hira Nadab ug Abihu han paghalad nira hin kalayo nga diri baraan ngadto han GINOO.

⁶²Inmabot hin 23,000 an kadamo han mga Levita nga kalalaken-an nga usa ka bulan ngadto ha igbaw an panuigon. Ginlain la hira paglista tikang han iba nga mga Israelita, kay waray hira paghatagi hin bisan ano nga malon didto ha Israel.

⁶³Iginlista nira Moises ug Eleazar ini ngatanan nga mga banay han pag-ihapa nira han mga Israelita didto ha kapatagan han Moab, nga tabok han Salog Jordan tikang ha Jerico.

⁶⁴Naubos hin pagkamatay an mga tawo nga iginlista nira Moises ug Aaron dida han syahan nga pag-ihapa han mga Israelita didto han Kamingawan han Sinai.

⁶⁵Nagsiring an GINOO nga magkakamatay hira ngatanan didto ha kamingawan, ngan nagkamatay manggud hira, gawas kanda Caleb nga anak ni Jefone, ug Josue nga anak ni Nun.